ဆယ့်နှစ်ရာသီဖွဲ့ သဖြန်လေးဆစ်

ဆယ့်နှစ်ရာသီဖွဲ့ သဖြန်လေးဆစ် ၁၂ပုဒ်ကို ဖိုးသူတော်ဦးမင်းက ရေးသားခဲ့သည်။

တန်ခူးလ

ဟောင်းရွက်ညှာခါလှစ်လို့၊

တာသစ်ကယ်တဲ့ နံ့ကြိုင်၊

သုတ်ဖြူးလေဆော်က၊

ပန်းကံ့ကော် ဝတ်မှုံကျင်း၊

သင်းပျံ့လို့ လှိုင်၊

ကြယ်နှစ်ပြိုင်၊ စိတြငယ်နှင့်၊

ငွေလသော်တာတို့၊

ယုဂန်ချာ တောင်တော်စွန်းမှာ၊

ထွန်းထိန်လို့လင်း။

ကဆုန်လ

စကားဝါငုံ သင်းလို့၊

ကြယ်မင်းတဲ့ ဝိသာခါ၊

တိမ်ဗွေမှာ ရောင်ခြည်ရွှန်း၊

ထွန်းတဲ့ချိန်ခါ၊

စုံကန္တာ၊ ဟေမာမြိုင်ထဲ၊

ရွှေကျေး ပျံသင်လို့၊

စံပျော်ရွှင် သည်ဟိုကူးလို့ငယ်၊

မြူးကြစမြဲ။

နယုန်လ

ရွှေစာတော် ပြန်မေးလို့၊

မြတ်လေးတဲ့ စံပယ်၊

မေထုန်ဆို ရာသီကူး၊

ပွင့်ဖူးဝတ်မှုံနံ့၊

သင်းပျံ့တော့တယ်၊

ကောင်းကင်လယ်၊

ထက်ဝယ်ဘုံက၊

ဇေဋ္ဌရွှေကြယ်မင်းငယ်၊

လင်းတဲ့ချိန်ပ။

ဝါဆိုလ

ပြုနိဗ္ဗာန်သန်ကြယ် ထွန်းလို့၊

လဝန်းတဲ့ သော်တာ၊

သည်ချိန်ကို ယုဂန်ဖျားက၊

နှစ်ပါးရောင်ခြည်ဆိုက်၊

လင်းခိုက်မို့သာ၊

ရနံ့ငယ်ဖြာ၊

ညှာတံက ငုံဖူး၊

ပုန်းညက်ကယ်ခိုင်ပင်မင်းက၊

သင်းပျံ့ပျံ့ကြူး။

ဝါခေါင်လ

ထက်အာကာ ဘုံစွန်းက၊

တောက်ထွန်းလို့ ထိန်ဝါ၊

သရဝဏ် ရွှေကြယ်မင်း၊

လင်းတဲ့ချိန်ခါ၊

လေညှင်းငယ်သာ၊ သိဟ်ရာသီခို၊

ရှတိုင်းငယ် ဘယ်ညာက၊

ပန်းခတ္တာ ဝတ်မှုံကျင်းတယ်၊

သင်းပျံ့လှိုင်လို့။

တော်သလင်းလ

ကန်ရာသီ ချိန်တွင်းခို၊

ရွှေယင်းတဲ့ မာငုံ၊

မြိုင်ဟေမာ သာနန်းက၊

သုတ်ဖျန်းလေယူဖြင့်၊

သင်းပျံ့ပျံ့လုံ၊

တိမ်စွန်ဘုံ၊ ရောင်စုံလျှံပ၊

လမင်းသော်တာနှင့်၊

အဗဒ္ဒါဆို ရွှေကျီးငယ်၊

နီးသည့်ကာလ။

သီတင်းကျွတ်လ

ကြာငါးမည် ကြိုင်သင်းလို့၊

လျှံဝင်းတဲ့ ပြောင်ထိန်၊

