ဆူဒိုနင်

မြန်မာစာရေးဆရာ

ကိုယ်ရေးအကျဉ်းပြင်ဆင်

၁၉၅၇ ခုနှစ်၊ နိုဝင်ဘာလတွင် မန္တလေးမြို့၌ အဖ ဦးစိန်မောင်၊ အမိ ဒေါ်သောင်းမေတို့က ပေါက်ဖွားသည့် တဦးတည်းသောသားဖြစ်သည်။ အမည်ရင်း အောင်သိန်းကျော် ဖြစ်သည်။

အစောပိုင်းဘဝပြင်ဆင်

မန္တလေး၊ လွိုင်ကော်၊ လောပိတ၊ တောင်ကြီးတို့မှ မူလတန်း ပညာများ သင်ကြားခဲ့ပြီး ရန်ကုန်မြို့ကို ၁၉၆၇ ခုနှစ်တွင် စတင် ရောက်ရှိခဲ့ကာ အလယ်တန်း၊ အထက်တန်း ပညာများ သင်ကြားခဲ့သည်။ ၁၉၇၅ ခုနှစ်တွင် ဆယ်တန်းကို ရူပဗေဒ၊ အင်္ဂလိပ်စာ ဂုဏ်ထူးများနှင့် အောင်မြင်သည်။

ရန်ကုန် ဝိဇ္ဇာနှင့် သိပ္ပံ တက္ကသိုလ်မှ ၁၉၇၉ ခုနှစ်တွင် သိပ္ပံဘွဲ့ (ရူပဗေဒ) ကို လည်းကောင်း၊ ၁၉၈၃ တွင် အဆင့်မြင့် ပညာဦးစီး ဌာနမှ မှတ်ပုံတင် ရှေ့နေ သင်တန်း အောင်လက်မှတ်ကို လည်းကောင်း၊ ၁၉၈၇ ခုနှစ်တွင် Université de Paris, Sorbonne မှ Certificat Pratique de la Langue Française (1er Degré) ကို လည်းကောင်း ရရှိခဲ့သည်။ ၁၉၇၆ ခုနှစ်၊ တက္ကသိုလ် ပထမနှစ် တက်နေစဉ်တွင် ဖခင်ဖြစ်သူ ပျောက်ဆုံးသွားသည့် အတွက် အငှားယာဉ်မောင်း အဖြစ် စတင် အသက်မွေးခဲ့ရသည်။ ထို့နောက် ရွှေဝယ်ရောင်း၊ ကားဝယ်ရောင်း ဘဝများတွင် ကျင်လည်ပြီး ဘွဲ့ရချိန်တွင် အင်္ဂလိပ်စာ အလွတ်သင် ဆရာအဖြစ် အသက်မွေးခဲ့သည်။ ၁၉၈၅ ခုနှစ်တွင် တရားရုံးချုပ် ရှေ့နေ လိုင်စင်ရသည့် အထိ ရှေ့နေ အဖြစ်လည်း ကျင်လည်ခဲ့သည်။

၁၉၈၈ ခုနှစ်၊ ဇူလိုင်လမှ ၁၉၉၁ ခုနှစ်၊ နိုဝင်ဘာ ၃ဝ ရက်နေ့အထိ ဥရောပသမဂ္ဂ၏ ဘာသာပြန် အခစား ဝန်ထမ်း အဖြစ် လုပ်ကိုင်ခဲ့ပြီး၊ ထို့နှစ် ဒီဇင်ဘာလ ၁ ရက်နေ့က စတင်ကာ ပြည်ထောင်စု မြန်မာနိုင်ငံတော် ဆိုင်ရာ ဩစတြေးလျ သံရုံး၏ ပြန်ကြားရေး တာဝန်ခံ အဖြစ် အမှုထမ်းခဲ့သည်။ ပြန်ကြားရေးနှင့် သုတေသန အရာရှိ အဆင့်အထိ ရာထူး အဆင့်ဆင့် တက်ခဲ့ပြီး ၁၉၉၉ ခုနှစ်က မလေးရှားနိုင်ငံ ကွာလာလမ်ပူမြို့တွင် ကွန်ပျူတာ ကွန်ရက် ဆက်သွယ်ရေး သင်တန်း၊ ဩစတြေးလျနိုင်ငံ ဆစ်ဒနီ၊ မော်လိမု(ခ်) နှင့် ကင်ဘာရာမြို့များတွင် ခေါင်းဆောင်မှုနှင့် ဖွံ့ဖြိုးတိုးတက်မှု သင်တန်း၊ ၂၀၀၂ ခုနှစ်က ဟောင်ကောင်တွင် လုံခြုံရေးစနစ်ပါ ကွန်ပျူတာ ကွန်ရက် ဆက်သွယ်ရေး သင်တန်းများ တက်ရောက်ခဲ့သည်။

