ကျိုတိုအပြည်ပြည်ဆိုင်ရာမန်ဂါပြတိုက်

ကျိုတိုအပြည်ပြည်ဆိုင်ရာမန်ဂါပြတိုက် (京都国際マンガミュージアム, Kyōto Kokusai Manga Myūjiamu) သည် ဂျပန်နိုင်ငံ၊ ကျိုတိုမြို့၊ နခဂယောရပ်ကွက်တွင် တည်ရှိသည့် ပြတိုက်တစ်ခု ဖြစ်သည်။ ၂၀၁၆ ခုနှစ်အချက်အလက်များအရ ပြတိုက်တွင် စုဆောင်းထားရှိသည့်ပစ္စည်းအရေအတွက်မှာ ခန့်မှန်းခြေ ၃၀၀,၀၀၀ ရှိပြီး မန်ဂါစာအုပ်ပေါင်း ၅၀,၀၀၀ ကို လာရောက်လည်ပတ်သူများ ရယူဖတ်ရှုနိုင်သည်။ အများပြည်သူကို ဖတ်ရှုခွင့်မပြုထားသည့်အရာများမှာ ၂၅၀,၀၀၀ ခန့် ရှိပြီးသည်။ စုဆောင်းထားရှိသည်များတွင် အဲဒိုခေတ်ကာလ သစ်သားတုံးများဖြင့် ပုံနှိပ်ထားသည်များ၊ စစ်မတိုင်မီမဂ္ဂဇင်းများ၊ စစ်ပြီးနောက် အငှားစိုက်အုပ်များ၊ ကမ္ဘာတလွှားထင်ရှားသည့် ခေတ်သစ်စီးရီးများ စသည်တို့ ပါဝင်သည်။

ကျိုတိုအပြည်ပြည်ဆိုင်ရာမန်ဂါပြတိုက် Kyoto International Manga Museum
တည်ထောင်ခြင်း	နိုဝင်ဘာ ၂၅၊ ၂၀၀၆ (၂၀၀၆-၁၁-၂၅)
တည်နေရာ	Kyoto, Japan
ကိုဩဒိနိတ်	35°00′42″N 135°45′33″E
အမျိုးအစား	Art museum, Library
စုဆောင်းထားမှုများ	Comics
စုဆောင်းပစ္စည်း အရေအတွက်	300,000 items (2015)
လည်ပတ်သူများ	290,000 (2016)
ညွှန်ကြားရေးမှူး	Hiroshi Aramata
ဝက်ဘ်ဆိုဒ်	kyotomm.jp/en/

ပြတိုက်သည် ကျိုတိုဆဲအိခတက္ကသိုလ်နှင့် ကျိုတိုမြို့တော်တို့ပူးပေါင်းထားသည့် အစိုးရနှင့်ပုဂ္ဂလိကပိုင်နှစ်မျိုးစပ် ပြတိုက်အမျိုးစားဖြစ်သည်။ မြို့တော်သည် အဆောက်အဦနှင့် မြေနေရာကို အထောက်အပံ့ပေးထားသည်။ တက္ကသိုလ်သည် ပြတိုက်တွင် အသုံးပြုသည့် အသုံးအဆောင်ပစ္စည်းများကို ထောက်ပံ့ထားသည်။ ပြတိုက်သည် မန်ဂါစာကြည့်တိုက်နှင့် အများပြည်သူအတွက် သမိုင်းဆိုင်ရာရင်းမြစ်တစ်ခုအနေဖြင့် လုပ်ဆောင်လျက်ရှိသည်။ ထို့အပြင် ကျိုတိုဆဲအိခတက္ကသိုလ်၏ မန်ဂါဆိုင်ရာသုတေသနစင်တာအနေဖြင့်လည်း အသုံးချလျက်ရှိသည်။

သမိုင်းကြောင်း

တဆွတ်အိခဲမူလတန်းကျောင်း

ကျိုတိုအပြည်ပြည်ဆိုင်ရာမန်ဂါပြတိုက်ဖွင့်လှစ်ထားသည့် အဆောက်အဦသည် ယခင်က တဆွတ်အိခဲမူလတန်းကျောင်း ဖြစ်ခဲ့သည်။ ပြတိုက်၏ ဝဘ်ဆိုက်တွင် အင်္ဂလိပ်ဘာသာစကားဖြင့် ဖော်ပြထားသည့် အချက်အလက်များမှာ အောက်ပါအတိုင်း ဖြစ်သည် -

