ကျုံးဝန်ဘုမ္မဇေယျ

ကျုံးဝန် ဘုမ္မဇေယျ

မြန်မာနိုင်ငံ တဝှန်းလုံးတွင် မနုကျယ်ဓမ္မသတ် သို့မဟုတ် မနုရသေ့ ဖြတ်ထုံးဆိုလျှင် ယောက်ျား မိန်းမမရွေး မကြားဘူး သူ မရှိသလောက်ပင် ဖြစ်သည်။ ဤမျှ ထင်ရှားကျော်စောသော ဓမ္မသတ်ကျမ်းကြီးကို မြန်မာဂန္ဓဝင်သို့ သွတ်သွင်းပေးခဲ့သူမှာ ကျုံးဝန်ဘုမ္မဇေယျ အမတ်ကြီးပင် ဖြစ်သည်။

ရတနာသိင်္ဃကုန်းဘောင်မြို့တည် အလောင်းမင်းတရားကြီး လက်ထက်တော်တွင် စိန္ဒကျော်သူဦးဩ၊ ရှင်လင်္ကာသာရ၊ မကာရလောပခင်ကြီးဖျော် စသောပညာ ရှိများသာမက တရားသူကြီး လက်ဝဲဘိနန်သူ၊ အတုလဆရာတော်နှင့် ကျုံးဝန် ဘုမ္မဇေယ အမည်ရှိသော ဥပဒေပါရဂူကြီးများလည်း ပေါ်ထွန်းခဲ့သည်။ တရားသူကြီး လက်ဝဲဘိနန်သူက ဓမ္မဝိနိစ္ဆယ ဥပဒေကျမ်းကို ပြုစုခဲ့၍ အတုလဆရာတော်က ဘုရင်၏တောင်းပန်ချက်အရ ၁ဝ နှစ် တိုင်တိုင် ခက်ခဲနက်နဲသော အမှုအခင်းများကို အဆုံးအဖြတ်ပေးခဲ့သည်။ ကျုံးဝန်ဘုမ္မဇေယျကမူ ဟိန္ဒူလူမျိုးတို့ ရှေးဟောင်းကျမ်းဂန်ကြီးများအနက် တစ်ခုအပါအဝင်ဖြစ်သော မနုကျမ်းရင်း ၁ဝ တွဲကို ပါဠိဘာသာမှ မြန်မာစကားပြေသက်သက်ဖြင့် ၁၈ ပိုင်းပိုင်းကာ မနုကျယ် ဓမ္မသတ်ဟူ၍ ပြန်ဆိုရေးသားခဲ့လေသည်။ ဤပညာရှိကြီး၏မျိုးရိုးဇာတိနှင့် ဖွားသက္ကရာဇ်တို့ကို ဂနသေချာစွာ မတွေ့ရှိရ သေးသော်လည်း၊ အမတ်ကြီးသည် အလောင်းမင်းတရားကြီး လက်ထက်၌ ကျုံးဝန်ဘုမ္မဇေယျဘွဲ့နှင့် မဟာသီရိဥတ္တမ ဇေယျသင်္ကြံဟူသောဘွဲ ၂ ဆင့်ကို အပ်နှင်းခြင်း ခံရကြောင်း ကိုကား သိရှိရသည်။

ဤမနုကျယ်ကျမ်းမှာ ဓမ္မသတ်ကျမ်း တစ်စောင် အနေဖြင့်သာ မဟုတ်ဘဲ၊ မြန်မာစကားပြေကျမ်းတစ်ခု အနေဖြင့်လည်း ဖတ်ရှုလေ့လာနိုင်သဖြင့်၊ ကျမ်းပြုပုဂ္ဂိုလ် ကျုံးဝန်ဘုမ္မဇေယျအား ကျေးဇူးတင်ထိုက်လှပေသည်။