ရွှေပြည်တော်မျှော်တိုင်းဝေး

ရွှေပြည်တော်မျှော်တိုင်းဝေး(ဘာသာပြန် ဝတ္တု)

ရွှေပြည်တော်မျှော်တိုင်းဝေး (ဘာသာပြန် ဝတ္တု) ကို ဆရာမြသန်းတင့်က အင်္ဂလိပ်စာရေးဆရာမ အမ်အမ်ကေး (M.M Kaye) ၏ သည်ဖားပါဗီလီယွန် (The Far Pavilions) ဝတ္တုကိုပြန်ဆိုထားခြင်းဖြစ်သည်။ ဘာသာပြန် အခန်းဆက်ဝတ္တု အဖြစ် စန္နာမဂ္ဂဇင်း တွင် သုံးနှစ်လေးလကြာ ဖော်ပြခဲ့သည်။ ဝတ္တု အနေဖြင့် ဘဝတက္ကသိုလ်စာပေ မှ ၁၉၈၆တွင် ပထမဆုံး ထုတ်ဝေခဲ့ ပြီး ၂၀ဝ၄ခုနှစ်တွင် ဒုတိယအကြိမ် ထပ်မံထုတ်ဝေခဲ့သည်။ ပထမဆုံး အကြိမ်လုံးချင်း ထုတ်ဝေခဲ့စဉ်က ဆရာမြသန်းတင့် က “ဝတ္တုကြီးသည် သမိုင်းနောက်ခံ သာမက အချစ်၊ စွန့်စားခန်း၊ လျှို့ဝှက်သဲဖို၊ စစ်နောက်ခံ နှင့် လူမှုရေး ဝတ္တု” ဟု အမှာစာ တွင်ထည့်သွင်းရေးသား ခဲ့သည်။

ဇာတ်လမ်း အကျဉ်းချုပ်

ရွှေပြည်တော်မျှော်တိုင်းဝေး ဝတ္တုသည် ဗြိတိသျှခောတ် အိန္ဒိယပြည် နောက်ခံဇာတ်လမ်း ဖြစ်ပြီး အိန္ဒိယ ပြည်ပေါက် အင်္ဂလိပ်စစ်ဗိုလ်လေး တစ်ယောက် (အရှော့ (ခေါ်) အက်ရှ်တန်) နှင့် အိန္ဒိယ မဟာရာဇာ တစ်ဦး၏ အနောက်တိုင်းသွေး စပ်သော သမီးတော် (အင်ဂျူလီ) တို့ကို အဓိကဇာတ်ဆောင် အဖြစ်သရုပ်ဖော်ထားသည်။ အက်ရှ်ကို အိန္ဒိယ ပြည် ဟိမဝန္တာတောင်တန်းတွင် အင်္ဂလိပ်မိဘနှစ်ပါးဖြစ်သော ရုက္ခဗေဒပါမောက္ခ ဟီလာရီ (Hillary) နှင့် နယ်ခြားစောင့်တပ်ဗိုလ်ကလေး၏ ညီမဖြစ်သူ အစ္စဘယ် (Isabel) တို့က မွေးဖွားခဲ့သည်။ အစ္စဘယ် သည် ကလေးမီးဖွားပြီး ရက်ပိုင်းတွင် သေဆုံးသွားပြီး ဟီလာရီ သည်လည်း သိပ်မကြာခင်တွင် ကာလဝမ်းရောဂါကြောင့် ဟိမဝန္တာတောထဲတွင်ဆုံးပါး လေသည်။ ကလေးကို နို့တိုက်မွေးစားမိခင် အာယားမ သီတာ အား အမျိုးများဆီသို့ပြန်ပို့ ပေးရန်မှာကြားခဲ့သည်။ သီတာသည် ကလေး၏ဆွေမျိုးများ ကို သိလည်း မသိ ဘယ်ရှာရမှန်းလည်း စိတ်မကူးတတ်သောကြောင့် ဒေလီရှိ ဟီလာရီ၏ မိတ်ဆွေ ဗိုလ်မှူးကြီး ထံသွား အကူအညီ တောင်းရန် ဆုံးဖြတ်ပြီး ဒေလီသို့ ထွက်လာခဲ့သည်။ ဒေလီသို့ ရောက်သောအခါ အိန္ဒိယ တပ်တွင်းပုန်ကန်မူကြီးဖြစ်ပွားနေရာ အိန္ဒိယ တိုင်းရင်းသားများက အင်ဂရေစီ(ခေါ်)အင်္ဂလိပ် သွေးပါသူများကို လိုက်လံသတ်ဖြတ်နေသောကြောင့် ကလေးကို ရုပ်ဖျက်ပြီး အရှော့ဟု နာမည်ပြောင်းကာ မြောက်ပိုင်း အိန္ဒိယသို့ ထွက်ပြေးတိမ်းရှောင်ခဲ့သည်။ သီတာသည် ကာရိကုတ်ဒေသသို့ရောက်သောအခါတွင် ကလေးကိုလည်း သူနှင့်မခွဲဘဲ ထိုဒေသ၌ အခြေချရန်ဆုံးဖြတ်လိုက်သည်။ ကာရိကုတ်မဟာရာဇာ၏ဟော်နန်း တွင်တာဝန်ထမ်းဆောင် နေစဉ် နန်းတွင်းအရှုပ်တော်ပုံကြောင့် ထွက်ပြေးခဲ့ရပြန်သည်။ ထိုသို့တိမ်းရှောင်နေစဉ် လမ်း၌ သီတာ တိမ်းပါးခဲ့သည်။ သီတာ မသေဆုံးမှီတွင် အက်ရှ်အား အကြောင်းစုံ ရှင်းပြပြီး ဟီလာရီပေးခဲ့သော စာရွှက်စာတမ်းများနှင့်ပစ္စည်းများ ကိုပေးခဲ့သည်။

ဇာတ်ကောင်များ

• အရှော့ (Ashok) (ခေါ်) အက်ရှ်တန် ဟီလာရီ အက္ကဘာ ပယ်လမ်-မာတင် (Ashton Hillary Akbar Pelham-Martyn)
• အင်ဂျူလီ (Anjuli)
• ရုရှီလာ (Sushila)
• သီတာ (Sita)
• ဂျိုတီ (Jhoti)
• ဝေါ်တာ ဟယ်မီလ်တန် (Walter Hamilton)
• ကိုဒါဒတ် (Koda Dak)