ထားဝယ်ပညာရေးကောလိပ်

ထားဝယ်ပညာရေးဒီဂရီကောလိပ်(အင်္ဂလိပ်: Dawei Education Degree College; DEC)သည် တနင်္သာရီတိုင်းဒေသကြီး၊ ထားဝယ်မြို့၊ ရှမ္မလည်ဆွဲရပ်ရှိ ပညာရေးဝန်ကြီးဌာန အဆင့်မြင့်ပညာဦးစီးဌာန လက်အောက်ခံ ပညာရေးကောလိပ်ကျောင်း ဖြစ်သည်။ ကျောင်းသားသမဂ္ဂ ရှိသည်။

၂၀၁၉ ဒီဇင်ဘာမှ စပြီး၊ နိုင်ငံတဝန်း ပညာရေးကောလိပ် ၂၅ ကျောင်းကို ပညာရေးဒီဂရီကောလိပ်အဖြစ် အဆင့်တိုးမြှင့်ရာ ထားဝယ်ပညာရေးကောလိပ်လည်း ပါဝင်သည်။ ယခင် ၂ နှစ်တက် ဒီပလိုမာရသော သင်တန်းမှ ၄ နှစ်သင်တန်းသို့ ပြောင်းလဲခဲ့သည်။

ဆင့်ကဲဖွံ့ဖြိုးတိုးတက်

နှစ်ပေါင်း (၉၇)နှစ်အတွင်း ဆင့်ကဲပြောင်းလဲမှုများမှာ အောက်ပါအတိုင်းဖြစ်သည်။

-၁၉၂၅ခု နှစ်မှ ၁၉၆၄ ခုနှစ်အထိ ခရစ်ယာန်သာသနာပြုကျောင်း အဖြစ်လည်းကောင်း /မော်ရိုးကရင် အထက်တန်းကျောင်း အဖြစ်လည်းကောင်း

-၁၉၆၄ ခုနှစ်မှ ၁၉၇၆ ခုနှစ်အထိ အထက(၄) ထားဝယ် အဖြစ်လည်းကောင်း

-၁၉၇၇ ခုနှစ် မေလ(၂၃)ရက်နေ့တွင် တနင်္သာရီတိုင်းဒေသကောလိပ် အဖြစ်လည်းကောင်း

-၁၉၈၀ပြည့်နှစ် ဧပြီလ (၁)ရက်နေ့တွင် ထားဝယ်ကောလိပ် အဖြစ်လည်းကောင်း

-၁၉၉၉ ခုနှစ် ဧပြီလ (၆)ရက်နေ့တွင် ထားဝယ်ဒီဂရီကောလိပ် အဖြစ်လည်းကောင်း

-၂၀၀၀ပြည့်နှစ် ဖေဖော်ဝါရီလ (၂၂)ရက်နေ့တွင် ထားဝယ်တက္ကသိုလ် အဖြစ်လည်းကောင်း

-၂၀၀၂ ခုနှစ် ဒီဇင်ဘာလ (၁၂)ရက်နေ့တွင် ထားဝယ်ပညာရေးကောလိပ် အဖြစ်လည်းကောင်း

-၂၀၂၀ပြည့်နှစ် ဩဂုတ်လ (၃၁)ရက်နေ့တွင် ထားဝယ်ပညာရေးဒီဂရီကောလိပ် အဖြစ်လည်းကောင်းဆင့်ကဲပြောင်းလဲခဲ့ပါသည်။

အဆောင်များ

• နီလာဆောင် (ပထမနှစ်များ)(ယခု ဖြိုဖျက်ပြီး)
• ပုလဲဆောင် (ဒုတိယနှစ်များ)(ယခု ပုလဲဆောင် ၁)
• ပုလဲဆောင် ၂
• သန္တာဆောင်
• တိုးချဲ့ဆောင်
• အဏ္ဏဝါဆောင်
• ပိတောက်ဆောင်
• ဗထူးဆောင်

သင်တန်း

ပညာရေးဒီဂရီကောလိပ် တခုတွင် လုပ်ငန်းခွင်အကြို ဆရာအတတ်သင် ဒီပလိုမာပညာသင်တန်းတက် ကျောင်းသားဦးရေ အနည်းဆုံး ၁၀၀၀ မှ အများဆုံး ၂၀၀၀ ထိ ပညာသင်ယူနိုင်သည်။

၂၀၁၉ ပညာသင်နှစ်တွင် ထားဝယ်ပညာရေးကောလိပ်၌ ဦးရေ ၅၀၀ ဝန်းကျင်သာ ရှိသည်။

လှုပ်ရှားမှု

၂၀၂၀ ဇန်နဝါရီတွင် အခြေခံပညာကျောင်းများဝယ် အတန်းငယ်များကို ဆယ်တန်းစာမေးပွဲ ပြီးစီးသည့် မတ်လ နှောင်းပိုင်းမှ ဖြေဆိုခိုင်းမည့် အစီအစဉ်ကို ကန့်ကွက်သည့် အနေဖြင့် ဖဲကြိုးစိမ်းလှုပ်ရှားမှုကို ပြုလုပ်၍ ဆန္ဒဖော်ထုတ်ခဲ့ကြသည်။