ကဗျာလွတ်

ကဗျာလွတ်အကသည် ဒေါ်ဩဘာသောင်း တီထွင် ဆန်းသစ်ခဲ့သော ကကွက်များဖြစ်သည်။ ကဗျာလွတ်အကတွင် ကကွက်ပေါင်း ၁၂၅ ကွက်ရှိသည်။ အခြေခံကကွက်များမှစပြီး ခက်ခဲနက်နဲသောအပိုင်းအထိ အဆင့် ၅ ဆင့်ခွဲထားသည်။ အဆင့်တစ်ဆင့်တွင် ကကွက် ၂၅ ကွက်စီရှိသည်။

ကဗျာလွတ် အကကို ပိုင်ပိုင်နိုင်နိုင် ကျွမ်းကျွမ်းကျင်ကျင် တတ်မြောက်ခဲ့ပါက မြန်မာ့ကကြိုးများ ပါဝင်သော မည်သည့် ကကြိုးကကွက်များကိုမဆို အလွယ်တကူ ဝင်ရောက်ကပြနိုင်သည်။ ဦးနေဝင်းလက်ထက်တော်လှန်ရေးကောင်စီခေတ်မှစ၍ကဗျာလွတ်မူများဖျက်ဆီးခံရ​လေသည်။

နိုင်ငံတော် အကြီးအကဲတွေကို အမှန်အတိုင်း သိခွင့်ပေးကြပါ (သို့မဟုတ်) နှစ်ပေါင်း၅၀ကျော်ကြာ ကဗျာလွတ်အရှုပ်တော်ပုံ

---

သြဂုတ်လ ၁၆ရက်နေ့က နိုင်ငံတော်၏ အတိုင်ပင်ခံ ပုဂ္ဂိုလ် အနုပညာ အထက်တန်းကျောင်း (မန္တလေး) တစ်ဖြစ်လဲ အစဉ်အလာကြီးမားလှသည့် မန္တလေး ပန်တျာနှင့် ပန်းချီပန်းပုကျောင်းကို ရောက်ရှိလာပြီး အဆိုပါကျောင်းက ဖျော်ဖြေတင်ဆက်သော အခြေခံ အကသင်ရိုးများကိုကြည့်ကာ အကသင်ရိုးညွှန်းတမ်းကိစ္စနှင့် သူသိရှိသင်ကြားခဲ့ဖူးသော အကသင်ရိုးများနှင့် မတူဘဲ ကွဲလွဲနေကြောင်း ပြောဆိုသည်ဟုလည်း တဆင့် ကြားသိရပြီးနောက် ထုံးစံအတိုင်း အစဉ်အလာမပျက် မဲပြာပုဆိုး ဇာတ်လမ်းကို ကြားသိရပြန်ပါတယ်။

" နိုင်ငံတော်မူ အမျိုးသမီးအခြေခံကဗျာလွတ်အက (ပထမဆင့်)အား ပြန်လည် မှတ်တမ်းတင် ရိုက်ကူးခြင်း ဆောင်ရွက်" ဟူသော သတင်း။

ထို့ကြောင့် လွန်ခဲပသော နှစ်ပေါင်း၅၀ကျော်မှစ၍ အမှန်တကယ် ဖြစ်ပျက်ခဲ့ကာ ယနေ့တိုင် အမှန်ကို ဖုံးကွယ်ထားနေကြ သော "ကဗျာလွတ် အရှုပ်တော်ပုံ " ဖြစ်စဉ်ရက်စွဲများကို အများသူငါ သိစိမ့်သောငှာ ထပ်မံ(ထပ်မံ) တင်ပြအပ်ပါတယ်။

ဒေါ်သြဘာသောင်း ကဗျာလွတ်သမိုင်း ××××××××××××××××××××××

- ၁.၇.၁၉၅၃ - မန္တလေးပန်တျာနှင့် အနုပညာသင်ကျောင်းဖွင့်။ အမျိုးသမီးအကသင်တန်းဆရာ သြဘာသောင်းကအကသင်ရိုးမရှိ၍ ဗုံလေးလုံးနှင့် တီးခတ်သော ဒိုးချက် သံစဉ်များနှင့် ကဗျာလွတ်အကကိုစတင်တီထွင်။ (ထိုအချိန်တွင် အမျိုးသားအကသင်တန်း ဆရာရွှေဒေါင်းညိုကလည်း အမျိုးသားကဗျာလွတ်အကများဖြင့် တီထွင် သင်ကြား) - ပန်တျာနှင့်အနုပညာသင်သင်ကျောင်းဒုနှစ်သင်တန်းအတွက် ကဗျာလွတ် ပထမ၊ ဒုတိယ၊ တတိယအဆင့်များကိုတဆင့်လျှင် ကကွက် ၂၅ ကွက်ဖြင့် ၇၅ ကွက် တီထွင်ပြီးသင်ပေးခဲ့။ (အဆိုပါ ၇၅ ကွက် ကျွမ်းကျင်လျှင် မည်သည့်မြန်မာသီချင်းစည်းဝါးနှင့်မဆိုပိုင်နိုင်စွာကပြနိုင်မည်ဖြစ်)