၂၀၀၂ ခုနှစ်၊ အောက်တိုဘာလ အတွင်း ထိုအချိန်က ဩစတြေးလျ နိုင်ငံခြားရေးဝန်ကြီး ဒေါင်နာ မြန်မာနိုင်ငံကို လာရောက်ခိုက်တွင် ဩစတြေးလျ သံရုံးက မျက်နှာဖြူ ဝန်ထမ်းများက မြန်မာနိုင်ငံ နိုင်ငံခြား သတင်းထောက်များ အသင်းက သတင်းထောက်များကို သိသိသာသာ ခွဲခြား ဆက်ဆံခဲ့မှု တရပ်အား "မဟာဂျာနယ်" တွင် ဖွင့်ထုတ် ရေးသားခဲ့သည့် အတွက် ဩစတြေးလျ သံရုံးက နောက်ပိုင်းတွင် မြန်မာနိုင်ငံ နိုင်ငံခြား သတင်းထောက်များ အသင်းကို တရားဝင် တောင်းပန်လွှာ ပေးပို့ခဲ့ပြီးသည့်နောက် ထို့ကိစ္စနှင့်စပ်လျဉ်း၍ ၂၀၀၃ ခုနှစ်၊ မတ်လတွင် ရာထူးမှ ထုတ်ပယ်ခံခဲ့ရသည်ဟုဆိုသည်။ အလုပ်ပြုတ်လာပြီးသည့်နောက် ရန်ကုန် တက္ကသိုလ် စိတ်ပညာ ဌာနတွင် အသုံးချ စိတ်ပညာ ဒီပလိုမာ သင်တန်းကို တစ်နှစ်တက်ရောက်ပြီးနောက် ရပ်နားခဲ့သည်။

စာရေးဆရာဘဝပြင်ဆင်

စာကို ငယ်စဉ်ကတည်းက စတင် ရေးသားခဲ့ပြီး ၁၉၆၅ ခုနှစ်၊ တောင်ကြီးမြို့ အထက (၃) က ၄ တန်း ကျောင်းသားဘဝတွင် ကဗျာစာမူကို နံရံကပ် စာစောင်တွင် စတင် ဖော်ပြခြင်း ခံခဲ့ရသည်။ ထို့ ကျောင်းတွင်ပင် ကဗျာရွတ်ပြိုင်ပွဲ ပထမဆုကို ရရှိခဲ့သလို အမျိုးသား ပညာဝန် ဦးဖိုးကျား၏ "ဘိလပ်ပြန် မောင်သောင်းဖေ" ပြဇာတ်တွင် မောင်သောင်းဖေ အဖြစ် သရုပ်ဆောင်ခဲ့ဖူးသည်။ ၁၉၈၈ ခုနှစ်က စပြီး ဆူဒိုနင် ကလောင် အမည်နှင့် မဂ္ဂဇင်းများတွင် စတင် ရေးသားခဲ့သည်။ ၁၉၉၈ ခုနှစ်တွင် စာပေလောက စာအုပ်တိုက်မှ ပထမဆုံး လုံးချင်းစာအုပ် ထုတ်ဝေခဲ့သည်။ ၂၀၀၂ အလုပ်ပြုတ်ပြီးချိန်မှစ၍ အခစား ဝန်ထမ်း ဘဝကို အပြီးတိုင် စွန့်လွှတ်ကာ လက်တွဲဖော် စာအုပ်တိုက်နှင့် စာရေးခြင်း အလုပ်ကို ဇောက်ချ လုပ်ကိုင်ခဲ့သည်။

