ဆာဂေး ဘရင်

၁၉၇၃ ဩဂုတ် ၂၁ နေ့တွင် မွေးဖွားသူ ဆာဂေး မီခေးလိုဗစ် ဘရင် သည် ရှရှား-အမေရိကန်လူမျိုး ကွန်ပျူတာ သိပ္ပံပညာရှင်၊ စက်မှုလုပ်ငန်းရှင်တဦးဖြစ်ပြီး အင်တာနက်အသုံးပြု ရှာဖွေရေးနှင့် ကုန်ပစ္စည်းကြော်ငြာခြင်းလုပ်ငန်း အဓိကလုပ်ကိုင်သည့် ကမ္ဘာ့ အကြီးဆုံးအင်တာနက်ကုမ္ပဏီ Google Inc. ကို လယ်ရီပေ့ချ် နှင့် အတူတည်ထောင်ခဲ့သည်။

ဆာဂေး ဘရင်
မွေးသက္ကရာဇ်	၂၁ ဩဂုတ်၊ ၁၉၇၃ မော်စကို၊RSFSR၊ဆိုဗီယက်ယူနီယံ
နိုင်ငံသား	အမေရိကန်
ပညာရေး	မာရီလန်း တက္ကသိုလ် စတန်းဖို့ဒ် တက္ကသိုလ်
အလုပ်အကိုင်	Google ကို ပူးတွဲတည်ထောင်သူ
ကြွယ်ဝမှု	အမေရိကန်ဒေါ်လာ ၁၅ဘီလျံ
ကြင်ဖော်	Anne Wojcicki
ဝက်ဘ်ဆိုက်	stanford.edu/~sergey

အသက် ၆ နှစ်တွင် ဆိုဗီယက်ပြည်ထောင်စုမှတဆင့် အမေရိကန်ပြည်ထောင်စုသို့ ပြောင်းရွှေ့အခြေချခဲ့သည်။ ကောလိပ်ကျောင်းသားဘဝကို မယ်ရီလန်းတက္ကသိုလ်၌ တက်ရောက်ခဲ့ပြီး ဘွဲ့မရခင်ကပင် အလုပ်လုပ်ပြီး ဝင်ငွေရှာခဲ့သည်။ သူ့အဖိုးနှင့်အဖေတို့ကဲ့သို့ပင် သင်္ချာပညာနှင့် ကွန်ပျူတာသိပ္ပံပညာရပ်တွင် အထူးပြုဘာသာရပ်နှစ်ခုဖြင့် တက်ရောက်ခဲ့သည်။ မယ်ရီလန်း တက္ကသိုလ်တွင် ဘွဲ့ရပြီးနောက် ကွန်ပျူတာသိပ္ပံပညာတွင် ပါရဂူဘွဲ့ယူရန်အတွက် စတန်းဖို့ဒ် တက္ကသိုလ်သို့ ပြောင်းရွေ့ခဲ့သည်။ စတန်းဖို့ဒ်တက္ကသိုလ် တွင် လယ်ရီပေ့ချ် နဲ့စတင်တွေ့ဆုံခဲ့သည်။ သူတို့ အဆောင်အခန်းတွင်းတွင် ဈေးပေါသော ကွန်ပျူတာများကို ပြည့်ကျပ်နေအောင်ထည့်ထားပြီး အစွမ်းထက်ရှာဖွေရေးလုပ်နိုင်သည့်စက်ကို တည်ဆောက်ရန် ဘရင်၏ အချက်အလက် ရှာဖွေရေးစနစ်ကို အသုံးပြုခဲ့သည်။ ထိုတီထွင်မှုသည် စတန်ဖို့ဒ်တက္ကသိုလ်၌ လူသိများလာခဲ့ပြီး နောင်တွင်နာမည် ကျော်ကြားလာမည့် search engine တခုဖြစ်သော Google ကို ငှားရမ်းထားသော ကားဂိုဒေါင်ကြီးထဲတွင် ဆက်လက်တီထွင် နိုင်ရန် သူတို့၏ ပါရဂူဘွဲ့အတွက် လေ့လာမှုများကို ခေတ္တရပ်နားထားခဲ့သည်။

နာမည်ကျော် The Economist Magazine က ဘရင် အား အသိအမြင်ကြွယ်ဝစေသော လူတယောက်အဖြစ် ရည်ညွန်း ပြောဆိုခဲ့ပြီး “ကမ္ဘာ အချက်အလက်များအားလုံးကို ပြုလုပ်ပေးထားခြင်းဖြင့် နေရာမရွေး၊ အချိန်မရွေး၊ လူတိုင်း သုံးရလွယ်ကူပြီး အသုံးတည့်စေရမယ်” ဟူသော Google ၏ဆောင်ပုဒ်အပေါ်တွင် သုံးသပ်ပြီး ပေါ်ထွက်လာတဲ့ “အသိပညာ ဗဟုသုတရှိခြင်းက အမြဲတစေကောင်းမွန်ပြီး၊ မသိနားမလည်မှုထက် ကျိန်းသေပိုမိုကောင်းမွန်သောအရာ ဖြစ်သည်“ ဟူသော အယူအဆကို လက်ခံယုံကြည်သူ တယောက်ဖြစ်ကြောင်း ထုတ်ဖော်ပြောကြားခဲ့သည်။

ငယ်ဘဝနှင့် ပညာရေး

ဆာဂေး ဘရင် ကို ဆိုဗီယက်ပြည်ထောင်စုရှိ မော်စကိုမြို့တွင် ဂျူးလူမျိုး မိဘ နှစ်ပါးမှ မွေးဖွားခဲ့သည်။ အဖေ Michael ဘရင် မှာ Maryland တက္ကသိုလ် မှ သင်္ချာပါမောက္ခတစ်ဦး ဖြစ်ပြီး အမေ ယူဂျင်နီယားဘရင် မှာ NASA ရှိ Goddard Space Flight Center မှ သိပ္ပံပညာရှင်သုတေသီတဦး ဖြစ်သည်။ နှစ်ယောက်လုံးသည် မော်စကိုတက္ကသိုလ်တွင် ဘွဲ့ရခဲ့သူများ ဖြစ်ကြသည်။

ဆိုဗီယက် ယူနီယံရှိ ငယ်ဘဝ

၁၉၇၉ တွင် ဘရင် အသက် ၆ နှစ်အရွယ်တွင် သူ့မိသားစုသည် အမေရိကန် နိုင်ငံတွင် မဖြစ်မနေ အခြေချနေထိုင်ရမည့် အခြေအနေကို ကြုံတွေ့ခဲ့ရသည်။ The Google Story (၁၀) စာအုပ်ရေးသူ Mark Malseed နှင့် တွေ့ဆုံမေးမြန်းခန်းတွင် ဆာဂေး ၏ အဖေက ကောလိပ်ကျောင်းတောင်မတက်ရောက်ခဲ့ရပဲ နက္ခတ္တဗေဒပညာရှင်တယောက်ဖြစ်ဖို့ဆိုတဲ့ သူ့အိပ်မက်ကို စွန့်လွတ်ဖို့အတင်းအကျပ် တိုက်တွန်းခံခဲ့ရကြောင်းကို ရှင်းလင်းပြောကြားခဲ့တယ်။

ဆိုဗီယက်ပြည်ထောင်စုမှာ ဂျူးလူမျိုးမုန်းတီးရေးဝါဒ မရှိသော်လည်း၊ ဘရင် က“ကွန်မြူနစ်ပါတီ ခေါင်းဆောင် တွေက ဂျူးလူမျိုးတွေရဲ့ တက္ကသိုလ် ဝင်ခွင့်တွေကို ပိတ်ပင်ခြင်းအားဖြင့် အထက်တန်းကျတဲ့ ကျွမ်းကျင်ပညာရှင်အဆင့်တွေကို မရောက်အောင် ဟန့်တားပိတ်ပင်ထားတယ်” လို့အခိုင်အမာ ပြောဆိုခဲ့သည်။ “အထူးသဖြင့် ဂျူးတွေဟာ ရူပဗေဒ ဌာနကနေ ဖယ်ထုတ်ချန်လှပ်ထားခြင်း ခံရတယ်“။ ထို့ကြောင့် Micheal ဘရင် သည် သူ့အဓိကဘာသာရပ်ကို နောင်တွင်၎င်း ထူးထူးချွန်ချွန် အောင်မြင်ခဲ့သည့် သင်္ခချာဘာသာ သို့ပြောင်းလဲခဲ့သည်။

သူက “ငါက ဂျူးလူမျိုးတယောက်ဖြစ်နေလို့ ငါ့ကို ဘွဲ့လွန်သင်တန်းတက်ခိုင်းဖို့ ဘယ်သူမှ စဉ်းစားပေးမှာမဟုတ်ဘူး” လို့ပြောခဲ့သည်။ ဘရင် ၏ မိသားစုသည် မော်စကိုမြို့လယ်ရှိ အခန်း ၃ ခန်းပါ မီတာ ၃ဝ ပတ်လည် (ပေ ၃၅ဝ ပတ်လည်) ကျယ်ဝန်းသော အခန်းတွင် အဖေဘက်က အဖွားဖြစ်သူနှင့် အတူနေထိုင်ခဲ့ကြသည်။

