ရှင်အာလောက

ရှင်အာလောက (၁၁၈၃ − ၁၂၅၇) သည် မြတောင်ဆရာတော်ဟု ထင်ရှားသည့် ကျမ်းပြုဆရာတော် ဖြစ်သည်။

ဘဝ

ဆရာတော်ကို ၁၁၈၃ ခုနှစ်၊ နတ်တော်လပြည့်ကျော် ၅ ရက်၊ တနင်္ဂနွေနေ့တွင် ဖွားမြင်ခဲ့သည်။ ငယ်စဉ်က သင်္ဂဇာဆရာတော်ထံတွင် ပညာသင်ကြားခဲ့၍ ရဟန်းပြုခဲ့သည်။

၁၂၃၆ ခုနှစ်တွင် မင်းတုန်းမင်းသည် မန္တလေးတောင်ခြေ၌ မဏိသေလာရာမမြတောင်တိုက်ဆောက်လုပ်ကာ ကိုးကွယ်ခဲ့သည်။ သမီးတော် မြတောင်မင်းသမီး (သီပေါမင်း၏ မိဖုရားခေါင်ကြီးအားလည်း ၉ နှစ်အရွယ်ကပင် ကိုးကွယ်စေခဲ့သည်။ မြတောင်မင်းသမီးသည် မိဖုရားကြီး ဖြစ်ခဲ့သော် ၁၂၄၄ ခုနှစ်တွင် မန္တလေးမြို့တော် အနောက်ပြင်၌ မဏိရတနာရာမ မြတောင်တိုက်ကို ဆောက်လုပ်ကာ လှူဒါန်းခဲ့သည်။ ဤကျောင်းတိုက်ကို ဆောက်လုပ်သည့် ကုန်ကျစရိတ်အရပ်ရပ်သည် ၅၄၇၆၈၅၆ ကျပ် ဖြစ်သည်။

ဆရာတော်သည် မင်းတုန်းမင်းလက်ထက်တွင် “အာလောကာဘိဝရ သာသနရက္ခမဟာဓမ္မရာဇာဓိရာဇဂုရုတံဆိပ်တော်” နှင့် သီပေါမင်းလက်ထက်တွင် “အာလောကာဘိဝရသာသနရက္ခမဟာဓမ္မရာဇာဓိရာဇဂုရုတံဆိပ်တော်”၊ “အာလောကာဘိဝရအတုလာဓိပတိသီရိ ပဝရမဟာဓမ္မရာဇာဓိရာဇာဂုရုတံဆိပ်တော်” များ ရခဲ့သည်။

ပျံလွန်တော်မူခြင်း

ဆရာတော်သည် ၁၂၅၇ ခုနှစ်၊ သက်တော် ၇၄ နှစ်တွင် ပျံလွန်တော်မူခဲ့သည်။

တပည့်များ

ဆရာ၏ တပည့်များမှာ ရှင်ပဏ္ဍဝံသ (ဒုတိယမြတောင်ဆရာတော်)၊ ရှင်သုမန၊ ရှင်တေဇော၊ ရှင်ကုမာရနှင့် တံဆိပ်တော်မရ ရှင်ပညာသာမိ၊ ရှင်ကဝိန္ဒ၊ ရှင်ကုမာရတို့ ဖြစ်သည်။

ပြုစုခဲ့သည့် ကျမ်းများ

ဆရာတော်သည် အောက်ပါကျမ်းများကို ပြုစုတော်မူခဲ့သည်။

၁။ ဗာလာဝတာရစာကိုယ်နိသျ၊

၂။ လိင်္ဂမာလာ၊

၃။ နာမရူပမာလာ၊

၄။ သမာသပဒမာလာ၊

၅။ တဒ္ဓိတပဒမာလာ၊

၆။ အာချာတပဒမာလာ၊

၇။ ကိတပဒမာလာ၊

၈။ ဂဏသံသဂ္ဂဓာတ်စဉ်၊

၉။ ရူပကာသနီ။