- ၁၉၆၇ - အကနည်းပြဆရာမတာ၀န်က အငြိမ်းစားယူပြီးအကအကြံပေးပုဂ္ဂိုလ်အဖြစ် တာ၀န်ယူပြီး အကအကြံပေး ပုဂ္ဂိုလ်အဖြစ် တာ၀န်ယူချိန်၊ နောင်တစ်ချိန် ပန်တျာကျောင်းတွင် အဆင့်မြင့် (တက္ကသိုလ်အဆင့်) သင်တန်းများဖွင့်လှစ်ပါက အဆင်သင့်ဖြစ်ရန် ကဗျာလွတ်စတုတ္ထအဆင့်နှင့် ပဉ္စမအဆင့်များကို ထပ်မံတီထွင်ပြီးနောက်ဆုံးတပည့် မခင်၀င်း(ခင်၀င်းနွယ်)ကိုသင်ယူမှတ်သားစေခဲ့။

×××× ×××× ×××× ×××× ×××× ××××

ဒေါ်သြဘာသောင်း၊ ကဗျာလွတ်မှတ်တမ်းဖြစ်စဉ် ရက်စွဲသမိုင်းအကျဉ်း __________________________________________________

(၁) ၁၉၆၇ မတ်လ ၂ ရက် - ရန်ကုန်အိမ်တော်၀င်းအတွင်း တောင်သူလယ်သမားနေ့ ဂုဏ်ပြုညစာစားပွဲတွင် မန္တလေးပန်တျာမှ ဆရာမကြီးဒေါ်သြဘာသောင်း၏တပည့် မခင်၀င်းနွယ် ကပြသောကကွက်များကို တော်လှန်ရေးကောင်စီဥက္ကဋ္ဌကြီးက စိတ်၀င်စားသဖြင့် မေးမြန်းရာဒေါ်သြဘာသောင်းက ဒါမြန်မာအမျိုးသမီးအက အခြေခံတွေပဲ။ ဒီအခြေခံတွေတတ်ရင် မြန်မာသီချင်း ဘယ်စည်းဝါးမဆို ကလို့ရတယ်ဟုဖြေကြားရာ ဥက္ကဋ္ဌကြီးကဟုတ်ပြီ။ ကျွန်တော်လိုချင်တာဒါပဲဟုပြောဆိုခဲ့။

(၂) ၁၉၆၇ မတ်လ ၁၃ ရက် - မခင်၀င်းနွယ်ကို မန္တလေးအနုပညာ၊ ပန်တျာနှင့် အကကျောင်း၌ ၁၄.၃.၆၇ နေ့မှစ၍ အကနည်းပြဆရာမအဖြစ်ခန့်ထားခဲ့။

(၃) ၁၉၆၇ ဧပြီ - တော်လှန်ရေးကောင်စီဥက္ကဋ္ဌကြီးကဒေါ်သြဘာသောင်း၏ ကဗျာလွတ်အကအဆင့် ၅ ဆင့်၊ ကကွက် ၁၂၅ ကွက်ကိုဓာတ်ပုံ၊ ပန်းချီ၊ ရုပ်ရှင်များဖြင့် မှတ်တမ်းတင်၍ အကသင်ရိုးများအဖြစ် ပြဋ္ဌာန်းနိုင်ရေးဆောင်ရွက်ရန် နှုတ်မိန့်ပေးခဲ့။

(၄) ၂၆.၄.၆၇ - ရန်ကုန်မြို့၊ ယဉ်ကျေးမှုရိပ်မြုံ၀င်းအတွင်း ယဉ်ကျေးမှုကောင်စီ၊ ခန်းမ၌ ကဗျာလွတ်အက မှတ်တမ်းတင်ခြင်းစတင်။

(၅) ၁၉၆၇ ခုနှစ်၊ ဇွန်လ ၁၉ ရက် - အငြိမ်းစားအကနည်းပြဆရာမကြီးဒေါ်သြဘာသောင်း၏ အခြေခံကကြိုးကွက်များမှအစ ကနည်းကဟန်အမျိုးမျိုးတို့ကို ရုပ်ရှင်၊ ရုပ်သေတို့ဖြင့် ကပြမှတ်တမ်းတင်၍ တဆင့် ဖြန့်ဖြူးသင်ကြားရာ၌ ဒေါ်သြဘာသောင်း၏ ကကြိုးကဟန်များကို သင်ရိုးအတိုင်း စံနစ်တကျသင်ကြားကပြနိုင်သူ မခင်၀င်းနွယ်ကို ယဉ်ကျေးမှုကောင်စီအက်ဥပဒေပုဒ်မ ၁၁(၁)အရ ယဉ်ကျေးမှုကဇာတ်အဖွဲ့တွင် ကဟန်ပြအမျိုးသမီးအဖြစ် ခန့်ထားခဲ့။

