ကိုလေး၊ ဦး (အင်းဝဂုဏ်ရည်)

ကိုလေး (အင်းဝ ဂုဏ်ရည်)

လူထု ဦးလှ ကွယ်လွန်ခြင်း (၁၂) နှစ်ပြည့် အမှတ်တရ စာတွေကို စုစည်းပြီး လူထု ကြီးပွားရေး စာအုပ်တိုက်က ၁၉၉၄ သြဂုတ်လမှာ ပထမ အကြိမ် ထုတ်ဝေ ဖြန့်ချိတဲ့ ‘လူထု အမှတ်တရ လူထု ဦးလှ’ စာအုပ် ကနေ ကဗျာ ဆရာ “ကိုလေး (အင်းဝ ဂုဏ်ရည်)” အတ္ထုပ္ပတ္တိ အကျဉ်းကို ပြန်လည် ကူးယူ ဖော်ပြတာ ဖြစ်ပါတယ်။

အင်းဝမြို့ စျေးချို ပန်းပဲတန်းရပ် ဇာတိ။ အဖ ဦးချွန်နဲ့ အမိ ဒေါ်မမကြီး တို့က ၁၉၃၆ ခုနှစ်၊ သြဂုတ်လ ၁၁ ရက်နေ့မှာ မွေးဖွားခဲ့တယ်။ အမည်ရင်း ကိုလေး ဖြစ်တယ်။

အင်းဝဂုဏ်ရည် အလယ်တန်းကျောင်း၊ ပြဿဒ်ကျောင်း၊ တံတားဦးမြို့ အထက တို့မှာ ပညာ သင်ကြားခဲ့ပြီး၊ မန္တလေး တက္ကသိုလ်မှာ ဆက်လက် ပညာ ဆည်းပူးခဲ့တယ်။

မန္တလေး တက္ကသိုလ်မှာ စစ်ကိုင်းတိုင်း အသင်း ဉာဏဗလမှူး၊ အဆောင်များ စာကြည့်တိုက်မှူး၊ မန်းတက္ကသိုလ် ကလောင်ရှင် အသင်းတို့မှာ ပါဝင် လှုပ်ရှားခဲ့တယ်။

၁၉၅၂ ခုနှစ်၊ သြဂုတ်လထုတ် မန္တလေး မြန်မာ့လမ်းစဉ် သတင်းစာမှာ “ကျွန်ပ်တို့ ဌာန ရွှေအင်းဝ” ကဗျာ စတင် ပုံနှိပ် ဖော်ပြခြင်း ခံရတယ်။ “လမ်းသစ် ကဗျာများ” စာအုပ်နဲ့ ၁၉၆၅ ခုနှစ် အတွက် အမျိုးသား စာပေ (ကဗျာ) ပထမဆု ရခဲ့တယ်။

၁၉၉ဝ ခုမှာ ကဗျာရှင် ၅ ဦး စုစည်းမှုနဲ့ “နဒီငါးသွယ်” ကဗျာရှည် စာအုပ် ထုတ်ဝေခဲ့ပြီး တံတားဦး မြို့မှာ နေထိုင်လျက် ရှိပါတယ်။