စာအုပ်စာရင်းပြင်ဆင်

၁။ သားငယ် သမီးငယ်များ ပဲ့ပြင် ထိန်းကျောင်းခြင်း အနုပညာ (ဖတ်၊ ပြန်ဆွေးနွေး) ၂။ တွေးတောဆင်ခြင်မှု အနုပညာ (အတွေးစာ) ၃။ နေပျော်တဲ့ဘဝ ကြည်မြတဲ့ဘဝင် ရွှင်လန်းတဲ့စိတ် (ဘာသာပြန်) ၄။ နီတျာတျာ ငှက်ပြာလေးနဲ့ မိုင်ပေါင်းများစွာ (ခရီးသွား) ၅။ ထိမ်းမြားပေါင်းဖက် ရန်ဖြစ်လျက်ပင် ချစ်ကြင်နေနည်း (ဖတ်၊ ပြန်ဆွေးနွေး) ၆။ ဘဝတူရိယာ (ဘာသာပြန်) ၇။ မဖတ်နဲ့နော် (ဘာသာပြန်) ၈။ ခြေရာပြိုးပြောက် လွမ်းပွင့်ကောက်သီ (ကိုယ်တိုင်ကြုံ ဝတ္ထုတိုစုစည်းမှု) ၉။ သက်ငယ်စကား ၁၀။ သားငယ်တို့နားလည်ဖို့ ၁၁။ ဖြေတွေးလေးများ (အတွေးစာ) ၁၂။ ဘယ်ဆီကိုများ ဒုန်းစိုင်းသွားနေ (ဘာသာပြန်) ၁၃။ အာရှသားများ စဉ်းစားနိုင်စေ (ဘာသာပြန်) ၁၄။ ကြောင်အိုပေမှေး ကိုက်ပါနဲ့လေး (ဘာသာပြန်) ၁၅။ ငါ့စိတ်ကို လာမစမ်းနဲ့နော် (ဘာသာပြန်) ၁၆။ သွေးဆုံးချိန်ခါ သိကောင်းစရာ (ဖတ်၊ ဆွေးနွေး၊ မေးမြန်းချက်) ၁၇။ ဟစ်သာငိုတော့ ချစ်တိုင်းပြည် (ဘာသာပြန်) ၁၈။ မီးငယ်တို့ အသိကြွယ်ဖို့ ၁၉။ ချစ်သူငယ်ချင်းအတွက် (ဘာသာပြန်) ၂၀။ ပျူငှာတဲ့ မူရာ (ထိန်းသိမ်းအပ်တဲ့ အမူအကျင့်) ၂၁။ တောသားလည်း ဟုတ်နိုင်ပေါင် ခင်ရယ် (ခရီးသွား) ၂၂။ အိပ်မက်အတူမက်ကြစို့ မနက်မလင်းခင် (ဝတ္ထုရှည်) ၂၃။ အကြောတည့်လား လျှာနဲ့သွား (ဘာသာပြန်) ၂၄။ တမြို့နှစ်စိတ် (ဘာသာပြန်) ၂၅။ ယောက်ျားသားချင်း ပွင့်ပွင့်လင်း ၂၆။ မိုးထိအောင် လှေကားထောင်နည်း (ဖတ်၊ ပြန်ဆွေးနွေး) ၂၇။ မိန်းမသားတို့ သိမ်းထားဖို့ ၂၈။ ပင့်ကူအိမ်မှတ်တမ်း (စာပေါင်းစုံ) ၂၉။ ကျွန်းပြန် ပီကင်းပြန် (ခရီးသွား) ၃၀။ မောဟရဲ့ မူလဘူတ (ဘာသာပြန်) ၃၁။ ဘဝအမောပြေဖို့ အဖြေရှာစို့ (Mandalay FM အသံလွှင့်ချက်တချို့ စုစည်းမှု) ၃၂။ တစ္ဆေကို ခံနဲ့ပေါက်မယ့် ဧရာမနှလုံးသား (နိုင်ငံခြားရုပ်ရှင်) ၃၃။ ချစ်သူ့ရင်ခွင် ရှာပုံတော် (ကိုယ်ရေး အတ္ထုပ္ပတ္တိငယ်) ၃၄။ ဗေဒင်ယုံတဲ့ အီတာလျံ (ဘာသာပြန်) ၃၅။ အကင်းပါးပါးနဲ့ သတင်းဝါ ဝကြပါစေသား (ဆွေးနွေးချက်) ၃၆။ ပြောလည်းပြောချင်တယ် ပြောလည်းမပြောရဲဘူး (ကြေးမုံသတင်းစာ ဆောင်းပါးတချို့ စုစည်းမှု) ၃၇။ ဖက်ဒရယ်ဝါဒ မိတ်ဆက် (ဘာသာပြန်) ၃၈။ နေပျော် ကြည်မြ ရွှင်လန်း တူရိယာ (အမှတ်စဉ် ၃ နှင့် ၅ ကို တပေါင်းတည်း ပြန်ထုတ်သည်)