(၆) ၂၉.၆.၆၇ - ကဗျာလွတ်ကကွက်များကို ပန်းချီကောက်ကြောင်းဖြင့် မှတ်တမ်းတင်စဉ် ဒေါ်သြဘာသောင်း၏ ကျန်းမာရေးကို အကြောင်းပြပြီး မန္တလေးသို့ပြန်စေခဲ့။ (အမှန်မှာတရုတ်-မြန်မာအရေးအခင်းကြောင့်ဖြစ်)

(၇) ၂၇.၇.၆၉ - ၁၉၆၉ သြဂုတ် ၁ ရက်မှစ၍ မန္တလေးပန်တျာကျောင်း၌ ကဗျာလွတ်အက မှတ်တမ်းတင်ခြင်းကို ဆက်လက်ဆောင်ရွက်။

(၈) ၁၆.၈.၆၉ - သြဂုတ် ၁၄ မှ ၂၃ ရက်အထိသင်ရိုးညွှန်းတမ်း အစည်းအဝေးများ ကျင်းပရန်အတွက် မှတ်တမ်းတင်ခြင်း ခေတ္တရပ်။

(၉) ၁၉၇၀ ခုနှစ် ဇွန်လ - ကဗျာလွတ်ပထမအဆင့်မှ ပဉ္စမအဆင့်အထိ ကကွက်ပေါင်း ၁၂၅ ကွက်ကို ပန်းချီကောက်ကြောင်း၊ ဓာတ်ပုံတို့ဖြင့် ရန်ကုန်နှင့် မန္တလေးတို့၌ မှတ်တမ်းတင်ခဲ့ရာ ပန်းချီအနေနှင့် ၁၆၁၇ ပုံ၊ ဓာတ်ပုံဖြင့် ပထမအဆင့်၌ ၂၈၅ ပုံ၊ ဒုတိယအဆင့် ၅၁၆ ပုံ၊ တတိယအဆင့် ၉၃၆ ပုံ၊ စတုတ္ထအဆင့် ၁၅၅၄ ပုံ၊ ပဉ္စမအဆင့် ၁၃၉၃ ပုံမှတ်တမ်းတင်ခဲ့ပြီးဗဟိုရုပ်ရှင်ကလည်း ရုပ်ရှင်ဖြင့် အကြမ်းမှတ်တမ်းတင်ရိုက်ကူးခဲ့သည်။ စာဖြင့်မှတ်တမ်းတင်ခြင်း၊ ဓာတ်ပုံ၊ ပန်းချီပုံများစီစစ်ခြင်း၊ စီစဉ်ခြင်း၊ အချောသပ် စာအုပ်ပြုစုခြင်းများ ဆက်လက် မဆောင်ရွက်တော့ဘဲ မှတ်တမ်းတင်လုပ်ငန်းကိုရပ်ဆိုင်းခဲ့။

(၁၀) မှတ်တမ်းတင်ခြင်းလုပ်ငန်း ရပ်ဆိုင်းသွားပြီးနောက် ဒေါ်သြဘာသောင်းမှာ အသက်အရွယ်ကြီးရင့်ချိန်၊ ထိုမပြီးပြတ်ဘဲ ရပ်ဆိုင်းသော လုပ်ငန်းအပေါ် စိတ်မကောင်းခြင်းကြီးစွာနှင့် ၁၃.၁.၇၁ နေ့တွင် ကွယ်လွန်ခဲ့။

(၁၁) ၁၅.၁.၇၇ - ဒေါ်သြဘာသောင်း၏ ကဗျာလွတ်ကကွက်များနှင့်ပတ်သက်ပြီး မန္တလေး ဟံသာ၀တီသတင်းစာတိုက်၊ ဘိုး၀ဇီရခန်းမတွင် ကဗျာဆရာဇော်ပုလဲနှင့် ဇနီးမခင်၀င်းနွယ်တို့ကစာတမ်းဖတ်ကြားခဲ့။

(၁၂) ၁၉၇၇ ။ ယဉ်ကျေးမှု၀န်ကြီးဌာနကကဗျာလွတ်အကမှတ်တမ်းတင်ခြင်းကိုရပ်ဆိုင်းသည့်အပြင် စာအုပ်ထုတ်ဝေရေး၊ သင်ရိုးအဖြစ် ပြဋ္ဌာန်းရေးတို့ကိုပါ ၇ နှစ်ကြာသည်အထိဆက်လက်ဆောင်ရွက်ခြင်းမရှိတော့သဖြင့် လူထုဦးလှ၊ လူထုဒေါ်အမာတို့ အားပေး တိုက်တွန်းမှု ခံယူကာ ကဗျာလွတ်အက (ဒေါ်သြဘာသောင်းမူ) စာအုပ်ကို ဓာတ်ပုံကောက်ကြောင်း ပန်းချီများနှင့်အတူ ဇော်ပုလဲ-ခင်၀င်းနွယ်တို့ကမိမိတို့စရိတ်ဖြင့် ပြုစုခဲ့။

(၁၃) ၂၀.၇.၇၈ နေ့မှာပင် စာမူကို ယဉ်ကျေးမှု၀န်ကြီးဌာနနှင့် စာပေစီစစ်ရေးအဖွဲ့သို့တင်ပြခဲ့။