ရွှေနန်းတောင်တော်ဦးမှာလ၊

ကွန့်မြူးမြင်းမိုရ်မီး၊

ညီးတဲ့ခါချိန်၊

ရှိခိုးငယ်နှိမ်၊

သုံးကြိုင်ရိုပျောင်း၊

သက္ကစ္စဂါရဝါနှင့်၊

စဉ်အလာ ပူဇော်ပွဲကို

ခဲကြပေတောင်း။

တန်ဆောင်မုန်းလ

လှူကထိန် သင်္ကန်းနှင့်၊

မဂ်လမ်းတဲ့ ဆုပန်ရွယ်၊

သည်ချိန်ကို ဝတ်မှုံကြဲလို့၊

ခဝဲရွှေညှာရင်းမှာ၊ သင်းရနံ့ကြွယ်၊

ကောင်းကင်လယ်၊

ထက်ဝယ်ဘုံဦး၊

ရွှေလစန္ဒာနှင့်၊

ကြတ္တိကာ ကြယ်ရောင်စွန်းတယ်၊

ထွန်းထိန်လို့မြူး။

နတ်တော်လ

ရှစ်ခွင်ကို မြူဆင်လို့၊

ငွေနှင်းတဲ့နုစို၊

ဂမုန်းသဇင်တို့၊

စုံခွင်မှာ လေချိုညှင်းက၊

သုတ်သွင်း ဘယ်ညာနှံ့၊

သင်းပျံ့ပျံ့ချို၊

ယုဂန္ဓိုရ်၊ တောင်မိုထိပ်ဖျား၊

ရွှေလစန္ဒီနှင့်၊

ဓိပထီရောင်ခြည်ဖျန်းတယ်၊

မြန်းတူကြွသွား။

ပြာသိုလ

ငွေသော်တာ စန္ဒနှင့်၊

ဖုသျှတဲ့ လမ်းဆုံ၊

တိမ်လွှာမှာ ရွှေဝါကျင်းလို့၊

နှစ်မင်းတူပြိုင်ပ၊

မြန်းကြွခိုက်ကြုံ၊

ဘရက်ဂုဏ်၊ မြိုင်စုံမြနန်း၊

နုစိမ်းစိုစိုနှင့်၊

ပန်းခွာညို ငုံတံထူးတယ်၊

ဖူးပွင့်ချက်ဆန်း။

တပို့တွဲလ

ရာသီချိန်ခါရောက်လို့၊

လဲပေါက်ကယ်ပွင့်ညီ၊

ရွှေဖီနံ့သာနှင့်၊

ခြောက်ရောင်ဝါ စေတီရင်းမှာလ၊

ဆယ်စင်းလက်စုံပူး၊

ဦးမြှောက်လို့ချီ၊

ငွေနှင်းရယ်စီ၊

သုံးလီသမယ၊

ယူဇနာမြင့်မြတ်ကယ် သင်္ချာနှင့်၊

ယုဂန်ညာတောင်တော်စွန်းမှာ၊

ထွန်းလိမ့်မာဃ။

တပေါင်းလ

ပန်းရွှေဖီကြိုင်လျှောက်လို့၊

ပိတောက်ကယ်တဲ့သင်းချို၊

ဥတ္တရာဘရဂုဏ်က၊

တိမ်ဘုံမှာ ရောင်ခြည်လင်းလို့၊

လမင်းသော်တာနှင့်၊

တူမကွာထိန်ဝါလင်းတဲ့၊ ထွန်းတဲ့ခါကို၊

သောင်သဲငယ်မို၊ ရေညိုရစ်မို့၊

လေညှင်းဝယ်လာ၊

စုံဟေမာမြိုင်ထဲက၊ ဝမ်းပဲရွှေစင်ရော်ကို၊

ဖော်ခေါ်သံ မောင်မယ်ကျူးတယ်၊

မြူးပျော်ကြလို့။