ဆာဂေး က မော်စီ ကို ဒီလိုပြောပြခဲ့တယ်။ “ငါ့အဖေက သူ့လုပ်ချင်တဲ့အသက်မွေးဝမ်းကျောင်းအလုပ်ကို ဆက်မလုပ်နိုင်တော့ဘူးဆိုတာ ငါသိခဲ့တာ ကြာပြီ။” ဒါပေမဲ့ ဆာဂေး က အမေရိကန်မှာ အခြေချနေထိုင် ခဲ့ပြီးနောက် နှစ်အတော်ကြာပြီးမှ အသေးစိတ်ထုတ်ဖော် ပြောကြားခဲ့သည်။ သူ့အဖေ ၁၉၇၇ ပိုလန်နိုင်ငံ၊ ဝါစောမြို့မှာ သင်္ချာပညာရပ်ဆိုင်ရာ အစည်းအဝေးသွားတက်ပြီး ပြန်လာတဲ့အခါမှာ သူကောင်းကောင်းသဘောပေါက်သွားခဲ့တယ်။ သူအဖေက ဒီအချိန်က သူတို့မိသားစု အခြား တနိုင်ငံမှာ သွားရောက်အခြေချနေထိုင်ဖို့အချိန်ရောက်ပြီ ဆိုတာကို ထုတ်ဖော်ပြောကြားခဲ့တယ်။

ငါတို့ဒီနေရာမှ ဆက်ပြီးမနေနိုင်တော့ဘူးလို့သူ့ဇနီးနဲ့ သူ့အမေကို ပြောကြားခဲ့တယ်။ အစည်းအဝေးပွဲမှာ အမေရိကန်၊ ပြင်သစ်၊ အင်္ဂလန်၊ ဂျာမနီ စတဲ့နိုင်ငံတွေက လုပ်ဖော်ကိုင်ဖက်တွေနဲ့လွတ်လွတ်လပ်လပ် ရောနှော နေထိုင်ခဲ့ပြီး သိခဲ့ရတာကတော့ သူရဲ့ပညာရှင်လုပ်ဖော်ကိုင်ဖက်တွေဟာ လူဆိုးတွေမဟုတ်ကြ ဘူးဆိုတာပဲ။“ ဒီကနေထွက်ခွာသွားဖို့အရမ်းအရေးကြီးတယ်လို့ဆုံးဖြတ်ခဲ့တဲ့လူက မိသားစုထဲမှာ ငါတယောက်ပဲရှိတယ်” လို့ သူကထပ်ပြီးတော့ ပြောကြားခဲ့တယ်။

ဆာဂေး ၏ မိခင်ကတော့ သူတို့ဘဝတလျှောက်လုံးနေထိုင်ခဲ့တဲ့ မော်စကိုက သူ့အိမ်ကနေ မထွက်ခွာသွားချင်ဘူး ဖြစ်နေတယ်။ “ဂျန်နီယာ အနေနဲ့ကတော့ .. နောက်ဆုံးမှာတော့ ဒီဆုံးဖြတ်ချက်က ဆာဂေး ဆီကိုရောက်လာတယ်။ သူမ ယောက်ျားကတော့ သူရဲ့အနာဂတ်အတွက် စဉ်းစားသလို သူ့သားရဲ့ အနာဂတ်အတွက်လဲစဉ်းစားခဲ့တယ်ဆို တဲ့အကြောင်းကို ဝန်ခံခဲ့တယ်။ သူမအတွက် ကတော့ ဆာဂေးဟာ အဓိက အရေးပါတဲ့သူတစ်ယောက်ပါဘဲ” လို့ မော်စီ က ရေးသားထားခဲ့တယ်။

သူတို့ထွက်ခွာခွင့်အတွက် ဗီဇာကို ၁၉၇၈ စက်တင်ဘာမှာ တရားဝင် လျှောက်ထားခဲ့ကြတယ်။ ရလဒ် အနေကတော့ သူ့ အဖေ အလုပ်ပြုတ်သွားတာပဲ ဖြစ်တယ်။ ဒီကိစ္စနဲ့ပက်သက်ပြီးတော့ သူ့အမေလဲ အလုပ်ကနေ ထွက်ခဲ့ရတယ်။ နောက် ၆ လကြာပြီးနောက် ပုံမှန် ဝင်ငွေမရှိတဲ့အတွက် သူတို့စောင့်နေတဲ့အချိန်မှာ အချိန်ပိုင်းအလုပ်တွေကို မဖြစ်မနေ လုပ်ခဲ့ရတယ်။ ဆိုဗီယက်ယူနီယံက ဂျူးလူမျိုးတွေဖြစ်အတွက် ခိုလှုံခွင့် ငြင်းပယ်ခံရမှာကို ကြောက်ကြောက်နဲ့ပဲ စောင့် နေခဲ့ကြတယ်။

ထိုအချိန်အတွင်းမှာ သူ့မိဘတွေဟာ သူ့ကို ပြုစုစောင့်ရှောက်ဖို့တာဝန်ကို ခွဲဝေယူခဲ့ကြပြီး သူအဖေ က ကွန်ပြူတာ Programming ပညာကို သင်ယူခဲ့တယ်။ ၁၉၇၉ မေလမှာ သူတို့ တရားဝင် ထွက်ခွာခွင့်ဗီဇာကျခဲ့ပြီး သူတို့ ရှရှားနိုင်ငံကနေ ထွက်ခွာခဲ့ကြတယ်။ ၂၀၀၈ အောက်တိုဘာ တွေ့ဆုံမေးမြန်းခန်းတခုမှာ ဘရင် က “ ကျွန်တော့် မိဘတွေ ဒီကိုထွက်ခွာလာခဲ့ပြီးနောက်မှာ အရမ်းခက် ခဲတဲ့အချိန်တွေရှိခဲ့တယ်ဆိုတာ ကျွန်တော် သိတယ်။ ပြီးတော့ ကျွန်တော့်ကို အမေရိကန်ပြည်ထောင်စုကို ခေါ်ဆောင်လာခဲ့တဲ့အတွက် အရမ်းကျေးဇူးတင်တယ်” လို့ပြောကြားခဲ့တယ်။

ဆယ်စုနှစ်တခုကြာပြီးနောက်မှာ ၁၉၉ဝ နွေရာသီ ဆာဂေး ရဲ့ ၁၇ နှစ်မြောက်မွေးနေ့ အပြီး ရက်သတ္တပတ် အနည်းငယ် အကြာမှာ သူ့အဖေက သူ့သား ဆာဂေး အပါအဝင် ပင်ကိုစွမ်းရည်ရှိပြီး တော်တဲ့ အထက်တန်းကျောင်းက သင်္ချာကျောင်းသားတစုနဲ့ ဆိုဗီယက်နိုင်ငံကို နှစ်ပတ်ကြာသွားရောက်တဲ့ အစီအစဉ်ကို ဦးဆောင်သွားရောက်ခဲ့တယ်။ “ဒီခရီးက သူ ငယ်စဉ်က အာဏာပိုင်တွေကို ကြောက်ရွံ့ခဲ့ရတာတွေကို ပြန်လည်နှိုးကြားအမှတ်ရစေခဲ့တယ်။ ပြီးတော့ ဆိုဗီယက်တွေရဲ့ဖိနိုပ်ချုပ်ချယ်မှုကို ထိပ်တိုက်ရင်ဆိုင်ချင်တဲ့ ဒေါသစိတ်နဲ့ရဲကားကို ကျောက်ခဲနဲ့ ကောက်ပေါက် ခဲ့တာကို ပြန်သတိရစေတယ်။”

မော်စီ က ထပ်ပြီး ပြောကြားခဲ့တယ်။ “ခရီးစဉ် ဒုတိယနေ့မှာမော်စကို အနီးရှိ ဒေသတခုက နာလန်ထရောဂါသည်တွေ၊ နာတာရှည်ရောဂါသည် တွေကို ထားရှိကုသတဲ့ဆေးခန်းကို သွားရောက်စဉ်မှာ ဆာဂေး က ရုတ်တရက်သူ့အဖေနားကပ်ပြီး သူ့အဖေကို တည့်တည့်စိုက်ကြည့်ပြီးတော့ ”ကျွန်တော်တို့အားလုံးကို ရုရှားကနေ ခေါ်ထုတ်သွားခဲ့တဲ့အတွက် ကျေးဇူးအများကြီးတင်ပါတယ်” လို့ပြောခဲ့တယ်။

အမေရိကားရောက် ပညာရေး

အတန်းပညာကို မယ်ရီလန်း ရှိ Paint Branch Montessori School တွင် တက်ရောက်သင်ကြား ခဲ့သော် လည်း နောက်ပိုင်း အတန်းပညာကို မယ်ရီလန်း တက္ကသိုလ် မှ သင်္ချာ ပါမောက္ခဖြစ်သူ အဖေက အိမ်တွင်သင် ကြားပေးခဲ့ပြီး သူစိတ်ဝင်စားသော သင်္ချာပညာလည်းကို ပျိုးထောင်သင်ကြားပေး ခဲ့သည်။ ရှရှား ဘာသာ စကားနှင့် ပက်သက်ပြီး သူ့မိသားစုက သင်ကြား ပေးခဲ့ သည်။ ၁၉၉ဝ စက်တင်ဘာတွင် မယ်ရီလန်း၊ ဂရင်းဘဲ့လ် ရှိ Eleanor Roosevelt High School တွင် တက်ရောက်ခဲ့ပြီးနောက် ပါ့ခ်ကောလိပ်၊ မယ်ရီလန်း တက္ကသိုလ် တွင် စာရင်းပေး သွင်းခဲ့သည်။ ထိုကျောင်း ၌ ၁၉၉၃ မေတွင် သင်္ချာနှင့်ကွန်ပျူတာ သိပ္ပံ ဘာသာရပ်တွင် B.Sc ဘွဲ့ကို ဂုဏ်ထူးဖြင့် ရရှိခဲ့သည်။