(၁၅) ၁၃.၁၁.၇၈ - ယဉ်ကျေးမှု၀န်ကြီးဌာန ညွှန်ကြားရေးမှူးကိုယ်တိုင် မန္တလေးလာ၍ ခင်၀င်းနွယ်အား ဆင့်ခေါ်ကာ အဆိုပါစာအုပ်ကို မထုတ်ဝေရေးခြိမ်းခြောက် ဖိအားပေးခဲ့။ ထိုကိစ္စမှာ ၀န်ကြီးဌာနမှသာ လုပ်ဆောင်ရမည်ဖြစ်သဖြင့် ၀န်ကြီးဌာနသို့သာ အကူအညီပေးရန်ချော့ကာချောက်ကာဖိအားပေးခဲ့။ ခင်၀င်းနွယ်က ထိုကိစ္စကို ၀န်ကြီးဋ္ဌာနက တရား၀င်စာ ထုတ်၍အကြောင်းကြားပါရန်ပြောဆိုရာ လက်မခံခဲ့။

(၁၆) ၂၈.၁၂.၇၈ - ယဉ်ကျေးမှု၀န်ကြီးဌာနကဇော်ပုလဲနှင့် ခင်၀င်းနွယ်အားရန်ကုန်သို့လာရန်အကြောင်းကြားဆင့်ခေါ်ခဲ့။

(၁၇) ၁.၁.၈၀ - စာပေစီစစ်ရေးတွင် ၁ နှစ်ခွဲခန့်ကြာပြီးနောက် စာမူခွင့်ပြုချက်ကျသဖြင့် ကဗျာလွတ်အက (ဒေါ်သြဘာသောင်းမူ) စာအုပ်ကို ဇော်ပုလဲ-ခင်၀င်းနွယ်ပြုစု၍ ဦးမောင်မောင်တင်(မဟာဝိဇ္ဇာ)၊ လူထုဒေါ်အမာနှင့် ၀င်းတင်(ဟံသာ၀တီဦး၀င်းတင်) တို့ အမှာစာများဖြင့် ငွေလ၀န်းစာပေက ထုတ်ဝေတော့မည့်အကြောင်း လုပ်သားပြည်သူ့နေစဉ် သတင်းစာ၌ ကြော်ငြာထည့်သွင်းခဲ့။

(၁၈) ၂.၁.၁၉၈၀ - စာပေစီစစ်ရေးရုံးကခွင့်ပြုပြီးသော ဇော်ပုလဲ-ခင်၀င်းနွယ်၏ စာအုပ်ကို ယဉ်ကျေးမှု၀န်ကြီးဌာန၊ အနုပညာဦးစီးဋ္ဌာန ညွှန်ကြားရေးမှူးချုပ်က ထုတ်ဝေခွင့် ဆိုင်းငံ့ထားရန် အကြောင်းကြားပြီး ထိုနေ့ မြန်မာ့အလင်း သတင်းစာ၌ ဒေါ်သြဘာသောင်း ကဗျာလွတ်ပထမအဆင့်စာအုပ်ကို အခြေခံဥပဒေနေ့ ၃၂ နှစ်မြောက် လွတ်လပ်ရေး နေ့ကို ကြိုဆိုသောအားဖြင့် ယဉ်ကျေးမှု၀န်ကြီးဌာနက မကြာမီ ထုတ်ဝေတော့မည့်အကြောင်း စာအုပ်မျက်နှာဖုံး ဓာတ်ပုံနှင့် သတင်းထုတ်ပြန်ခဲ့။

(၁၉) ဇန်နဝါရီ၊ ၁၉၈၀ - မိမိတို့စာမူအားဆိုင်းငံ့ထားရန်ကန့်ကွက်ခြင်းအပေါ် ယဉ်ကျေးမှု၀န်ကြီးဌာနကဖြေရှင်းပေးရန် ဇော်ပုလဲ-ခင်၀င်းနွယ်က ၀န်ကြီးထံစာတင်ခဲ့။

(၂၀) ၁၄.၁.၁၉၈၀ - မိမိတို့စာမူအားကန့်ကွက်သည့်ကိစ္စနှင့် ပတ်သက်၍ နိုင်ငံတော်သမ္မတကြီးထံအသနားခံစာတင်။

(၂၁) ၈.၂.၁၉၈၀ - ဒေါ်သြဘာသောင်း၏ ကဗျာလွတ်ကကွက်များပထမအဆင့်စာအုပ်ကို ယဉ်ကျေးမှု ၀န်ကြီးဌာန အနုပညာဦးစီးဌာနက ဓာတ်ပုံပေါင်း ၁၅၀ ကျော်၊ ပုံကြမ်း ၈၀ ကျော်နှင့် ထွက်ပြီဟုလုပ်သားပြည်သူ့နေစဉ်သတင်းစာ၌ ကြော်ငြာခဲ့။ (ယခုမြင်တွေ့ကြရသောစာအုပ်)

