ဖြူဖြူကျော်သိန်း: တည်းဖြတ်မှု မူကွဲများ

စင်မြင့် ဖျော်ဖြေပွဲ တွေမှာ ထူးခြားတဲ့ Performance တွေနဲ့ ခံစားချက် အပြည့်ဖျော်ဖြေတင်ဆက် တတ်တဲ့ရော့ခ်အဆိုရှင် ဒေါက်တာဖြူဖြူကျော်သိန်းကို ဧပြီလ ၂၂ရက်နေ့မှာ ဖခင်ဦးကျော်သိန်း (ညွှန်မှူး(ငြိမ်း) သမဝါယမဝန်ကြီးဌာန)နဲ့ မိခင် ဒေါ်တင်တင်ကြည် (လက်ထောက် ကထိက(ငြိမ်း)စီးပွားရေးတက္ကသိုလ်) တို့က ရန်ကုန်အမျိုးသမီး ဆေးရုံကြီး မှာ သမီးကြီးညိုညိုသိန်းနဲ့ ခုနစ်နှစ် ကွာခြားတဲ့ ဒုတိယသမီးထွေး ဖြူဖြူသိန်းအဖြစ် မွေးဖွားခဲ့ပါတယ်။ သူမရဲ့ဖခင်ဖြစ်သူက အစိုးရ ဝန်ထမ်း ဖြစ်တာကြောင့် နယ်ဒေသ တွေမှာ တာဝန်နဲ့ သွားရောက်ခဲ့ရပေမယ့် သူမရဲ့မိခင်ဖြစ်သူက တက္ကသိုလ်ဆရာမ တစ်ဦးဖြစ်တာ ကြောင့် မိခင်နဲ့အတူ ဖြူဖြူတို့ ညီအစ်မနှစ်ယောက် ရန်ကုန်မြို့မှာပဲ နေထိုင်ကြီးပြင်းခဲ့ပါတယ်။ သူမက သူငယ်တန်းနဲ့ ဒုတိယတန်း ပညာသင်ယူမှု တွေကို အ. မ. က (၁၆) စမ်းချောင်း မှာတက်ရောက်ခဲဲ့ပြီး တတိယတန်း ကနေ ဒသမတန်းပညာ အောင်မြင်သည်အထိ ပညာရေးတက္ကသိုလ် လေ့ကျင့်ရေးကျောင်း(TTC) ကမာရွတ်မှာ တက်ရောက်သင်ယူခဲ့သူပါ။

 

 

''နွေကျောင်းပိတ်ရက်တွေမှာ ဖေဖေရှိတဲ့နယ်ကို သွားလည်ဖြစ်တယ်။ ငယ်ငယ်တုန်းက သွားခဲ့ဖူးတဲ့ နယ်မြို့တွေထဲမှာ အမှတ်တရ အရှိဆုံးကတော့ ခက်ခက်ခဲခဲနဲ့ ရှားရှားပါးပါး သွားဖူးတဲ့ ချင်းတောင်ပါ။အဲဒီအချိန်တုန်းက ဖေဖေက ဟားခါးမှာ ပြည်နယ်မှူးလုပ်တဲ့အချိန် ဖြူဖြူကနှစ် တန်းကျောင်းသူပေါ့။ ဟားခါး ရောက်သွားတဲ့ အချိန်ကြတော့ တောတောင်သဘာဝက အရမ်းလှတယ်။ နွေရာသီမှာ သွားတာတောင် ရောက်ပြီးနောက်နေ့ မျက်နှာသစ်မယ့်အချိန်မှာ ရေကန်ထဲက ရေကခဲနေတယ်။ အမှတ်တရတွေက အများကြီးပါပဲ။ တခြားမြို့တွေလည်း ရှိပါတယ်။ မကွေး၊ပုသိမ်တို့လို ဧရာဝတီတိုင်းမှာ တာဝန်ကျတဲ့ အချိန်တုန်းကဆိုရင်လည်း စက်လှေနဲ့သွားပြီး ၆မိုင် လောက်ထိ လမ်းလျောက်ပြီး ဖေဖေ့နောက်ကို လိုက်ဖူးတယ်။ ပျော်ဖို့လည်း ကောင်းတယ်''လို့ သူမရဲ့ ငယ်ဘဝ ဖြတ်သန်းမှုများနဲ့ အမှတ်တရများကို တစ်စေ့တစ်စောင်း ပြောပြခဲ့ပါတယ်။

ဖြူဖြူက ခရစ်ယာန်ဘာသာဝင် ဖြစ်တာကြောင့် သူမသိတတ်စ အရွယ်ကတည်းက ဂီတနဲ့ ရင်းနှီးမှုရှိခဲ့ပြီး သူမရဲ့ သွေးသားထဲမှာ ဂီတနဲ့ ပတ်သက်တဲ့ ဗီဇသွေးက ရှင်သန်နေခဲ့တယ်လို့ ဆိုပါတယ်။ စာတစ်မျိုးတည်းကိုပဲ ကြိုးစား လုပ်ဆောင်နေတတ်တာကြောင့် ဖြူဖြူရဲ့သူငယ်ချင်းတွေနဲ့ ကျောင်းကဆရာမတွေက ဖြူဖြူကို စင်မြင့်ပေါ်က အဆိုရှင် ဖြစ်လာလိမ့်မယ်လို့ မမျော်လင့်ခဲ့ကြပေမယ့် ဘုရားကျောင်းအသိုင်းအဝန်း၊ မိဘဆွေမျိုးတွေနဲ့ ရင်းနှီးရာဝန်းကျင်ကတော့ ဖြူဖြူကို တစ်နေ့ အဆိုရှင် တစ်ဦးအဖြစ် ကျိန်းသေတွေ့မြင်ရ လိမ့်မယ်လို့ ဟောကိန်းထုတ်ခဲ့ကြပါ တယ်။

 

 

 

သူမရဲ့မိသားစုဝင်တွေက စာဖတ်ခြင်းနဲ့ သီချင်းနားထောင်ခြင်းမှာ ဝါသနာတူ ရှိကြတာကြောင့် ဖြူဖြူ ငယ်စဉ်ကတည်းက မိခင်ကြိုက်နှစ်သက်ရာ အနောက်တိုင်း တေးတွေနဲ့ ပြည်တွင်း အဆိုရှင်တွေရဲ့သီချင်းတွေကို နားယဉ်ခဲ့ပြီး ဖြူဖြူကိုယ်တိုင် ရွေးချယ် နားထောင်တတ်ချိန်မှာတော့ ဇော်ဝင်းထွဋ်၊ လေးဖြူတို့ရဲ့တေးသွားတွေနဲ့ နိုင်ငံတကာ အဆိုရှင်တွေထဲက ဘွန်ဂျိူဘီ၊ စလင်းဒီရွန်တို့ရဲ့တေးသွားကိုလည်း စွဲလန်းခဲ့တယ်လို့ ဆိုပါတယ်။ ဖြူဖြူကျော်သိန်းက ဆေးကျောင်း ဒုတိယနှစ်ပြီးချိန်မှာတော့ 'လုံးဝမသက်ဆိုင်တော့ပါ' တေး စီးရီးနဲ့အတူ ပရိသတ်ရှေ့ကို ရောက်ရှိလာခဲ့ပါတယ်။