ဘရင် သည် ကွန်ပျူတာ သိပ္ပံ ဘာသာရပ် ၌ ဘွဲ့လွန်လေ့လာမှုကို စတန်းဖို့ဒ် တက္ကသိုလ် ရှိ အမျိုးသား သိပ္ပံဖောင်ဒေးရှင်း မှ ဘွဲ့လွန်ကျောင်းသားများအဖွဲ့အစည်းတွင် စတင်လေ့လာခဲ့သည်။ ၁၉၉၃ တွင် သင်္ချာဘာသာရပ်နှင့် ပက်သက်သည့် သုတေသနလုပ်ငန်းများ ပြုလုပ်သည့် ဝေါ်လ်ဖရမ် သုတေသနဌာနတွင် အလုပ်သင်အဖြစ်ဝင်ရောက် လုပ်ကိုင်ခဲ့သည်။ သူသည် စတန်းဖို့ဒ်တက္ကသိုလ် ရှိ ပါရဂူ ဘွဲ့အတွက်လေ့လာမှုသင်ယူနေဆဲမှ ခေတ္တခဏ ခွင့်ယူပြီး လုပ်ကိုင်ခြင်းဖြစ် သည်။ 1995 ဩဂုတ်လတွင် မဟာဘွဲ့ကိုရရှိခဲ့ပြီး Ph.D ဘွဲ့အတွက်ဆက်လက် လေ့လာခွင့်ရသည်။ Standford တွင် ပါရဂူတန်း (Doctoral Program) အတွက် စာရင်းသွင်းထားသော်လည်း Google တွင် အလုပ်လုပ်တော့ဖြစ်၍ Ph.D အတွက် လေ့လာမှုကို ရွှေ့ဆိုင်းထားသည်။ Instituto de Empresa မှလည်း ဂုဏ်ထူးဆောင် MBA ဘွဲ့ကို Sergey ရရှိခဲ့သေးသည်။

Sergey နှင့် IT

Sergey သည် စတန်းဖို့ တက္ကသိုလ်မှာ ပညာဆည်းပူးနေစဉ်ကတည်းက အင်တာနက်အပေါ် စိတ်ဝင်စားမှုများ ရှိခဲ့သည်။ Data-Mining နှင့် Pattern Extration အကြောင်း Paper အမျိုးမျိုးကို တစ်ယောက်တည်းရော၊ သူများနှင့်ပါတွဲဖက်၍ပါ ရေးသားခဲ့သည်။

Sergey သည် သိပ္ပံဘာသာရပ် Paper များ Process အတွက် လွယ်ကူစေမည့် ဆော့ဖ်ဝဲကိုလည်း TeX, a text processing language နှင့် HTML Form ထဲမှာ ရေးသားခဲ့သည်။ Film Rating အတွက် ဝက်ဘ်ဆိုက်တစ်ခုကိုလည်း ရေးခဲ့သေးသည်။

Sergey အတွက် အရေးအကြီးဆုံး အချိန်သည် Google ၏ ပူးတွဲဥက္ကဋ္ဌဖြစ်လာမည့် Larry page နှင့် တွေ့ဆုံခဲ့သည့်အချိန်ဖြစ်သည်။ Google Lore အရဆိုလျှင် Page နှင့် Brin တို့ ၁၉၉၅ တွင် ကွန်ပျူတာသိပ္ပံဘာသာရပ်နှင့် Stanford တက္ကသိုလ်တွင် ပထမဆုံး စတင်တွေ့ဆုံစဉ်က တစ်ဦးနှင့်တစ်ဦး သိပ်ခင်ခင်မင်မင်မရှိခဲ့ကြပါ။ မကြာခင်မှာ ပင် သူတို့နှစ်ဦးစလုံး စိတ်ဝင်စားသော ဘုံကိစ္စတစ်ခုကို တွေ့ရှိခဲ့ကြသည်။ ထိုကိစ္စမှာ Data အစုအဝေး အကြီးကြီးထဲမှနေ၍ ဆိုင်ရာဆိုင်ရာ Information ကို ရှာဖွေထုတ် ယူသည့် အပိုင်းဖြစ်သည်။ သူတို့နှစ်ဦးပူးတွဲပြီး ကျယ်ကျယ်ပြန့်ပြန့်စဉ်းစားဖြစ်သည့်အကြောင်းမှာ Seminal Contribution ဖြစ်သည်။ "The Anatomy of a Large-Scale Hyper- textual Web Search Engine" ဆိုသော ခေါင်းစဉ်နှင့် စာတမ်းတစ်စောင်ကို နှစ်ယောက်ပေါင်း ရေးသားခဲ့ကြသည်။ ဤ စာတမ်းသည် Stanford တက္ကသိုလ်၏ ဆယ်စောင်မြောက် လူဖတ်အများဆုံး သိပ္ပံစာတမ်းတစ်ခုဖြစ်ခဲ့သည်။

လူသိများ ထင်ရှားလာခြင်း

Sergey သည် The Charlie Rose Show, CNBC နှင့် CNN အပါအဝင် Television Show များ၊ Documentaries တွင် ပါဝင်လာသည်။ ၂၀၀၄ခုနှစ်တွင် Sergy နှင့် Larry ကို ABC World News Tonight က "Persons of the Week" ဟု ရွေးချယ်ခဲ့သည်။ ၂၀၀၅ ဇန်နဝါရီလတွင် Sergey Brin ကို World Economic Forum ၏ "Young Global Leaders" အဖြစ် အမည်တင်သွင်းခံရသည်။

Sergey နှင့် Larry Page တို့သည် သူတို့၏ လုပ်ငန်းနှင့် Personal Needs အတွက် Boeing 767 လေယာဉ်တစ်စင်းကို ဝယ်ယူခဲ့သည်။ လေယာဉ်အတွင်းပိုင်းကို ပျံ သန်းရေးဒီဇိုင်နာ Leslie Jennings က ဒီဇိုင်း ပြန်ပြင်ပေးဖို့ ယူဆခဲ့သည်။ သို့သော် တရားရေးယှဉ်ပြိုင်မှုတွင် အသစ်ပြင်ဆင်ပေးခဲ့သည်။ ပြန်လည်မွမ်းမံပြီးသောအခါ ခရီးသည် ၅၀ ခန့်ဆံ့သည်။ ကယ်လီဖိုးနီးယား King Size Bed လည်း ပါဝင်သည်။ Brin ကို The Film Broken Arrows ၏ Executive Producer အဖြစ်လည်း လူသိများကြသည်။

၂၀၀၇ တွင် PC World က ဝက်ဘ် ပေါ်တွင် အရေးအကြီးဆုံး ပုဂ္ဂိုလ် ၅၀ ထဲတွင် Sergey ကို နံပါတ်တစ်နေရာပေးခဲ့သည်။ Google Co.founder larry Page နှင့် CEO Eric Schmidt တို့နှင့် အတူတူနေရာပေးခဲ့သည်။ Sergey သည် Tesla Motors ၏ ရင်းနှီးမြှုပ်နှံသူတစ်ဦးလည်း ဖြစ်သည်။ Tesla Motors သည် ၂၅၀ မိုင်အထိ မောင်းနှင်နိုင်သော ဘက်ထရီလျှပ်စစ်ကား Tesla Roadster ကိုဖန်တီးနေသည်။

ရှာဖွေရေး အင်ဂျင်ကို တီထွင်ခြင်း

စတန်းဖို့ဒ် တက္ကသိုလ်တွင် ကျောင်းသားသစ်အဖြစ်စတင် ရောက်ရှိစဉ် လယ်ရီ ပေ့ချ် နှင့် တွေ့ဆုံခဲ့သည်။ မကြာသေးမီက Economist မဂ္ဂဇင်း အတွက် အင်တာဗျူးတွင် “ ငါတို့နှစ်ယောက်လုံးက တော်တော် ရွံ့ဖို့ကောင်း တယ်” ဟုအရွှမ်းဖောက်ပြောကြားခဲ့သည်။ သူတို့သည် ကိစ္စတော်တော်များများတွင် သဘောထားကွဲလွဲကြ ဟန်ရှိသည်။ သို့သော် သူတို့အတူတူ နေခဲ့ကြပြီးနောက် အရမ်းတော်သည့် ရင်းနှီးသော စိတ်တူကိုယ်တူ သူငယ်ချင်းများဖြစ်လာကြသည်။ ဘရင်သည် အချက်အလက်ရှာဖွေသည့် လုပ်ငန်းကို ပိုကောင်းအောင်လုပ်ရန် အာရုံစိုက်နေ သည့်အချိန်မှာ လယ်ရီက “အခြားသော အကိုးအကား အညွှန်းစာတွေဆီကနေ အရေးကြီးတဲ့ သုတေသန ပြုချက် စာမျက်နှာကို စုစည်းပေးတဲ့ အယူအဆ”ကို အာရုံစိုက် ခဲ့သည်။ အဓိက စဉ်းစားပြီး လုပ်ဆောင်ခဲ့သော ဆန်းသစ်တိုးတက်မည့် အလားအလာရှိသည့် လေ့လာမှုတခုကို “ လိုအပ်ချက်ကို အလွယ်တကူ ရှာဖွေနိုင်သည့် အကြီးစား အင်တာနက် search engine တခု ၏ တည်ဆောက်ပုံ” ဟုအမည် ပေးကာ အတူတကွ ရေးသားခဲ့သည်။