(၂၂) ၁၉.၂.၁၉၈၀ - ယဉ်ကျေးမှု၀န်ကြီးဌာနက ထုတ်ဝေထားသောစာအုပ်တွင် ဖြစ်စဉ်သမိုင်း၊ က နည်း မှတ်တမ်း အချက်အလက်နှင့် ဓာတ်ပုံနှင့် ပန်းချီပုံကြမ်းများစီစဉ်ထားရှိမှုမှာ (က၍မရလောက်အောင်ပင်) မှားယွင်းနေကြောင်း နိုင်ငံတော်သမ္မတထံ တင်ပြခဲ့။

(၂၃) ၂၈.၂.၁၉၈၀ - အဆိုပါစာအုပ်ပါမှတ်တမ်းအချက်အလက်များမှာမှားယွင်းနေကြောင်း ပြည်တွင်းထုတ် သတင်းစာ အယ်ဒီတာချုပ်များနှင့် ယဉ်ကျေးမှု၀န်ကြီးထံ စာတင်ခဲ့။

(၂၄) ၃၁.၃.၁၉၈၀ - ဒေါ်သြဘာသောင်း ကဗျာလွတ်ကကွက်များ(ပထမအဆင့်)စာအုပ်မှ စာမျက်နှာအလိုက် ရေးသား ဖေါ်ပြသည့် မှားယွင်းချက်များကို ပြုပြင်ရန် နိုင်ငံတော်သမ္မထံတင်ပြခဲ့။

(၂၅) ၁၇.၁၂.၁၉၈၀ - ယဉ်ကျေးမှု၀န်ကြီးကိုယ်စား ဒု-၀န်ကြီးက ၀န်ကြီးဌာနရုံးသို့ ကဗျာလွတ်စာအုပ်ပါ ကကွက်များကိစ္စ ညှိနှိုင်းရေး ရန်ကုန်သို့ လာရောက်ရန် အကြောင်းကြားခဲ့။

(၂၆) ၂၇.၁၂.၁၉၈၀ - ၀န်ကြီးရုံးခန်း၌ ထုတ်ဝေသည့်စာအုပ်မှ အမှားအယွင်းများကိုကိုယ်တိုင်သရုပ်ပြ၍ရှင်းလင်းရာ ၀န်ကြီးက သဘောတူခဲ့။

(၂၇) ၂၉.၁၂.၁၉၈၀ - ယဉ်ကျေးမှု၀န်ကြီးဌာန၊ အနုပညာဦးစီးဌာနက ထုတ်ဝေသော အဆိုပါစာအုပ်ကို ဖျက်သိမ်းရန် သဘောတူခဲ့။

(၂၈) ၃၀.၁၂.၁၉၈၀ -ဆိုင်းငံ့ထားရန် ကန့်ကွက်ထားသည့် ဇော်ပုလဲ-ခင်၀င်းနွယ်ပြုစုသော ကဗျာလွတ်အက (ဒေါ်သြဘာသောင်းမူ) စာအုပ်ကို ယဉ်ကျေးမှု၀န်ကြီးဌာနက ၀ယ်ယူရန်ဆွေးနွေးခဲ့။

(၂၉) ၂၀.၁.၁၉၈၁ - အဆိုပါစာမူကို ယဉ်ကျေးမှု၀န်ကြီးဌာန၊ အနုပညာဦးစီးဌာနက စာမူခငွေတစ်သောင်းကျပ်ဖြင့် အပြီးအပိုင် ၀ယ်ယူကြောင်း စာချုပ်ခဲ့။ (ပြုစုသူ ဇော်ပုလဲ-ခင်၀င်းနွယ် နာမည်မသုံးစွဲရ။ ကျေးဇူးတင်လွှာ၌သာ နာမည်ဖေါ်ပြမည်။ ကဗျာလွတ်နှင့် ပတ်သက်၍ နောက်ထပ်မည်သည့်စာမူမှ မပြုစုရ ဟူသော အချက်များပါ၀င်။ အဆိုပါအချက်များကို ကာယကံရှင်များက မူလတွင် သဘောမတူဘဲ ခါးခါးသီးသီးငြင်းဆန်ခဲ့သော်လည်း ဒု၀န်ကြီးအပါအ၀င် ဖိအားပေးသဖြင့် ကဗျာလွတ်အက မူမှန်ဖြစ်ရေးအတွက် လက်ခံခဲ့ကြရ။)

(၃၀) ၃.၃.၁၉၈၄ - မိမိတို့စာမူအား ယဉ်ကျေးမှု၀န်ကြီးဌာနက ၀ယ်ယူထားသော်လည်း သုံးနှစ်ကျော်ကြာသည်အထိ လုံး၀ ထုတ်ဝြေခင်းမပြုသည့်အပေါ် နိုင်ငံတော်သမ္မတထံအသနားခံစာတင်ခဲ့။

