နားဂွစ် မားဖု

နားဂွစ် မားဖု (အင်္ဂလိပ်: Naguib Mahfouz; အာရပ်: نجيب محفوظ‎ Nagīb Maḥfūẓ, တမ်းပလိတ်:IPA-arz; ၁၁ ဒီဇင်ဘာ ၁၉၁၁ − ၃၀ ဩဂုတ် ၂၀၀၆) သည် အီဂျစ်လူမျိုး စာရေးဆရာဖြစ်သည်။ ၁၉၈၈ ခုနှစ်၏ စာပေနိုဘယ်ဆုကို ရရှိထားသည်။ ရှေးဟောင်းအာရပ်ကမ္ဘာမှ ခွဲထွက်ကာ သရုပ်မှန်ရေးသားရာ၌ တောဖစ် အယ်ဟာကင် နှင့် ခေတ်ပြိုင်တစ်ဦးအဖြစ် အာရပ်စာပေနယ်တွင် သတ်မှတ်ခြင်း ခံရသည်။ ဝတ္ထု (၃၄) ပုဒ်၊ ဝတ္ထုတို (၃၅၀) ကျော်နှင့် ဇာတ်ညွှန်း၊ ပြဇာတ်များစွာကို ရေးသားခဲ့သည်။ သူ၏လက်ရာအများစုကို အီဂျစ်နှင့် အခြားနိုင်ငံများတွင် ရုပ်သံရိုက်ကူးခဲ့ကြသည်။

နားဂွစ် မားဖု
မွေးဖွား	(1911-12-11)ဒီဇင်ဘာ ၁၁၊ ၁၉၁၁ ကိုင်ရိုမြို့၊ Khedivate of Egypt
ကွယ်လွန်	ဩဂုတ် ၃၀၊ ၂၀၀၆(2006-08-30) (အသက် ၉၄) ကိုင်ရိုမြို့၊ အီဂျစ်နိုင်ငံ
အလုပ်အကိုင်	ဝတ္ထုရေးဆရာ
နိုင်ငံလူမျိုး	အီဂျစ်လူမျိုး
ထင်ရှားသည့်လက်ရာများ	The Cairo Trilogy
ရရှိသည့်ဆုများ	စာပေနိုဘဲလ်ဆု (၁၉၈၈)

ငယ်ဘဝ

နားဂွစ်မားဖု (Naguib Mahfouz) ကို ၁၉၁၁ ခုနှစ်တွင် ၁၉၁၁ ခုနှစ်တွင် အီဂျစ်နိုင်ငံ၊ ကိုင်ရိုမြို့၌ ဖွားမြင်သည်။ မွေးဖွားပေးသော ဆရာဝန်ကြီ: နားဂွစ် ပါရှာ မားဖု (Naguib Pasha Mahfouz) ၏ အမည်ကို ပြန်လည်မှည့်တွင်စေခြင်း ဖြစ်သည်။ မိဘများမှာ လူလတ်တန်းစား အစိုးရအမှုထမ်းများ ဖြစ်သည်။ ယောက်ကျားလေး (၅) ယောက်၊ မိန်းကလေး (၂) ယောက်ရှိသည့် မောင်နှမတစ်စုတွင် အငယ်ဆုံးသား ဖြစ်သည်။

ကိုင်ရိုတက္ကသိုလ်မှ စာပေဆိုင်ရာဘွဲ့ ရရှိခဲ့သည်။ ၁၉၃၀ ခုနှစ်တွင် စာပေလောက၌ ခြေချသည်။ ရှေးဟောင်းဂန္ထဝင် အာရပ်ဘာသာဗေဒနှင့် အရပ်သုံးစကားပြောများကို ရောယှက်ကာ ခံစားမှုရသစာပေများ ဖန်တီးခဲ့သည်။ အထူးသဖြင့် သူ၏ ဝတ္ထုတိုများမှာ ထင်ရှားသည်။ အအောင်မြင်ဆုံးနှင့် အကောင်းဆုံးလက်ရာမှာ အစနှင့်အဆုံး (The Beginning and the End) ဖြစ်သည်။ ကိုင်ရိုမြို့သား ကုန်သည်ဘဝကို ဆွေစဉ်မျိုးဆက်သုံးဆက် တည်ဆောက်ရေးဖွဲ့သွားသော ဝတ္ထုရှည်ဖြစ်သည်။ ဝတ္ထုတိုပေါင်းချုပ်များအနက် ရူးသွပ်ခြင်း၏ တီးတိုးလေသံ (The Whisper of Madness) မှာ ထင်ရှားသည်။ ၁၉၇၆ တွင် ကိုင်ရိုမြို့၏ လမ်းတစ်ခုအကြောင်း ရေးဖွဲ့ထားသော မီဒါ့ လမ်းသွယ် (Midaq Alley) ကို အင်္ဂလိပ်ဘာသာသို့ ပြန်ဆိုထုတ်ဝေရာ အီဂျစ်စာပေတွင်သာမက ကမ္ဘာ့စာပေလောကအထိ ခြေဆန့်လာတော့သည်။ နောင်တွင် လေးစားအပ်သောအရှင် (Respected Sir) နှင့် အရက်သမားတေးများ (The Drunkard Sings) စာအုပ်တို့ကိုလည်း ပြန်ဆိုထုတ်ဝေခဲ့သေးသည်။