သူတို့ ၏ အတွေးအခေါ်များကို ပေါင်းစပ်ပြီး သူတို့ ၏ အဆောင်အခန်းများအတွင်း ဈေးပေါသော ကွန်ပျူတာများ ကို ပြည့်ကျပ်နေအောင် ထည့်သွင်းကာ အင်တာနက်ကို အခြေခံသည့် search engine အသစ်ကို စမ်းသပ်ခဲ့သည်။ သူတို့ ၏ စမ်းသပ်မှုမှာ လျင်မြန်စွာ တိုးတက်လာပြီး Standford တက်ကသိုလ်၏ ကွန်ပျူတာ အသုံးပြုသည့် အခြေခံ လုပ်ငန်းပိုင်းကို အခက်အခဲများ နှင့် တွေ့ကြုံစေခဲ့သည်။ သို့သော် သူတို့၏အင်တာနက်မှတဆင့် ရှာဖွေမှုပြုလုပ်သည့် အစွမ်းထက်ရှာဖွေရေးကိရိယာ စမ်းသပ်မှုမှာ အောင်မြင်ကြောင်းနားလည်ခဲ့ပြီး သူတို့၏ စမ်းသပ်မှုကို ပို၍ ထိထိရောက်ရောက်လုပ် ကိုင်နိုင် ရန် ပါရဂူဘွဲ့အတွက် သင်ယူမှုများကို ခေတ်တရပ်နားခဲ့သည်။ (၇) မာ့ခ် မော်စီ က၊ ပါရဂူဘွဲ့တက်နေသူများ၊ မိသားစုများနှင့် သူငယ်ချင်းများထံမှ ထောက်ပံငွေများ ကောက်ခံခြင်း၊ ရှိသည့် ပစ်စည်း များကို နည်း နည်းခြင်း ရောင်းချခြင်းများ ပြုလုပ်ပြီး ချိတ်ဆက်ထားသော ကွန်ပျူတာများကို အချက်အလက်များ ပေးပို့ နိုင် သောကိရိယာ ကိုဝယ်ယူခဲ့ကြပြီး မန်လိုပါ့ခ် ရှိ နာမည်ကျော် အလုပ်ရုံတခုသို့ ငှားရမ်းခဲ့ကြ သည်။ သိပ်မကြာခင်မှာပင် Sun Microsystems ကို ပူးပေါင်းတည်ထောင်သူ Andy Bechtolsheim က ၁၀ဝ ဝ၀ဝ ချက်လက်မှတ်တစောင်ရေးပြီး Google Inc သို့ ပေးပို့ခဲ့သည်။ သို့သော် တစ်ခုတည်းသော ပြဿနာမှာ ထိုအချိန်က Google Inc မှာ အခိုင်အမာ ဖွဲ့စည်းတည် ထောင်ထားခြင်း မရှိသေးပေ။ “၂ ပတ်ကြာကြာထိ သူတို့ စာရွက်စာတမ်းနဲ့ အလုပ်တွေလုပ်တော့ သူတို့မှာ ပိုက်ဆံချေးစရာ နေရာမရှိကြဘူး” ဟု ရေးသားဖော်ပြခဲ့သည်။

The Economist Magazine က ဘရင် ၏ ဘဝကိုချဉ်းကပ်ပုံကို ပေ့ချ် ကဲ့သို့ပင်“ ကမ္ဘာ အချက်အလက်များအားလုံးကို ပြုလုပ်ပေးထားခြင်းဖြင့် နေရာမရွေး၊ အချိန်မရွေး၊ လူတိုင်း သုံးရလွယ်ကူပြီး အသုံးဝင်စေရမယ် ” ဟူသော Google ၏ ဆောင်ပုဒ် အပေါ်တွင် သုံးသပ်ပြီး ပေါ်ထွက်လာတဲ့ အမြင်ပေါ်မှာ အခြေခံထားကြောင်း ဖော်ပြထားသည်။ အခြားလူတွေ သူတို့ရဲ့အမြင်တွေကို ခေတ်သစ်ပုံနှိပ်ပညာကို တီထွင်ခဲ့သူ ဂျိုဟန် ဂတ်တန်ဘက် ၏ အမြင်နှင့် နှိုင်းယှဉ်ဖော်ပြထားသည်။ “၁၄၄ဝ ခုနှစ်တွင် ဂျိုဟန် ဂတ်တန်ဘက် က ဥရောပကို ပုံနှိပ်စက်နဲ့ စတင်မိတ်ဆက်ပေးခဲ့တယ်။ ပုံနှိပ်စက်အများအပြား အသုံးပြုပြီး သမ္မာကျမ်းစာ စာအုပ်တွေကို ရိုက်နှိပ်ခဲ့ကြတယ်။ ဒီနည်းပညာက စာအုပ်နဲ့လက်ရေးစာမှုတွေ ဖြစ်လာ ဖို့လမ်း ဖွင့်ပေးခဲ့တယ်။ အရင်တုန်းက လက်နဲ့ကူးရေးခဲ့ကြရတယ်။ ပိုမြန်တဲ့နှုန်းနဲ့ ကူးယူရိုက်နှိပ်ရန်အတွက် ဂျိုဟန် ဂတ်တန်ဘက် က အသိပညာကို ဖြန့်ဝေပေးခဲ့ပြီး တော့ ဥရောပတိုက်ရဲ့သမိုင်းကို ကဏ္ဍအသစ်တရပ် ဖွင့်လှစ်ဖို့အကူအညီပေးခဲ့တယ်။”

“Google ကလဲ ဒီလိုအလုပ်မျိုးကို လုပ်ခဲ့တာပဲ။ The Google Story စာအုပ်ကို ရေးတဲ့စာရေးဆရာကလဲ အလားတူ နှိုင်းယှဉ်ချက်မျိုး ပေးခဲ့တယ်။ ဂတ်တန်ဘက် လက်ထက်တည်းကမှ မဟုတ်ဘူး” … Google လိုပဲထူးထူးခြားခြားလေးလေးနက်နက်နဲ့ တီထွင်မှုအသစ်တိုင်းကို ကိုယ်ပိုင်အဖြစ် လုပ်ပိုင်ခွင့်ပေးခဲ့တာတွေ ပြီးတော့ အခွင့်အလမ်းတွေကို သတင်း အချက်အလက်တွေ အဖြစ် ဖြန့်ဝေပေးခဲ့တာတွေ ရှိခဲ့တယ်။

သိပ်မကြာခင်မှာပဲ သူတို့နှစ်ယောက် အင်တာနက်ရှာဖွေရေးအတွက် ထိရောက်မယ့်ကိရိယာ အသစ်ကို တီထွင်ခဲ့ တယ်။ သိပ်မကြာခင်မှာပဲ သူတို့နှစ်ယောက် အင်တာနက်ရှာဖွေရေးအတွက် ထိရောက်မယ့်ကိရိယာ အသစ်ကို တီထွင်ခဲ့ တယ်။ ဒစ်ဂျစ်တယ် စာအုပ် နှင့် ကျန်းမာရေးဆိုင်ရာ သတင်းအချက်အလက်မျိုးတွေ ဖြန့်ကျက်ခြင်းမျိုး လိုပဲ ယနေ့ ဝက်ဘ်ဆိုက်တွေရဲ့ နောက်ကွယ်က သတင်းအချက်အလက်များအကြောင်းကို သူတို့ စတင် စဉ်းစားခဲ့ကြတယ်။