(၃၁) ၁၃.၆.၁၉၈၄ - ယဉ်ကျေးမှု၀န်ကြီးဌာနက ကဗျာလွတ်ကကွက်များ စာအုပ်ကိစ္စ ညှိနှိုင်းရေးနှင့် ကဗျာလွတ်ကကွက် ၁၂၅ ကွက်သည် နိုင်ငံတော်မူပိုင်ဖြစ်ကြောင်း။ နိုင်ငံတော်ကပဲ ကျန်စာအုပ်များ ဆက်လက်ထုတ်ဝေစေမည့် အကြောင်းနှင့်အဆိုပါ ၁၂၅ ကွက်ကို ရုပ်မြင်သံကြား ရိုက်ကူးထုတ်လွှင့်လိုကြောင်း အကြောင်းကြားကာ ရန်ကုန်သို့ လာရောက်ရန် ဆင့်ခေါ်ခဲ့။

(၃၂) ၃.၈.၁၉၈၄ သြဂုတ်လ ၁၃ ရက်နှင့် ၁၄ ရက်နေ့များတွင် ရုပ်မြင်သံကြားရိုက်ကူးရန် စီစဉ်ပြီးဖြစ်ဟု ယဉ်ကျေးမှု ၀န်ကြီးဌာနက အကြောင်းကြားခဲ့။

(၃၃) ၈.၈.၁၉၈၄ - ယဉ်ကျေးမှု၀န်ကြီးဌာနတွင် ယခင်က ရိုက်ကူးခဲ့သော ဓာတ်ပုံများကို ပြန်လည်စီစစ်ရန်နှင့် လိုအပ်ပါက ခင်၀င်းနွယ်က အသစ် ထပ်မံရိုက်ကူးပေးရန် တောင်းဆိုခဲ့။

(၃၄) ၁၃၊ ၁၄.၈.၁၉၈၄ - ကဗျာလွတ်ကကွက် ၁၂၅ ကွက်စလုံးကို ရန်ကုန်ပြည်လမ်း၊ မြန်မာ့ရုပ်မြင်သံကြား၌ ရိုက်ကူးခဲ့။ (ယခုအချိန်ထိမထုတ်လွှင့်)

(၃၅) ၁၇.၂.၁၉၈၅ - မူလထုတ်ဝေခဲ့သော ပထမအဆင့်စာအုပ်မှာ ထုတ်ဝြေပီးဖြစ်သဖြင့် ပြင်ဆင်ရန်မဖြစ်နိုင်ကြောင်းနှင့် ဒုတိယအဆင့် စာအုပ်ထုတ်ဝေမှသာ အသစ်ပြင်ဆင်ပြီး ပြန်လည်ထုတ်ဝေမည်ဖြစ်ကြောင်း။ ဒုတိယအဆင့် စာအုပ် ထုတ်ဝေနိုင်ရေး၊ ဓာတ်ပုံများစီစစ်နိုင်ရန် ရန်ကုန်မှ ပညာရှင်များနှင့် အနုပညာညွှန်ကြားရေးမှူးချုပ်ကိုယ်တိုင် မန္တလေးတွင် လာရောက်ကာ ခင်၀င်းနွယ်နှင့် ညှိနှုင်းမည်ဟုအကြောင်းခဲ့။

(၃၆) ၁၅.၃.၁၉၈၅ - အဆိုပါညှိနှိုင်းမည့်ကိစ္စကို ညွှန်ကြားရေးမှူးချုပ်၏ ကျန်းမာရေးကြောင့် မလာရောက်နိုင်တော့ကြောင်း အကြောင်းကြား။

ထိုစဉ်ကတည်းကဒေါ်သြဘာသောင်း၏ ကဗျာလွတ်မှတ်တမ်းနှင့် သင်ရိုးညွှန်းတမ်းကိစ္စ နိဋ္ဌိတံသွားပါကြောင်း။

ခင်၀င်းနွယ်မှာလည်း မိမိ၏ကျေးဇူးရှင် ဆရာမကြီးဒေါ်သြဘာသောင်း၏ ပညာကို ယဉ်ကျေးမှုမျက်နှာစာ၌ တင်ကျန်ရှိစေရေး အားသွန်ခွန်စိုက်ကြိုးပမ်းခဲ့သော်လည်းအရာမထင် အနိုင်ကျင့်ခံရခြင်း၊ ကျန်းမာရေးစီးပွားရေးများပင် ပျက်ယွင်းသည်အထိမိမိအရင်းအနှီးဖြင့် လုပ်ကိုင်ပါသော်လည်းအာဏာဖြင့် ပိတ်ပင်ခံရခြင်းများကြောင့် အနုပညာအပေါ် စိတ်အနာကြီးနာကာ မုဆိုးမဘဝြဖင့် မြန်မာတိုင်းရင်းဆေးလုပ်ငန်း ဖြင့်သာမုံရွာ၌ ဇာတ်မြှုပ်နေထိုင်တော့သည်။