၁၉၇၀ ခုနှစ်တွင် အီဂျစ် အမျိုးသားစာပေဆုကို လည်းကောင်း၊ ၁၉၈၈ ခုနှစ်တွင် စာပေဆိုင်ရာ နိုဘယ်ဆုကို လည်းကောင်း ရရှိခဲ့သည်။ ထို့အပြင် ဆိုဗီယက်၊ ပြင်သစ်နှင့် ဒိန်းမတ်နိုင်ငံများကလည်း ဂုဏ်ထူးဆောင်ဘွဲ့များ ချီးမြှင့်ခဲ့သေးသည်။ နိုဘယ်ဆုရချိန်တွင် အသက် (၇၇) နှစ် ရှိပြီဖြစ်သည်။

ဘဝနိဂုံ:

မားဖု၏ ဝတ္ထုတစ်ပုဒ်ဖြစ်သော ဂီဘယ်လာဝီမှ ကလေးများ (Children of Gebelawi) စာအုပ်တွင် မိစ္ဆာအယူအဆများ ပါဝင်သည်ဟု သုံးသပ်ကာ ဘာသာရေးအစွန်းရောက်များ၏ ရန်ရှာခြင်းကို ခံရသည်။ ရဲအစောင့်အရှောက်များ ထားရှိသော်လည်း ၁၉၉၄ ခုနှစ်တွင် ကိုင်ရိုရှိ နေအိမ်အပြင်ဘက်၌ လည်ပင်းအား ဓားဖြင့်ထိုးခြင်း ခံရသည်။ အသက်မသေသော်လည်း ညာဘက်လက်အား အာရုံကြောထိခိုက်သွားခြင်းကြောင့် အချိန်ကြာကြာ စာရေးခြင်း မပြုနိုင်တော့ပေ။ အထက်ပါ ဖြစ်ရပ်အပြီ:တွင် သက်တော်စောင့် ငှားရမ်းခဲ့ရသည်။ လုပ်ကြံမှုအပြီးတွင် ၎င်း၏ ရှေ့နေဖြစ်သူ နာဘီ မိုနာ ဟာဘစ် (Nabil Mounir Habib) ထံသို့ ပြောင်းရွေ့သည်။ ထိုသို့ပြောင်းရွေ့ခြင်းသည် မားဖု၏ နောက်ဆုံးခေါင်းချရာ ဖြစ်လာသည်။

မြန်မာဘာသာသို့ ပြန်ဆိုမှုများ

မားဖု၏ အောက်ပါဝတ္ထုတိုများကို မြန်မာစာရေးဆရာ မြသန်းတင့်က မြန်မာဘာသာသို့ ပြန်ဆိုထုတ်ဝေထားသည် −

• စွန့်စားခန်းနှင့် အချစ်ဇာတ်လမ်းတစ်ပုဒ် (The Conjurer Made off with the Dish)
• မပေးချင်သော အဖြေ (The Answer Is No)
• အဖေ့မယား (The Lawsuit)
• ကမ္ဘာကုန် ကျယ်သရွေ့ (Halt A Day)
• ကြွက်များ (The Norwegian Rat)
• ဘဝရှင်မင်းတရားကြီ: (His Majesty)
• မြောင်းထဲက လူ (The Ditch)
• ပျောက်စေဆရာ (Zaabalawi)
• ဟာလာဟင်းလင်းကဖေးဆိုင် (The Empty Cafe)
• မင်္ဂလာည (Blessed Night)
• သူနှင့် အခြားသောသူ (The Man and the Other Man)
• အမည်မသိသော (By a Person Unknown)