ကျိုက်ကမာစိန်စေတီတော်

ကျိုက်ကမာစိန်စေတီတော် သည် ရန်ကုန်မြို့ အရှေ့ပိုင်း ပုဇွန်တောင်ရှိ ဘုရားဖြူကျောင်းတိုက်အတွင်းရှိ စေတီတော်တစ်ဆူ ဖြစ်သည်။

သမိုင်းကြောင်း

သာသနာနှစ် ၂၁၈ ခုနှစ်တွင် ဖြစ်၏။ ပါဋလိပုတ်ပြည်တွင် သီရိဓမ္မသောကမင်းကြီး စိုးစံနေ၏။ ထိုအချိန်တွင် ထီးပြိုင်နန်းပြိုင်ဖြစ်သည့် သထုံပြည် သီဟဒီပမင်းသည် အသောကမင်းထံမှ မြတ်စွာဘုရား၏ ဓာတ်တော်မွေတော်တို့ကို ပူဇော်ခွင့် ရခဲ့၏။ ထို့နောက် ထိုဓာတ်တော်များကို သူရဲကောင်းရှစ်ဦးတို့ကို ခွဲဝေပေးကာ စေတီတော်တည်စေရာ ကျိုက်ကမာစိန်စေတီတော် ပါဝင်ခဲ့သည်။

အမည်

စေတီတော် တည်ရှိရာ နေရာသည် ဆင်များရေသောက်သည့် နေရာဖြစ်သည်ကို စွဲကာ မွန်ဘာသာဖြင့် ကျိုက္ကမာစိန် ဟု သမုတ်ခဲ့သည်။ နှစ်ကာလ ကြာညောင်းလာသည့်အခါ စေတီတော်သည် ယိုယွင်းပျက်စီးလာခဲ့၏။ ထိုအခါ မထေရ်တစ်ပါးသည် ပုဇွန်တောင်ချောင်းအနီးရှိ ကမ်းပြိုသဖြင့် ပျက်စီးနေသည့် ရှေးဘုရားတစ်ဆူကိုပါ ပင့်ဆောင်၍ ကျိုက်ကမာစိန်စေတီတော်ကို ပြုပြင်ခဲ့သည်။

ဘုရားဖြူကျောင်းတိုက်

စေတီတော်အနီးတွင် သီတင်းသုံးတော်မူသည့် မန္တလေးမြို့ ၊ မိုးကောင်းကျောင်းတိုက် ဇီးပင်ကျောင်းဘုန်းတော်ကြီး ဦးကေလာသဘသည် စေတီတော်ကို ထုံးသင်္ကန်း ကပ်လှူခဲ့သည်။ ထိုသို့ ထုံးသင်္ကန်း လှူခဲ့သည့် အချိန်မှစကာ ဘုရားဖြူဟု ခေါ်ခဲ့သည်။ ထို့ပြင် ကျောင်းတိုက်ကိုလည်း ဘုရားဖြူကျောင်းတိုက်ဟု ခေါ်တွင်လာခဲ့ကြသည်။

ပြုပြင်ထိန်းသိမ်းမှုနှင့် ထီးတော်

• သက္ကရာဇ် ၁၂၆၄ ခုနှစ်၊ တော်သလင်း လပြည့်ကျော်နေ့တွင် ဦးပိုက်နှင့် မိသားစုသည် အလျားအနံ ပေ ၄၀၊ အမြင့် ၄၆ ပေရှိသည့် တန်ဆောင်းကို ဆောက်လုပ်လှူဒါန်းခဲ့သည်။
• ၁၃၁၈ ခုနှစ်တွင် အရှင်ပညာဝံသထေရ်သည် စေတီတော်ကို ပြုပြင်ခဲ့သည်။
• ၁၃၁၈ ခုနှစ်၊ သီတင်းကျွတ်လဆန်း ၁၄ ရက်နေ့တွင် ကြေးထီးတော်အသစ်ကို တင်လှူခဲ့သည်။