၁၉၈၈ အရေးတော်ပုံကြီး၌လည်း သမီးကြီးကဥမမယ် စာမမြောက်မီ အထိန်းသိမ်းခံရခြင်း၊ သားငယ်နှင့် မိမိကိုယ်တိုင်လည်း နိုင်ငံရေးလောကတွင် ပါ၀င်ခြင်းကြောင့် အာဏာပိုင်၏ အငြိုအငြင်ခံရခြင်းများနှင့် ဘ၀ကိုဖြတ်သန်းခဲ့ရာ န.၀တ၊ န.အ.ဖခေတ်များ၌ ကဗျာလွတ်ကိစ္စကို ပြန်လည်ဖေါ်ထုတ်ရန် တိုက်တွန်းကြသော်လည်း"ကျွန်ခေတ်တွင် လူရာမ၀င်ချင်"သည့် စိတ်ဖြင့် ကင်းအောင်နေခဲ့သည်။

ထိုကာလများမှာပင် ပန်တျာကျောင်းများ၊ အသစ်ဖွင့်ယဉ်ကျေးမှု တက္ကသိုလ်များ၌ ပညာရှင်ဟု ဆိုသူများ၏ အစီအမံဖြင့် ဒေါ်သြဘာသောင်း၏ မူလကဗျာလွတ်ကို ဖြုတ်၊ ထုတ်၊ သတ်၊ ဖြတ်ညှပ်ကပ်ကာသင်ရိုးကဗျာလွတ်ကို ပြဋ္ဌာန်းလိုက်ကြသည်။

ဤသို့ဖြင့် ၂၀၀၉ ခုနှစ် မန္တလေး အနှစ် ၁၅၀ ပြည့်ကာလတွင် မန္တလေးအနုပညာချစ်သူများက အနုပညာအပေါ် စိတ်အနာကြီးနာနေသော ခင်၀င်းနွယ်ကို မန္တလေးသူတစ်ယောက်မို့ အနှစ် ၁၅၀ မှာ ပြန်လည်၍ ဆင်နွဲနိုင်ရန်ဖိတ်ခေါ်ခဲ့ရာမှ စင်မြင့်ပေါ် ပြန်လည်ရောက်ရှိခဲ့၏။ ထို့နောက် မန္တလေးအနုပညာချစ်သူအ၀န်းဝိုင်း၏ အားပေးမှုဖြင့် စိတ်မကုန်နိုင်ဖွယ် သြဘာသောင်းကဗျာလွတ် ၁၂၅ ကွက်ကိုအခြေခံသော "ဗုံလေးလုံးသံစဉ် ဂန္ထ၀င် အကပဒေသာ"အမည်ရှိ ဗီစီဒီကို ရိုက်ကူးပြန်လေသောအခါ…

၂၀၀၉ နို၀င်ဘာ - အိုရီယမ်တယ်ဟောက်စ် မင်္ဂလာခန်းမ၌ မြို့မတူရိယာအသင်း၊ ရွာစားစိန်တင့်လွင်ဆိုင်းအဖွဲ့တို့နှင့် ရိုက်ကူး။ ၂၃.၁၂.၂၀၀၉ - စီစစ်ရေးသို့ စာမူတင်။ ၂၇.၂.၂၀၁၀ - စီစစ်ရေးမှ သီချင်းစာမူခွင့်ပြုချက်ရ ၂.၇.၂၀၁၀ - ဗီဒီယိုဆင်ဆာအဖွဲ့ကပထမအကြိမ်အဖြစ်ပြင်ဆင်ရန် အချက် ၅ ချက်ဖြင့် ပြင်ဆင်ရန်အကြောင်းပြန်။

(၁) ယခုအခွေပါ ကဗျာလွတ်ကကွက်များမှာလက်ရှိယဉ်ကျေးမှုတက္ကသိုလ်များ၊ ပန်တျာများ၌ သင်ကြားနေသည့် ကဗျာလွတ်ကကွက်များနှင့် ကွဲလွဲနေသဖြင့် ပြင်ဆင်ရန်။ (သြဘာသောင်းကဗျာလွတ်က ၁၉၅၃ ကတည်းကရှိခဲ့ပြီးလက်ရှိကဗျာလွတ်ကမူလကဗျာလွတ်ကို ဖြုတ်၊ ထုတ်၊ သတ်၊ ဖြတ်ညှပ်ကပ်ထားတာပညာရှင်ဆိုသူများမသိ။)

(၂) မြို့မအသင်းနှင့် စိန်တင့်လွင်တို့ တီးခတ်သောရှေးရိုးတပင်တိုင် တီးလုံးတွင် မြို့မက အနောက်တိုင်းဆန်နေပြီး ဖျဉ်းချင်ပိုဒ်နောက်ပိုင်း သံဆန်းတီးလုံးများ ထည့်ထားသဖြင့် မူမှန်မဟုတ်၍ ပြင်ဆင်ရန်။ (မြို့မဆိုတာ ၁၉၂၅ ခုနှစ်ကတည်းက သီချင်းကြီးတွေကို အနောက်တိုင်းတူရိယာများနှင့် တီးမှုတ်ခဲ့တယ် ဆိုတာ ဆင်ဆာက ပညာရှင်ဆိုသူများမသိ။ ထို့ပြင် ဖျဉ်းချင်နောက်က တီးလုံးဟာစိန်ဗေဒါရဲ့ အဿထိုရ် တီးလုံးဆိုတာလည်း မသိကြ။)

(၃)စာလုံးပေါင်းမှားတာပြင်ရန် (ဒါကကိစ္စမရှိ)