အခြားလှုပ်ရှားမှုများပြင်ဆင်

ကုလသမဂ္ဂ ကလေးများ ရန်ပုံငွေ အဖွဲ့နှင့် တခြား နိုင်ငံတကာ အစိုးရ မဟုတ်သည့် အဖွဲ့အစည်း အသီးသီး အတွက် ဘာသာပြန်ပေးသည့် အလုပ်များ၊ အတိုင်ပင်ခံ အလုပ်များကို ဆောင်ရွက်ခဲ့သည်။ ကလေးများ ရန်ပုံငွေ အဖွဲ့က ကြီးမှူးကျင်းပသည့် "မွေးကင်းစမှ ခြောက်နှစ်အရွယ် ကလေးများအတွက် စာအုပ်ရေးသားနည်း သင်တန်း"၊ "တီထွင်ဆန်းသစ်သော မီဒီယာနှင့် ပစ္စည်း ပစ္စယများဖြင့် ကလေးငယ်များ၏ စောစောစီးစီး သင်ယူမှု စွမ်းအားများအား မြှင့်တင်ရေး သင်တန်း"၊ "မွေးကင်းစများ၊ ကလေး သူငယ်များနှင့်၊ သူတို့၏ မိသားစုများ အတွက် အလုံးစုံ ပါဝင်သော ဖွံ့ဖြိုး တိုးတက်မှုနှင့် မီဒီယာသင်တန်း၊" "လူထုအာဟာရ သင်တန်း" များကို လည်းကောင်း၊ ဗြိတိန်နိုင်ငံ ရာဇဝတ်မှုခင်း ထောက်လှမ်းရေး အဖွဲ့က ပို့ချသည့် "ကလေး သူငယ်များအား မဖွယ်မရာ ပြုကျင့်သူများအား ကိုင်တွယ် ဖြေရှင်းရေး" သင်တန်းကို လည်းကောင်း၊ အခြား စီမံခန့်ခွဲမှု သင်တန်းပေါင်းစုံ၊ ရှေးဦးသူနာပြုစုနည်း သင်တန်း၊ အဖွဲ့အစည်း ဖွံ့ဖြိုး တိုးတက်မှု သင်တန်း၊ ရပ်ရွာ အကျိုးငှာ သဘင်ပညာ သင်တန်းများကို တက်ရောက်ခဲ့သည်။ "မဲခေါင်ဒေသ အတွင်း လူကုန်ကူးမှုကို တိုက်ဖျက်သည့် ကုလသမဂ္ဂ အစီအစဉ်" နှင့် အတူ နိုင်ငံတကာ အစည်းအဝေးများကိုလည်း တက်ရောက်ကာ စကားပြန် အဖြစ် ဆောင်ရွက်ပေးခဲ့သည်။ နိုင်ငံခြား သံတမန် အဖွဲ့အစည်းများ၊ ကုလသမဂ္ဂ ဖွံ့ဖြိုးမှု အစီအစဉ်၊ ပြည်တွင်း စီးပွားရေး လုပ်ငန်းများ၏ ဝန်ထမ်များကိုလည်း စီမံခန့်ခွဲရေး သင်တန်းများ အခါအားလျော်စွာ ပို့ချခဲ့သည်။

ကိုယ်ပိုင်ဘဝပြင်ဆင်

မကွယ်လွန်မီ အချိန်အထိ ဇနီးသည်၊ သမီးတဦး၊ သားတဦးနှင့် အတူ ရန်ကုန်မြို့တွင် နေထိုင်သည်။ [၁]

ဘဝနိဂုံးပြင်ဆင်

၂၀၂၀ ခုနှစ် မတ်လ ၁၄ ရက်နေ့ ညနေ ၄ နာရီ ၂၀ မိနစ်တွင် နေအိမ်၌ နှလုံးရောဂါဖြင့် ရုတ်တရက်ကွယ်လွန်သည်။


ကိုးကားပြင်ဆင်

  1. Lettwebaw Books [atkbooks.wordpress.com] ဘလော့ စာမျက်နှာမှ