ပုဂ္ဂိုလ်ရေးဘဝ

၂၀၀ရ မေ တွင် Anne Wojcicki ကို ဘဟားမား(စ်)တွင် လက်ထပ်ခဲ့သည်။ Wojcicki သည် ဇီဝနည်းပညာ သုတေသီ တယောက် ဖြစ်ပြီး ၁၉၉၆ တွင် ယေးလ် တက္ကသိုလ်မှ B.S ( Biology) ဇီဝဗေဒ ဘွဲ့ကို ရရှိခဲ့သည်။ ကျန်းမာရေးသုတနှင့် ပက်သက်ပြီး စိတ်ပါဝင်စားစွာ လှုပ်ရှားသူတယောက်ဖြစ်ပြီး ဘရင် နှင့် Wojcicki တို့သည် ကျန်းမာရေးနှင့် သက်ဆိုင် သည့် နည်းလမ်း အသစ်များ ရှာဖွေ၍ ပိုမိုတိုးတက် ကောင်းမွန်အောင် လုပ်ဆောင်ခဲ့သည်။ သူတို့နှစ်ယောက် အားထုတ်မှုများ၏ တစိတ်တပိုင်းအနေနှင့် လူသားမျိုးနွယ်၏ မျိုးရိုးဗီဇ များကို လေ့လာသည့် စီမံကိန်း ကို စတင်ခဲ့သည်။ ဘရင်း က မျိုးရိုးဗီဇ ကို ကွန်ပြုတာ ဒေတာဘေ့စ် နှင့် လုပ်ငန်းဆိုင်ရာ ပြဿနာတစ်ရပ်အနေ နဲ့ မြင်သည်။ 23andMe ကို အတူတကွ တည်ထောင်သူ သူ၏ဇနီးလည်း ထို့အတူပင် ဖြစ်သည်။ 23andMe မှာ လူ များအား သူတို့၏ ကိုယ်ပိုင် မျိုးရိုးဗီဇအစိတ်အပိုင်း (၂၃စုံသော ခရိုမိုဇုန်း) ကို လေ့လာစေပြီး အခြားသူများနှင့် နှိုင်းယှဉ်လေ့လာနိုင်ကြရန် ရည်ရွယ်သည်။

မကြာခင်က ပြုလုပ်သော ဂူးဂဲလ် ခေတ် (Google’s Zeitgeist) ညီလာခံ တွင် ဘရင်းက တနေ့မှာ လူတိုင်းဟာ သူတို့ရဲ့ ကိုယ်ပိုင် မျိုးရိုးဗီဇ ကုတ်တွေကို ဆရာဝန်တွေ၊ လူနာတွေ နဲ့ သုတေသန ပြုတဲ့သူတွေကို ကူညီတဲ့ အနေနဲ့ ကိုယ့်ဘာသာကို လေ့လာနိုင်လာကြတဲ့အခါ ဗီဇတွေရဲ့ အမှားတွေ ကို တွေ့ရှိရှာဖွေနိုင်ကြပြီး ဘယ်လိုပြုပြင်မလဲ ဆိုတာဝိုင်းဝန်း ကြံဆနိုင်ကြလိမ့်မယ် လို့ ကျွန်တော် မျှော်လင့်ပါတယ်” လို့ ကြေညာခဲ့သည်။

ဘရင် ၏ အမေဖြစ်သူ Eugenia မှာ ပါကင်ဆန်ရောဂါ ခံစားနေရသူဖြစ်သည်။ ၂၀၀၈ တွင် သူ၏ အမေဆေး ကုသရာ မယ်ရီလန်း ဆေးတတက္ကသိုလ်သို့လှူဒါန်းမှုတခု ပြုလုပ်ခဲ့သည်။ ဘရင် က 23AndMe Services ကိုအသုံးပြုပြီး၊ ယေဘုယျအားဖြင့် ပါကင်ဆန်ရောဂါက မျိုးရိုးလိုက်ဖြစ်သောရောဂါတခု မဟုတ်သော်လည်း၊ သူနှင့် သူ့အမေနှစ်ယောက်လုံးရဲ့ LRRK2 ဂျင်း ဗီဇမှာ သန္ဓေ ပြောင်းလဲမှု ( Mutation ) ရှိနေတာကြောင့် ဆာဂေး ဟာ နောက်နှစ်ပေါင်းများစွာ ကြာတဲ့အခါမှာ ပါကင်ဆန်ရောဂါဖြစ်နိုင်ချေ ၂ဝ % ကနေ ၈၀% အထိ ရှိနေကြောင်းကို ရှာဖွေ တွေ့ရှိခဲ့သည်။ မသိနားမလည်ဘူး၊ အသိပညာဗဟုသုတမရှိဘူးဆိုလျှင် ကိစ္စတော်တော်များများမှာ အောင်မြင်မှု ရရှိမှာ မဟုတ်ကြောင်းနှင့် ပက်သက်၍ ဆာဂေး ကိုမေးမြန်းကြသည့်အခါ ဆာဂေး က သူ့ရဲ့အသိပညာ ဗဟုသုတရှိခြင်းက အခုဒီရောဂါကို ကာကွယ်တားဆီးနိုင်တော့မည် ဖြစ်ကြောင်း ပြောဆိုခဲ့သည်။ The Economist Magazine ၏ အယ်ဒီတာအာဘော်ကဏ္ဍတွင် မစ္စတာ ဘရင် က သူရဲ့ LRRK2 ဗီဇ သန္ဓေ ပြောင်းလဲမှုကို သူရဲ့ကိုယ်ပိုင်အချက်အလက်တွေထဲက ပိုးကောင်တကောင်(bug)လောက်ပဲ သဘောထားပြီး Google မှ အင်ဂျင်နီယာများ နေ့တိုင်းပြင်ဆင်နေရတဲ့ ကွန်ပြူတာ စနစ်ကို ပျက်စီးစေတဲ့ bug များနှင့် နှိုင်းယှဉ် လျှင် မည်သို့မျှ ထူးခြားမှုမရှိကြောင်း ရေးသားခဲ့သည်။

“သူကိုယ်သူ ကူညီလုပ်ကိုင်ပေးခြင်းဖြင့် သူများကိုလဲ ကူညီပေးနိုင်တယ်။ သူ့ကိုသူ ကံကောင်းတယ် လို့အမြဲစဉ်းစားတယ်။ သို့သော် မစ္စတာ ဘရင် က ပိုပြီးအရေးပါအရာရောက်သည့် အချက်တချက်ကို ပြုလုပ်နေခဲ့တယ်။ အသိပညာ ဗဟုသုတရှိတာ ဘယ်အချိန်ပဲဖြစ်ဖြစ် မကောင်းဘူးလား၊ ပြီးတော့ မသိတာထက်တော့ အသိပညာ ဗဟုသုတရှိတာက သေချာပေါက်ပိုမကောင်းဘူးလား။ ”

တရုတ် ဆင်ဆာ နှင့် Google

သူ့ငယ်ဘဝနှင့် သူ့မိသားစုတို့ဆိုဗီယက်နိုင်ငံမှ ထွက်ခွာလာခဲ့ရတဲ့ အကြောင်းရင်းကို သတိရမိတဲ့အခါမှာ ဆာဂေး က တရုတ် ကွန်မြူနစ် အစိုးရ စိတ်ကြိုက် ရှာဖွေရေးအင်ဂျင်ရဲ့ အဖြေတွေကို ဖြတ်တောက်နိုင်အောင် ခွင့်ပေးလိုက်တဲ့ Google ရဲ့ ဆုံးဖြတ်ချက် ကို တော်တော်လေး စိတ်ပျက်ခဲ့ရသည်။ ဒါပေမယ့် Google မရနိုင်လဲပဲ တရုတ်က သာလွန်ကောင်းမွန်တဲ့ အနေအထားအတိုင်းပဲ ဆက်ရှိနေနိုင်တာပဲလေ လို့ ဆုံးဖြတ်လိုက်ပါတော့သည်။ Fortune မဂ္ဂဇင်းကို သူ့ရဲ့ အကျိုးနဲ့အကြောင်း ရှင်းပြခဲ့တာကတော့ : “ဒီကိစ္စမှာ ပါဝင်မိတဲ့အတွက် ကျွန်တော်တို့ ခံစားရတယ်။ ပြီးတော့ ကျွန်တော်တို့ရဲ့ဝန်ဆောင်မှုကို ပေးချင်တဲ့ ၁၀၀% မရရင်တောင်မှ ရရှိနိုင်သလောက်ပိုပြီး ရရှိနိုင်အောင်ပြုလုပ်နေ ကြတယ်။ တရုတ်အင်တာနက်အသုံးပြုသူတွေအတွက် အချက်အလက်အားလုံးကို ရှာရင်ရှာသလောက် အဆုံးစွန်ထိ မရရှိနိုင်သော်လည်း အရင်ကထက်တော့ ပိုမို ရရှိနိုင်ပါလိမ့်မယ်။”

၂၀၁ဝ ဇန်နဝါရီ ၁၂ နေ့တွင် Google ရှိ ကွန်ပြူတာ များနှင့် လွန်ခဲ့သောတလခန့်ကမှ စတင်တည် ထောင်ထားသော ပေါင်းစပ်အခြေခံ အဆောက်အအုံ(corporate infrastructure) ကို အင်တာနက်မှ အကြီးစားတိုက်ခိုက်မှု တခု ခံလိုက်ရကြောင်းနှင့် ထို တိုက်ခို်က်မှုတွင် များပြားလှစွာသော Gmail Account များကို ဝင်ရောက်ကြည့်ရူခံ ခဲ့ရပြီး Google ၏ ပညာရပ်ပိုင်းဆိုင်ရာ ပိုင်ဆိုင်မှုများကို ခိုးယူခံခဲ့ရကြောင်း ထုတ်ပြန်ကြေညာခဲ့ သည်။

