နည်းပညာတက္ကသိုလ်(ရတနာပုံဆိုင်ဘာစီးတီး): တည်းဖြတ်မှု မူကွဲများ

စတင်ဖွင့်လှစ်စဉ်တွင် တစ်နှစ်ကျပါက အဆင့်နိမ့်နည်းပညာတက္ကသိုလ်-GTU(GTC)များသို့ အတန်းမြှင့်စေလွှတ်ရန် စည်းကမ်းချက်ထားရှိခဲ့သည်။ သို့သော် GTU(GTC)ကျောင်းသားများ ဆူပူထကြွမည်ကို အစဉ်အဆက်စိုးရိမ်ကြောင့်ကြလာသော အစိုးရပီပီ နောက်ပိုင်းတွင် အဆိုပါ စည်းကမ်းချက်များကို ပယ်ဖျက်ခဲ့သည်။ စတင်ဖွင့်လှစ်သည့်နှစ်မှစတင်၍ (၂)နှစ်ဆက်တိုက် အစိုးရဘက်မှ ထိထိရောက်ရောက် အားပေးကူညီထောက်ပံ့မှုများ ရရှိခဲ့သည်။ နောက်ပိုင်းတွင် ပညာရေးစနစ်များအား ခဏခဏပြောင်းလဲပြင်ဆင်သတ်မှတ်ကာ နည်းပညာတက္ကသိုလ်များကို အဆင့်မြှင့်ခြင်း၊ အသစ်ဖွင့်လှစ်ခြင်းများ ပြုလုပ်ပြီးနောက်ပိုင်း နည်းပညာတက္ကသိုလ်(ရတနာပုံဆိုင်ဘာစီးတီး)မှာ အထီးကျန်ဆန်ခဲ့သည်။ အစိုးရက စာအသင်အပြကောင်းမွန်သည်ဟု နာမည်ကြီးသော ဆရာ/ဆရာမများအား YTU,MTU,YIT အစရှိသည့် တက္ကသိုလ်များသို့ ပြောင်းရွှေ့စေလွှတ်ခြင်းတို့ ပြုလုပ်ခဲ့သည်။ သို့သော် မည်သို့ပင်ဖြစ်စေကာမူ နည်းပညာတက္ကသိုလ်(ရတနာပုံဆိုင်ဘာစီးတီး)ကျောင်းသား/ကျောင်းသူများမှာ ကြိုးစားကြသည်။ ရိုးသားကြသည်။ မိမိတက္ကသိုလ်ဂုဏ်ရောင်ထွန်းပြောင်ရေးအတွက် ရောက်ရာနေရာမှ တတ်စွမ်းသမျှကြိုးစားကြသည်။

စတင်ဖွင့်လှစ်စဉ်က အဆင့်မြင့်နည်းပညာတက္ကသိုလ်တစ်ခုပီပီ ဝင်ခွင့်စာမေးပွဲများနှင့် လက်တွေ့လုပ်ဆောင်မှုများရှိသော်လည်း ၂၀၁၂-၂၀၁၃ ပညာသင်နှစ်မှစတင်၍ ဝင်ခွင့်စာမေးပွဲကို ပယ်ဖျက်ခဲ့သည်။ လက်တွေ့လုပ်ဆောင်မှုများ၊ စမ်းသပ်မှုများလည်း နောက်ပိုင်းတွင် သိသိသာသာ လျော့နည်းလာခဲ့သည်။ စတင်ဖွင့်လှစ်သည့် ၂၀၁၀-၂၀၁၁ ပညာသင်နှစ်မှ ၂၀၁၃-၂၀၁၄ ပညာသင်နှစ်အထိ ကျရှုံးသည့် ဘာသာရပ်များအား ပြန်လည်ကုစားဖြေဆိုခွင့် မရှိသော်ငြား ၂၀၁၄-၂၀၁၅ ပညာသင်နှစ်တွင်မူ နောက်ဆုံးနှစ်(ပထမဆုံးအသုတ်) ကျောင်းသား/ကျောင်းသူများကို စာမေးပွဲကျရှုံးပါက ပြန်လည်ဖြေဆိုခွင့် ပြုခဲ့သည်။ အဆိုပါ လုပ်ဆောင်ချက်သည် အရည်အချင်းကိုသာ လိုလားသည်ဟု နှစ်စဉ်နှစ်တိုင်း ကြွေးကြော်ထားသည့် UT-YCCအတွက် မျက်နှာပျက်ဖွယ် ဖြစ်ခဲ့သည်။ စာမေးပွဲတွင် မည်မျှအခြေအနေဆိုးစေကာမူ ပြန်လည်ကုစားဖြေဆိုခြင်းကြောင့် နောက်ဆုံးနှစ်ကျောင်းသားများက အောင်ဖို့ရာ သေချာသကဲ့သို့ဖြစ်နေ၍ လေ့လာမှုပိုင်းတွင် ပေါ့လျော့ခဲ့ကြသည်။ [https://www.utycc.org/forums/ict-forums/1252015.html]