တဆွတ်အိခဲမူလတန်းကျောင်း (ကျိုတိုအပြည်ပြည်ဆိုင်ရာမန်ဂါပြတိုက်သို့ ပြောင်းလဲခဲ့) ကို ၁၈၆၉ ခုနှစ်၊ နိုဝင်ဘာလ ၁ ရက်နေ့တွင် ခမိဂယောရပ်ကွက်၏ ၂၅ ခုမြောက် ဘန်းဂုမိရှောဂတ်ခိုး (ဒေသ၏မူလတန်းကျောင်း) အဖြစ် ဖွင့်လှစ်ခဲ့သည်။ ဤမူလတန်းကျောင်းသည် ကျိုတိုမြို့ရှိ ဒေသအခြေပြု မူလတန်းကျောင်း ၆၄ ခုထဲမှ တစ်ခု ဖြစ်သည်။ ဤကျောင်းသည် ဂျပန်နိုင်ငံတွင် ပညာရေးစနစ်အသစ်ကို မပြောင်းမီအချိန်အထိ သုံးနှစ်ကြာခဲ့သည်။ တဆွတ်အိခဲမူတန်းကျောင်းကို တည်ဆောက်ခဲ့စဉ်က ကျိုတိုစီရင်စုအစိုးရ၏ ခွင့်ပြုချက်မပါဘဲ တည်ဆောက်ခဲ့ခြင်း ဖြစ်သည်။ ကျောင်းကို တည်ဆောက်ရာတွင် ဒေသခံများ၏ လှူဒါန်းငွေဖြင့် တည်ဆောက်ခဲ့ခြင်း ဖြစ်သည်။ ကျောင်းကို တည်ထောင်ခဲ့သည့်အချိန်မှ စတင်ကာ ကျိုတိုမြို့၏ ပညာရေးစနစ်တွင် အဓိကကျသည့်အခန်းကဏ္ဍမှ ပါဝင်ခဲ့သည်။ သို့သော်လည်း မြို့လယ်တွင် နေထိုင်ရန် နေရာနည်းပါးလာခြင်းနှင့် မကြာသေးမီနှစ်များအတွင်း ကလေးအရေအတွက် နည်းပါးလာသည့်အတွကကြောင့် တဆွတ်အိခဲမူလတန်းကျောင်းကို အခြားသော ကျောင်းလေးခုဖြစ်သည့် အုမဲယ၊ ချစ်ခန်၊ ဖုယုနှင့် ခဆုဂ စသည့်ကျောင်းများနှင့်ပေါင်းကာ ၁၉၉၅ ခုနှစ်၊ ဧပြီလတွင် ဂေါ့ရှောမိနမိမူလတန်းကျောင်းသို့ ရွှေ့ပြောင်းခဲ့သည်။ မန်ဂါပြတိုက်ကို အဆောက်အဦသုံးခုဖြင့် ဖွဲ့စည်းထားသည်။ ပင်မအဆောက်အဦကို ၁၉၂၉ ခုနှစ်၊ မြောက်ဘက်အဆောက်အဦကို ၁၉၃၇ ခုနှစ်၊ အားကစားခန်းမကို ၁၉၂၈ ခုနှစ်တွင် တည်ဆောက်ခဲ့သည်။ ၎င်းအဆောက်အဦသုံးခုကို တစ်ခုနှင့်တစ်ခု ချိတ်ဆက်ထားသည့် ပုံစံသို့ ပြောင်းလဲခဲ့သည်။

ပြတိုက်တည်ထောင်ခြင်း

မန်ဂါပြတိုက်တစ်ခုတည်ထောင်ရန် အဆိုပြုမှုကို ကျိုတိုဆဲအိခတက္ကသိုလ်က ၂၀၀၃ ခုနှစ်၊ ဧပြီလတွင် ပြုလုပ်ခဲ့သည်။ ၂၀၀၄ ခုနှစ်၊ ဒီဇင်ဘာလတွင် ကျိုတိုမြို့တော်ဝန်က သတင်းစာရှင်းလင်းပွဲ၌ စီမံကိန်းစတင်မည်ဖြစ်ကြောင်း ကြေညာခဲ့သည်။ ၂၀၀၅ ခုနှစ်၊ အောက်တိုဘာလတွင် ကော်မတီသည် တဆွတ်အိခဲမူတန်းကျောင်းမြေကို ပြတိုက်အတွက် အသုံးပြုရန် အတည်ပြုခဲ့သည်။ ပြတိုက်၏ အမည်နှင့် လိုဂိုဒီဇိုင်းများကို ၂၀၀၆ ခုနှစ်၊ အောက်တိုဘာလတွင် ဆုံးဖြတ်ခဲ့ကြသည်။ များမကြာမီ ထိုနှစ် နိုဝင်ဘာလတွင် ပြတိုက်ကို ဖွင့်လှစ်ခဲ့ကြသည်။