နောက်ပိုင်းတွင် ထိုတိုက်ခိုက်မှုမှာ တရုတ်ပြည်မှ ပြုလုပ်ခြင်းဖြစ်ကြောင်း ဆုံးဖြတ်ခဲ့ပြီးနောက်တွင်၊ တရုတ်ပြည်ရှိ Google Search Engine ၏ စိစစ်ဖြတ်တောက်မှုသဘောတူညီမှုကို ဆက်လက်လုပ်ကိုင် တော့မည် မဟုတ်ကြောင်းနှင့် တရုတ်နိုင်ငံရှိ Google Company နှင့်သက်ဆိုင်သည့်အရာ အားလုံးကို ရုပ်သိမ်းတော့မည် ဖြစ်ကြောင်း ကြေညာခဲ့သည်။

ဒီတိုက်ခိုက်မှုပြုလုပ်သူ၏ အဓိကရည်ရွယ်ချက်မှာ တရုတ်ပြည်မှ လူ့အခွင့်အရေးလှုပ်ရှားသူများ၏ Gmail Account များကို ဝင်ရောက်ကြည့်ရူရန် ရည်ရွယ်ကြောင်းနှင့် ဘဏ္ဍာရေး၊ နည်းပညာ၊ သတင်းနှင့် ဓာတု ဗေဒ အစရှိသည့် လုပ်ငန်းများလုပ်ကိုင်သည့် ကုမ္ပဏီကြီး ၂ဝ ခန့်ကို ရည်ရွယ် တိုက်ခိုက်ခဲ့ခြင်းဖြစ်ကြောင်း The New York Times မှ သတင်းထုတ်ပြန်ကြေညာခဲ့သည်။

ယခုတိုက်ခိုက်မှုတွင် အင်တာနက်အသုံးပြုသူ သန်းပေါင်းများစွာ၏ အချက်အလက်ပေါင်းများစွာကို ထိန်း ချုပ်ထားသော Google ၏ ထိပ်တန်း စကားဝှက်စနစ်တခုကိုပါတိုက်ခိုက်ခံခဲ့ရကြောင်း နောက်ပိုင်းတွင် ထုတ်ဖော် ကြေညာခဲ့သည်။ ၂၀၁ဝ မတ်လကုန်ပိုင်းတွင် စိစစ်မှုမပြုလုပ်သည့် ဟောင်ကောင်မှ ဆိုက် များ လည်ပတ်နေဆဲမှာပင် တရုတ်ပြည်ရှိ Google Search Engine ကို တရားဝင်ရပ်ဆိုင်းခဲ့သည်။ တစ်ပြိုင်နက်တည်းမှာပဲ ဒိုမန်းရောင်းချသော ကုမ္ပဏီ Go Daddy Inc. ကလည်း မှတ်ပုံတင် အသုံးပြုကြတဲ့ သူတွေရဲ့ လျှို့ဝှက်သတင်းအချက်အလက်တွေကို သိနိုင်ဖို့ တရုတ်အနေနဲ့ နည်းပညာလိုအပ်ချက် အသစ်တွေ ထပ်ပြီးတပ်ဆင်ရမှာ ဖြစ်တဲ့အကြောင်း လွှတ်တော် သို့ တင်ပြခဲ့သည်။ Google နှင့်ပက်သက်တဲ့ အင်တာဗျူးတစ်ခုမှာ ဘရင် ပြောခဲ့တာတာက “ဒီလိုလုပ်လိုက်ရတာကို ဝမ်းသာရတဲ့အကြောင်းရင်း တစ်ခုကတော့ တရုတ်ရဲ့ အခြေအနေကို အတုယူပြီး တခြားနိုင်ငံတွေကလည်း သူတို့ကိုယ်ပိုင် အင်တာနက် အဟန့်အတားစနစ်တွေကို ထုတ်လုပ်ကြဖို့ တိုက်တွန်းပေးနေသလို ဖြစ်သွားတယ်။

အခြားအင်တာဗျူးတစ်ခုမှာ စပိုင်ဂျယ် က ထပ်ဖြည့် ပြောလိုက်တာကတော့ “ကျွန်တော်တို့အတွက်ကတော့ ပွင့်လင်းမြင်သာတဲ့ အင်တာနက်သတင်းအချက်အလက်တွေ ရရှိမှု နဲ့ပက်သက်ပြီး အမြဲတမ်း ဆွေးနွေးနေကြတာပါဘဲ။ ကျွန်တော်တို့ယုံကြည်တာကတော့ အင်တာနက်ပေါ်က သတင်းအချက်အလက်တွေ ပွင့်လင်းမြင်သာခြင်းရဲ့ အခြေခံ မူ စည်းမျဉ်းစည်းကမ်းတွေကို လွတ်လပ်ပွင့်လင်းမှုအခွင့်အရေးနဲ့အတူ တွဲပြီး ထိန်းသိမ်း ထားနိုင်ခြင်းဟာ အကောင်းဆုံးပဲဖြစ်တယ်။” ကုမ္ပဏီ အနည်းငယ်ဆီကပဲ ဒီကိစ္စအတွက် အထောက်အပံ့တွေပေးဖို့ အာမခံချက် ရထားသေးပေမယ့် အင်တာနက် လွတ်လပ်ခွင့် ရရှိရေးသမားတွေကတော့ ကောင်းကောင်းကြီးကို အားပေးထောက်ခံနေကြပြီ ဖြစ်ပါတယ်၊ နောက်ပြီး ဒီဟာကို သာ လုပ်နိုင်ခဲ့ရင် အမေရိကန် ပြည်ထောင်စု အတွက်ဂုဏ်ယူစရာပဲ” လို့ ဥပဒေ ပြဋ္ဌာန်းသူ တွေက ပြောကြသည်။ ဥပဒေပြုအထက်လွှတ်တော် အမတ်တဦးဖြစ်သူ ဘိုင်ရွန် ဒေါ်ဂန် က Google ရဲ့ဆုံးဖြတ်ချက်က လွတ်လပ်တဲ့ဖော်ပြ ချက်နှင့် သတင်းအချက်အလက်တွေဖြစ်လာစေဖို့ ထောက်ခံအားပေးတဲ့ ခိုင်မာတဲ့ခြေလှမ်းတခုဖြစ်တယ်လို့ ဖော်ပြ ခဲ့သည်။ အမေရိကန်အထက်လွှတ်တော်အမတ် Bob Goodlatte က “တရုတ်နိုင်ငံက Google.cn မှာ ရှာဖွေရရှိတဲ့ အဖြေတွေကို စိစစ်ဖြတ်တောက်မှု ပြုလုပ်တာကို ရပ်တန့်ဖို့ သတ္တိရှိရှိကြိုး စားခဲ့တဲ့ Google ရဲ့ခြေလှမ်း ကို ကျွန်တော် ဂုဏ်ယူတယ်” လို့ချီးကျူးပြောကြားခဲ့တယ်။

“Google ရဲ့လုပ်ရပ်ဟာ သဲထဲမှာ မျဉ်းတကြောင်းဆွဲခဲ့သလို အရာထင်ခဲ့ပြီးတော့ ကိုယ်ပိုင်လွတ်လပ်ခွင့်ကို သတ်မှတ်ချက်ရှိတဲ့ တရုတ်ပြည်လို ဘာမှမသိအောင်အမှောင်ချထားတဲ့နေရာမျိုးမှာ Google က ထွန်းလင်း တောက်ပနေတယ်။ စီးပွားရေးရူထောင့်ကကြည့်မယ်ဆိုရင် တရုတ်နဲ့ ဖြစ်ခဲ့တဲ့ အဖြစ်အပျက်မျိုးဟာ Google ရဲ့ အကျိုးအမြတ် ကို အများကြီးထိခိုက်စေတယ်လို့အများက အသိအမှတ်ပြု လက်ခံထားကြ တယ်။ တရုတ်ပြည်မှာရှိတဲ့ Google ရဲ့ရှာဖွေတွေ့ရှိတဲ့ အဖြေတွေမှာ စိစစ်ဖြတ်တောက်မှု ပြုလုပ်ခြင်းကို ငြင်းဆိုခဲ့တာဟာ ချီးကျူး ဂုဏ်ပြုဖို့ ထိုက်တန်ပေမဲ့ အဲဒီစွမ်းဆောင်မှုအတွက် အများကြီး ပေးဆပ်ခဲ့ရတယ်။ Google ကတော့ Sakharov ( ရုရှားမှ သိပ္ပံပညာရှင် တဖြစ်လဲ လူ့အခွင့်အရေးလှုပ်ရှားတက်ကြွသူ ) လိုမျိုး ဒီကိစ္စရပ် နှစ်ခုကြားထဲမှာ ချိတ်ဆက် လှုပ်ရှားနေတဲ့ အနေအထား ကို ရောက်နေပြီ” လို့ လက်ရှိ “သူရဲကောင်းဆန်ဆန် လှုပ်ရှားမှု” ကို ရည်ညွှန်းပြီး တရုတ် ပြည်သူ့ သမ္မတ အစိုးရ အသစ်က ထပ်လောင်း ပြောဆိုလိုက်ပါသည်။