(၄) ကပြသူ ခင်၀င်းနွယ်ကအသက်ကြီးနေလို့ မူလ သြဘာသောင်း ကကွက်များကို အသက်ငယ်ငယ် တစ်ယောက်နှင့် အစားထိုး ပြင်ဆင်ရန်။ (အတော် စိတ်ပျက်ဖွယ်ကောင်းသည့်မှတ်ချက်ဖြစ်။ အကပညာရှင် ခင်၀င်းနွယ်ကိုယ်နှိုက်ကအသက် ၆၀ ၀န်းကျင်ပါ။ ဒီပညာရှင်ကဆက်ခံထိန်းသိမ်းခဲ့တဲ့ ကကွက်များကိုမှတ်တမ်းတင်တာပါ။ သူတို့မှာဒီကကွက်ဟာ သြဘာသောင်းကကွက်မှန် မဟုတ်ဘူး ဟုတ်တယ်ဆိုတာပဲ ထောက်ပြ၊ ငြင်းဆိုခွင့် ရှိပါတယ်။ ဒီလို ငြင်းဆို နိုင်လောက်အောင်လည်း ထောက်ပြသူများက သြဘာသောင်းဆိုတာကြားဖူးသူများပင်မဟုတ်။)

(၅) ဖြတ်တောက်သည့် အကွက်များ ဆီလျော်အောင် ပြန်ဆက် တည်းဖြတ်ပြီးမှ တင်ပြရန်။ (ဒါလည်းထားတော့) - ၁၄.၉.၂၀၁၀ - ဆင်ဆာအဖွဲ့၏ထောက်ပြချက်များကိုအကျိုးအကြောင်းခိုင်လုံစွာဖြင့် စာပြန်တင်။ - ၂၃.၉.၂၀၁၀ - ဆင်ဆာအဖွဲ့ကကဗျာလွတ်အကများအားလုံးဖြတ်ရန်ဆိုတဲ့ ညွှန်ကြားချက်နှင့် စာပြန်ထုတ်။ - ၂၅.၁၁.၂၀၁၀ - နေပြည်တော် ပြန်ကြားရေး၀န်ကြီးဌာနသို့ ဒါရိုက်တာ ဆူးငှက် ကိုယ်တိုင် သွားရောက် တင်ပြရာ ပြန်ကြားရေး၀န်ကြီး ဌာနမှ ညွှန်ချုပ် (ထို့နောက် ဒု၀န်ကြီး၊ နောက် ၀န်ကြီး) ကိုယ်တိုင် အကူအညီပေးပြီး ရုပ်ရှင်လုပ်ငန်း ညွှန်ချုပ်နှင့် တွေ့ဆုံစေကာ အခြေအနေများကို ရှင်းလင်းဆွေးနွေးနိုင်ခဲ့။ ညွှန်ချုပ် (နောက် ၀န်ကြီး) ကိုယ်တိုင် မိမိတို့ဘက်မှ မဖြစ်မနေ ဆောင်ရွက်ရန် အားပေးကူညီခဲ့။ (ပြန်ကြားရေး၀န်ကြီးဌာနက VCDအခွေအပေါ် အားရ ၀မ်းမြောက်စွာ ထောက်ခံသော်လည်း ယဉ်ကျေးမှု၀န်ကြီးဌာန ကိုယ်စားလှယ်များက ခါးခါးသီးသီး ကန့်ကွက်ကြကြောင်းသိရ။) - ၄.၁.၂၀၁၁ - ရန်ကုန်ရုပ်ရှင်လုပ်ငန်းဆင်ဆာအဖွဲ့သို့ သွားရောက်၍ညှိနှိုင်း - ၂၀.၂.၂၀၁၁ - ရန်ကုန် ရုပ်ရှင်လုပ်ငန်းဆင်ဆာအဖွဲ့တွင် အပြီးသတ်ညှိနှိုင်း။ ညွှန်ကြားရေးမှူး(ပြသ) ကိုယ်တိုင် အကူအညီပေးပြီး ယဉ်ကျေးမှု၀န်ကြီးဌာန၏ ကန့်ကွက်မှုအပေါ် ကျော်ဖြတ်နိုင်မည့် လမ်းကြောင်းအရ ဆင်ဆာတင်သည့်ခွေမှ စကားပြောနှင့် စာတမ်းများမှ ဒေါ်သြဘာသောင်း၏ ကဗျာလွတ်ကကွက်များ ဟူသောအပြောနှင့် စာသားများအစား ဒေါ်သြဘာသောင်း၏ အခြေခံအမျိုးသမီးကကွက်များဟု ပြင်ဆင်ပေးရန် ညှိနှိုင်းပြီးဆင်ဆာကတ် ထုတ်ခဲ့ရ။

×××× ×××× ×××× ×××× ××××

ဤ၀န်ကြီးဌာနကား မပြောင်းလဲသေး..။

ဆရာ ဆူးငှက် ၏ ဆောင်းပါးကို တိုက်ရိုက် ကူးယူဖော်ပြပါသည်။