ဒုတိယ ကုလူပကသုတ်

ဒုတိယ ကုလူပကသုတ် သည် မြတ်စွာဘုရားဟောကြားတော်မူခဲ့သည့် သုတ္တန်တစ်ခု ဖြစ်သည်။ ဤသုတ္တန်တွင် မြတ်စွာဘုရားသည် အလွန်ကြာမြင့်စွာ ဒါယကာတို့နှင့် ရောနှော၍နေသော အိမ်သို့ကပ်တတ်သော ရဟန်း၏ အပြစ်ငါးမျိုးကို ဟောကြားတော်မူခဲ့သည်။

ဒုတိယ ကုလူပကသုတ်

ရဟန်းတို့ အလွန်ကြာမြင့်စွာ ဒါယာကာတို့နှင့် ရောနှော၍ နေသော, အိမ်သို့ ကပ်တတ်သော ရဟန်း၏ အပြစ်တို့သည် ဤငါးမျိုးတို့တည်း။ အဘယ်ငါမျိုးတို့နည်း ဟူမူ --

• မာတုဂါမအား မပြတ်တွေ့မြင်ရ၏။
• တွေ့မြင်သည်ရှိသော် နှီးနှောမိ၏။
• နှီးနှောမိသည်ရှိသော် အကျွမ်းဝင်၏။
• အကျွမ်းဝင်သည်ရှိသော် ရာဂသို့ သက်ဝင်၏။
• (ရာဂ) သက်ဝင်သောစိတ်ရှိသော ရဟန်းအား “မမွေ့လျော်ပဲလည်း မြတ်သော အကျင့်ကို ကျင့်ရလိမ့်မည်၊ ညစ်နွမ်းသော အာပတ် တမျိုးမျိုးသို့မူလည်း ရောက်ရလိမ့်မည်၊ သိက္ခာချ၍မူလည်း လူထွက်လိမ့်မည်” ဟူသော ဤအရာကို (မချွတ်ရလိမ့်မည်ဟု) မျှော်လင့်အပ်၏။

ရဟန်းတို့ အလွန်ကြာမြင့်စွာ ဒါယာကာတို့နှင့် ရောနှော၍ နေသော, အိမ်သို့ ကပ်တတ်သော ရဟန်း၏ အပြစ်တို့သည် ဤငါးမျိုးတို့တည်း ဟု (မိန့်တော်မူ၏)။