Roll-Callဟု လူသိများသော ကျောင်းချိန်ကြိမ်တွင် လိုအပ်ချက်များစွာြဖင့်လိုအပ်ချက်များစွာဖြင့် အငြင်းပွားဖွယ်ရာ ဆက်လက်တည်ရှိနေဆဲပင်ဖြစ်သည်။ ဆရာ/ဆရာမ တစ်ဦးချင်းဆီ၏ တွက်ချက်မှုများပင် မတူညီခဲ့ချေ။ ထို့ပြင် ကျောင်းသားတစ်ဦးခြင်းစီ၏ ဘဝကို အဆုံးအဖြတ်ပေးသည့် ဒီဘား(Debarred-ကျောင်းခေါ်ကြိမ်မပြည့်၍ ထုတ်ပယ်ခြင်း)ကိုပင်လျှင် သေချာစွာ ကြပ်မတ်စစ်ဆေးမှုမရှိ ထုတ်ပြန်ခဲ့သည်။ ခရစ်နှစ် ၂၀၁၃ ခုနှစ်တွင် ကျောင်းခေါ်ကြိမ်မပြည့်ဟုဆိုကာ ကျောင်းသား/ကျောင်းသူပေါင်း (၁၇၈)ယောက်ကို ၁ နှစ်ကျအဖြစ် သတ်မှတ်ခဲ့သည်။ ထို့ကြောင့် ကျောင်းတွင်း ဆန္ဒပြမှုများ၊ ဆူပူမှုများ ဖြစ်ပွားခဲ့သည်။ အဆိုပါ ဆန္ဒပြမှုများကို သတင်းရယူသော ကျောင်းသားများကိုပင်လျှင် ခေါ်ယူဆုံးမခြင်း ခံခဲ့ရသည်။ သတင်း၊ ဂျာနယ်များတွင်လည်း မြန်မာနိုင်ငံပညာရေးစနစ်၏ အားနည်းချက်များအဖြစ် အဆိုပါ ၁ နှစ်ကျ သတ်မှတ်မှုကို ဖော်ပြခဲ့သည်။ ၇၅ ရာခိုင်နှုန်းပြည့်မီမှသာလျှင် စာမေးပွဲဖြေဆိုခွင့်ရှိသည်ဟုဆိုကာ ၇၅ ရာခိုင်နှုန်း မပြည့်မီသောကျောင်းသား/ကျောင်းသူများကို ထုတ်ပယ်ခဲ့သည်။ သို့သော် (၁၀၃)ရာခိုင်နှုန်းများ၊ (၁၇၇)ရာခိုင်နှုန်းများဖြင့် ပြည့်မီသူများလည်း ရှိခဲ့သည်။ တွက်ချက်မှုမှားယွင်းခြင်းကို ဝန်မခံလိုသောကြောင့် တရားမျှတမှုကို လစ်လျူရှု့ခဲ့ကြသည်။