ရရှိခဲ့သော ဆုများ နှင့် အသိအမှတ် ပြုခံရခြင်းများ

၂၀၀၉ နိုဝင်ဘာတွင် Forbes မဂ္ဂဇင်း မှ ဘရင် နှင့် လယ်ရီပေ့ချ် တို့သည် ကမ္ဘာ့ အစွမ်းအစအရှိဆုံး နံပါတ် ၅ အဆင့်ရှိ ပုဂ္ဂိုလ်များဖြစ်သည်ဟု ဖော်ပြခဲ့သည်။ ထိုနှစ်အစပိုင်း ဖေဖော်ဝါရီလတွင် ဘရင် အား အင်ဂျင်နီယာနှင့် သက်ဆိုင်သည့်အမြင့်ဆုံးအသက်မွေးဝမ်းကျောင်းဆိုင်ရာ ထူးချွန်ဆုများမှ တခုဖြစ်သော National Acadamy of Engineering ကို ချီးမြှင့်အပ်နှင်းခဲ့ပြီး အင်ဂျင်နီယာ သုတေသန လုပ်ငန်းများတွင် ထူးချွန်ပြောင်မြောက်စွာ အထောက် အကူပြု ဆောင်ရွက်ခဲ့မှုတို့ကို ဂုဏ်ပြုခဲ့သည်။ အထူးသဖြင့် သိလိုသောအကြောင်းအရာကို အလွန်လျင်မြန်စွာ စာရင်း ပြုစုနိုင်ခြင်းနှင့် သက်ဆိုင်သောအချက်အလက်များကို ပြန်လည်ဖော်ထုတ်ခြင်းတို့တွင် တိုးတက် ဖွံ့ဖြိုးအောင် ဦးဆောင် လုပ်ကိုင်ခဲ့ခြင်းကြောင့် ရွေးချယ်ခံရခြင်းဖြစ်သည်။

၂၀၀၃ တွင် ဘရင် နှင့် ပေ့ချ် တို့သည် စီးပွားရေးစွမ်းဆောင်ရှင် စိတ်ဓာတ်ကို အကောင်အထည်ဖော်ခဲ့ပြီး တော့ စီးပွားရေးပုံစံသစ်ကို ဖန်တီးရာမှာ အရှိန်အဟုန်ဖြင့် ဦးဆောင်ခဲ့တဲ့အတွက် IE စီးပွားရေးကျောင်းမှ ဂုဏ်ထူးဆောင် MBA ဘွဲ့ကို ချီးမြှင့် ခဲ့သည်။ ၂၀၀၄ တွင် အင်ဂျင်နီယာ ပညာရပ်တွင် အမြင့်ဆုံးဆုတဆု ဖြစ်သော Marconi Foundation Prize ကို လက်ခံရရှိခဲ့ပြီး ကိုလံဘီယာ တက္ကသိုလ်ရှိ Marconi Foundation အုပ်ချုပ်ရေးအဖွဲ့ ဝင်အဖြစ် ရွေးချယ်ခြင်းခံခဲ့ရသည်။ ရွေးချယ်ခံရကြောင်း ကြေညာချက်ထုတ်ပြန်ရာမှာ Marconi Foundation ၏ ဥက်ကဌ ဖြစ်သူ John Jay Iselin က ဒီနေ့ ခေတ်ကာလမှာ သတင်းအချက်အလက်ရရှိမှုနည်းလမ်းတွေ နဲ့ပက်သက်ပြီး အခြေခံအားဖြင့် အပြောင်းအလဲတွေကို တီထွင် နိုင်ခဲ့တဲ့ အတွက် ဂုဏ်ယူဝမ်းမြောက်ကြောင်း ပြောကြားခဲ့တယ်။

သူတို့သည် ရွေးချယ်သင်ကြားလေ့ကျင့်ပေးထားသော ဆက်သွယ်ရေးနည်းပညာနှင့် ပက်သက်ပြီး ကမ္ဘာ့အလွှမ်းမိုး နိုင်ဆုံး ရှေ့ဆောင် လမ်းပြ ၃၂ ယောက် စာရင်းထဲမှာ ပါဝင်ခဲ့သည်။ စာရင်းဝင်များရဲ့ ကိုယ်ရေးအချက်အလက်တွေမှာ အမျိုးသား သိပ္ပံပညာ ဖောင်ဒေးရှင်း ကြီး၏ အစောပိုင်းက ပေးတဲ့ ဆုတွေရရှိတဲ့ အကြောင်း ပါဝင်သည်။ “သူသည် ကမ္ဘာ စီးပွားရေး ဆွေးနွေးပွဲ၊ နည်းပညာ၊ ဖျော်ဖြေမှု နှင့် ဒီဇိုင်းအစည်းအဝေးပွဲတွေမှာ စိတ်ဝင်စားစရာကောင်းတဲ့ စကားပြောသူကောင်းသူတယောက် ဖြစ်တယ်။ PC Magazine က Google သည် အကောင်းဆုံး Web-sites နှင့် Search Engine 100 ထဲမှာ ထိပ်ဆုံးမှာရှိတယ်လို ့ချီးကျူးပြောကြားခဲ့ပြီးတော့ ၁၉၉၉ ခုနှစ်တွင် အင်တာနက်အသုံးဝင်မှုကို ပိုမိုတိုးတက်ကောင်းမွန်အောင် ဆန်းသစ်လုပ်ကိုင်ခဲ့ခြင်းကြောင့် နည်းပညာပိုင်း ဆိုင်ရာ အကောင်းဆုံးဆု ကိုချီးမြှင့်ခဲ့တယ်။” ၂၀၀ဝ ခုနှစ်တွင် Webby Award နှင့် နည်းပညာပိုင်းဆိုင်ရာ အောင်မြင်မှု အတွက် People’s Voice Award ကို ချီးမြှင့်ခံခဲ့ရတယ်။ ၂၀၀၁ ခုနှစ်တွင် Outstanding Search Service ဆု၊ Best Image Search Engine ဆု၊ Best Design ဆု၊ Most Webmaster Friendly Search Engine ဆု နှင့် အကောင်းဆုံး ရှာဖွေနိုင်သော အင်္ဂါရပ်အတွက် Search Engine Watch Award တို့ကို ချီးမြှင့်ခြင်းခံခဲ့ရသည်။

၂၀၁ဝ Forbes စာရင်းအရ သူနှင့် လယ်ရီ နှစ်ယောက်ပေါင်းသည် အမေရိကန်ဒေါ်လာ ၁၇.၅ ဘီလျံပိုင်ဆိုင်ပြီး ကမ္ဘာ့ အချမ်းသာဆုံး နံပါတ် ၂၄ အဆင့်ကို ပူးတွဲ ရရှိထားသည်။

အခြား စိတ်ဝင်စားမှုများ

ဘရင် သည် အခြားကိုယ်ပိုင်လုပ်ငန်း အစီအစဉ်များကို Google ထက်ပို၍ လုပ်ဆောင်ခဲ့သည်။ ဥပမာအားဖြင့် .. Google ၏ ပရဟိတလုပ်ငန်းတခုဖြစ်တဲ့ google.org ကို ပြုလုပ်ခဲ့ပြီး နေရောင်ခြည်၊ လေနှင့် ရေတို့လို များပြားလှတဲ့အရင်းအမြစ်ကို ရှာဖွေထုတ်ယူအသုံးပြုနိုင်တဲ့ စွမ်းအင်ထုတ် စက်မှုလုပ်ငန်းမျိုးမှာ ရင်းနှီးမြုပ်နှံခဲ့ပြီး ကမ္ဘာ့ စွမ်းအင်နှင့် ရာသီဥတုဆိုင်ရာပြသာနာများကို ဖြေရှင်းနိုင်ရန် ကြိုးစားခဲ့သည်။ အဲဒါကြောင့် “ ကုမ္ပဏီကို တည်ထောင်ခဲ့သူတွေဟာ နည်းပညာကို အသုံးပြုပြီးတော့ ခက်ခဲတဲ့ပြသာနာတွေကို ဖြေရှင်းချင်လို့တည်ထောင် ခဲ့တယ်” လို့အများက လက်ခံခဲ့ကြသည်။

၂၀၁ဝ အောက်တိုဘာတွင် အရှေ့ဘက်ကမ်းခြေရှိ လျှပ်စစ်ဓာတ်အား ဖြန့်ဖြူးသည့်စက်ရုံကို ကူညီထောက် ပံနိုင်ရန်အတွက် နောက်ပိုင်းအမေရိကန်ရှိ ပထမဆုံးကမ်းလွန်လေစွမ်းအားလုပ်ငန်းဖြစ်လာမည့် အဓိကကမ်းလွန် လေအားလျှပ်စစ် ထုတ်ယူသည့် လုပ်ငန်းကို စတင်တည်ထောင် ရင်းနှီးမြုပ်နှံ ခဲ့သည်။

လွန်ခဲ့သောတပတ်ခန့်က သူတို့တီထွင်ထုတ်လုပ်ထားသော မှတ်ဉာဏ်အတု ( Artificial Intelligence ) ထည့်သွင်း တပ်ဆင်ထားသောကားကို ပြည်သူလူထုနှင့် စတင်မိတ်ဆက်ပေးခဲ့သည်။ ထိုကားတွင် ဗီဒီယို ကင်မရာနှင့် အာရုံခံ ကိရိယာများတပ်ဆင်ထားပြီး မောင်းသူမရှိပဲ အလိုအလျောက် ထိန်းချုပ်မောင်းနှင်နိုင်မည် ဖြစ်သည်။