ရရှိခဲ့သည့် ဆုများ

• ၂၀၀၈ ခုနှစ်၊ ဇန်နဝါရီလ - ယဉ်ကျေးမှုဝန်ကြီးဌာနက ပေးအပ်သည့် "Kansai Genki Bunkaken New Power Prize 2007" ကို ရရှိခဲ့သည်။
• ၂၀၀၉ ခုနှစ်၊ စက်တင်ဘာလ - "Kyoto Souzousha Taisho 2009" တွင် အနုပညာနှင့် ယဉ်ကျေးမှုဆိုင်ရာဆုကို ရရှိခဲ့သည်။
• ၂၀၁၂ ခုနှစ်၊ မေလ - ဂျပန်နိုင်ငံကာတွန်းပညာရှင်များအဖွဲ့အစည်းက ပေးအပ်သည့် ၄၁ ကြိမ်မြောက် ဆုတံဆိပ်ကို ရရှိခဲ့သည်။
• ၂၀၁၆ ခုနှစ်၊ မေလ - ၂၀ ကြိမ်မြောက် တဲဇုခအိုဆမုယဉ်ကျေးမှုဆိုင်ရာဆုတံဆိပ်ကို ရရှိခဲ့သည်။

ပြသထားသည်များ

ပြတိုက်ကို အများပြည်သူကြည့်ရှုနိုင်သည့် နေရာဇုံများခွဲခြားပြသထားသည်။ ရုပ်ပုံများပြခန်းဇုံကို အများပြည်သူကြည့်ရှုနိုင်ရန် ဖွင့်လှစ်ပေးထားပြီး အမြဲတမ်းနှင့် ယာယီပြခန်းများ ပါဝင်သည်။ ထို့အပြင် ပြတိုက်တွင် သုတေသနဇုံ၊ မော်ကွန်းတိုက်ထားရှိရာဇုံ၊ ဆက်သွယ်ပြန်ကြားရေးနေရာများ ပါရှိသည်။ ထို့အပြင် တဆွတ်အိခဲအမှတ်တရပြခန်း၊ လက်ဆောက်ပစ္စည်းဆိုင်နှင့် လက်ဖက်ရည်သောက်ခန်းများ ပါရှိသည်။ မန်ဂါများချိတ်ဆွဲထားသည့်နံရံများကို ကြည့်ရှုသူများသည် လွတ်လပ်စွာကြည့်ရှုနိုင်ကြပြီး ပြတိုက်တွင်စုဆောင်းထားရှိသည့် အဓိကလက်ရာများကို ပြသထားသည်။ ၎င်းတွင် ၁၉၇၀ ခုနှစ်မှစတင်ထုတ်ဝေထားသည့်လက်ရာများ ၅၀,၀၀၀ ခန့် ပြသထားသည်။ ထိုပြသထားသည်များထဲမှအများစုသည် အိုခုဘိုနဲဂိရှိအငှားစာအုပ်တိုက်မှ လှူဒါန်းထားရှိသည်များမှာ အများစု ဖြစ်သည်။ မန်ဂါများချိတ်ဆွဲထားသည့်နံရံများကို အလွှာများဖြင့် ပိုင်းခြားထားပြီး ပထမထပ်တွင် "ရှောအန်းမန်ဂါ"၊ ဒုတိယထပ်တွင် "ရှောဂျောမန်ဂါ"၊ တတိယထပ်တွင် "ဆဲနန်းမန်ဂါ" စသည်တို့ ပြသထားသည်။ ထို့အပြင် ပြတိုက်တွင် ရုပ်ပြစာအုပ် ၃,၀၀၀ ခန့်ပါဝင်သည့် ကလေးစာကြည့်တိုက်တစ်ခုလည်း ရှိသည်။