အနာဂတ်တွင် ထိုကဲ့သို့သော အာရုံခံကိရိယာမျိုးတပ်ဆင်ထားသောကားကိုမောင်းသည့် ကားမောင်းသူများ သည် မတော်တဆမှုများကို အများကြီး လျော့ချနိုင်မည်ဖြစ်သည်။ ဤကဲ့သို လုံခြုံစိတ်ချရသောကားမျိုးကို ပေါ့ပေါ့ပါးပါးနှင့် ဆီစားသက်သာသော ပုံစံမျိုးဖြင့် တည်ဆောက် ထုတ်လုပ် နိုင်တော့မည် ဖြစ်သည်။ သူတို့သည်ကမ္ဘာ အထောက်အကူပြုပစ်စည်းများ ထုတ်လုပ်နိုင်မှုကို ပိုမိုတိုးမြင့် ထုတ်လုပ်နိုင်ရန်အတွက် ဆန်းသစ် သော တီထွင်ဖန်တီးမှုများပြုလုပ်နိုင်မည့် စိတ်တူကိုယ်တူ အပေါင်းအဖော်များ ရရန်ကြိုးစားခဲ့ကြသည်။ သူသည် ၂၄၄ မိုင် ( ၃၉၃ ကီလိုမီတာ ) သွားနိုင်သော ဘက်ထရီ လျှပ်စစ်ဓာတ်အားသုံး Tesla Roadster ကားများ အတွက် Tesla Motors ကို တီထွင်ခဲ့ပြီး တိုးတက်ဖွံဖြိုးအောင် ပြုလုပ်ခဲ့သူဖြစ်သည်။ နာမည်ကျော် သတင်းနှင့် ရုပ်သံအစီအစဉ်များဖြစ်သော Charlie Rose, CNBC နှင့် CNN စသောရုပ်မြင်သံကြား အစီအစဉ်များနှင့် ရုပ်သံ သတင်းမှတ်တမ်းတင် ဆောင်းပါးများတွင် ပါဝင်တင်ဆက်ခဲ့သည်။ ၂၀၀၄ တွင် ABC World News Tonight ရုပ်မြင်သံကြားမှ Person of the Week အစီအစဉ်တွင် ပါဝင်ရိုက်ကူး ခဲ့သည်။ ဘရင် သည် ၂၀၀၅ တွင် World Economic Forum မှ Young Global Leaders အဖြစ် လျာထားသတ် မှတ်ခြင်းခံရသူ တယောက် ဖြစ်ခဲ့သည်။ ဘရင် နှင့် လယ်ရီ တို ့သည် ၂၀၀၉ ခုနှစ်တွင် Broken Arrows ရုပ်ရှင်အတွက် ထုတ်လုပ်သူ အမှုဆောင်အဖြစ် တာဝန်ယူလုပ်ကိုင်ခဲ့ကြသည်။

၂၀၀၈ ဇွန်တွင် ဘရင်သည် အာကာသအတွင်း စွန့်စားလေ့လာမှုများပြုလုပ်သော ဗာဂျီးနီးယား အခြေစိုက် အာကာသ ခရီးသွားလုပ်ငန်း ကုမ္ပဏီတွင် ဒေါ်လာ ၄.၅ သန်း ရင်းနှီးမြုပ်နှံခဲ့သည်။ သူ၏ ရင်းနှီးမြုပ်နှံမှုသည် ၂၀၁၁ တွင် ပျံသန်းမည့် အာကာသခရီးစဉ် တခုအတွက် ကြိုတင်မှာကြားထားသည့်အနေဖြင့် စရန်ငွေပေးထားသည့် သဘောမျိုး ဖြစ်သည်။ ယခုအချိန်အထိ ထိုကုမ္ပဏီမှ အာကာသအတွင်းသို့သွားရောက်လည်ပတ်သူ ခရီးသည် ၇ ယောက်အထိ ပို့ဆောင် ပေးပြီး ဖြစ်သည်။

သူနှင့် လယ်ရီ တို့သည် စိတ်ကြိုက်ပြင်ဆင်ထားသော ဘိုးရင်း ၇၆၇-၂၀ဝ လေယာဉ်တစီး နှင့် Donier Alpha ဂျက်လေယာဉ် တစီးတို့ကိုပိုင် ဆိုင်သည်။ ထို လေယာဉ်နှစ်စင်းနှင့် Google မှ အလုပ်အမှုဆောင် ပိုင်ဆိုင်သည့် ရေနွေးငွေ့သုံး V ပုံစံ အင်ဂျင် နှစ်လုံးတပ်ဆင်ထားသော လေယာဉ်တို့ကို Moffett Federal လေယာဉ်ကွင်းတွင် နှစ်စဉ် ဒေါ်လာ ၁.၄ သန်းပေး၍ ရပ်နားထားရှိသည်။ ထိုလေယာဉ်တွင် ပျံသန်းမောင်းနှင်နေစဉ်အတွင်း လေ့လာစမ်းသပ်ချက်များ ရရှိနိုင်ရန် အတွက် NASA မှ သိပ္ပံစမ်းသပ် ကိရိယာများ တပ်ဆင် ထားရှိ ခွင့်ပြုထားသည်။

အမေရိကန် ပြည်ထောင်စုရှိ ရုရှားစကားပြော စီးပွားရေးလုပ်ငန်းရှင်များ ချိတ်ဆက်ထားသည့် အဖွဲ့အစည်း ( ပြည် ပြေး နှင့် ဒုက္ခသည်များပါ ပါဝင်သည်) တခုဖြစ် သော AmBAR မှ အဖွဲ့ဝင်တယောက် ဖြစ်ပြီး မိန့်ခွန်းပေါင်း များစွာကို ပြောကြားထုတ် လွှင့်ခဲ့သည်။

ဘရင်း ၏ မှတ်သားစရာ ပြောကြားချက်များ

• “ ပိုက်ဆံရဖို့အရမ်းလွယ်ကူသွားတဲ့အခါ တီထွင်ဆန်းသစ်မှု အစစ်အမှန်နဲ့ စီးပွားရေးအရ စွန့်စားမှုတို့ ပေါင်းစပ်သွားပြီးတော့ ထွက်ပေါ်လာတဲ့အသံတွေ ကို မင်းကြားရလိမ့်မယ်။ ခက်ခဲတဲ့အချိန်တွေဟာ ဆီလီကွန်တောင်ကြားရဲ့ အကောင်း ဆုံးအစိတ် အပိုင်းတွေ ကို ဖြစ်ပေါ်စေတယ်။ ”

• “ ငါတို့ဟာ မတူညီတဲ့ အင်တာနက်စာမျက်နှာတွေနဲ့ဖန်တီးထားတဲ့ နိုင်ငံတခုအနေဖြင့် ပေါ်ထွက်လာခဲ့တယ်။ လူတွေပဲ .. ဒါပေမဲ့ အင်တာနက် စာမျက်နှာတွေတော့ မဟုတ်ဘူး။.”
• “ နည်းပညာ ဟာ မွေးရာပါ ဒီမိုကရေစီ ဖော်ဆောင်နိုင်သူ ဖြစ်တယ်။ ဘာလို့လဲဆိုရင် Hardware နဲ့ Software တွေ ပြောင်းလဲ တိုးတက် လာတဲ့အတွက် လူတွေဟာ အရာရာတိုင်းနီးပါးကို တိုင်းတာ တွက်ချက် သိရှိနိုင်လာပြီ။ အဲဒါဟာ ဘာကို ဖော်ပြသလဲဆိုတော့ ကျွန်တော်တို့ရဲ့ နေ့စဉ်ဘဝတွေမှာ တူညီတဲ့အစွမ်းသတ်တိရှိတဲ့ ကိရိယာတွေကို လူတိုင်း ပိုင်ဆိုင်နိုင်လာပြီ ဆိုတာကိုပါပဲ”

ကမ္ဘာ့ ၂၆ ယောက်မြောက် အချမ်းသာဆုံးပုဂ္ဂိုလ်

သူသည် အမေရိကန် စွန့်ဦးတီထွင်သူ (Entrepreneur) တစ်ဦးဖြစ်ပြီး ကမ္ဘာကျော် Google ကုမ္ပဏီကြီးကို လယ်ရီပေ့ချ် နှင့်အတူ ပူးတွဲတည်ထောင်ခဲ့သူလည်း ဖြစ်သည်။

Brin သည်လက်ရှိတွင် Google နည်းပညာပိုင်း ဥက္ကဋ္ဌဖြစ်သည်။ Brin ၏ အသားတင်ကြွယ်ဝချမ်းသာမှုမှာ ဒေါ်လာ ၁၆.၆ ဘီလျံရှိသည်။ ၂၀၀၇ ခုနှစ်မတ်လ ၉ ရက်နေ့တွင် Brin သည် Larry Page နှင့်အတူ ကမ္ဘာ့ ၂၆ ယောက်မြောက် အချမ်းသာဆုံးပုဂ္ဂိုလ်ဖြစ်သကဲ့သို့ အမေရိကန်ပြည်ထောင်စု၏ ၉ ယောက်မြောက်အချမ်းသာဆုံး သူဌေးလည်းဖြစ်ပြီး၊ ကမ္ဘာပေါ်တွင် လေးယောက်မြောက် အသက်ငယ်ဆုံး ဘီလျံနာ သူဌေးလည်းဖြစ်သည်။