ပြုဗ္ဗာသဠ်နက္ခတ်

ပြုဗ္ဗာသဠ်နက္ခတ် မှာ ဥတ္တရာသဠ်နက္ခတ်နှင့် ပေါင်း၍ ဆင်မလှမ်းဟန် လေးလုံးရှိကြောင်းဆိုသည်။ ထိုနက္ခတ်ကို တောယရေနတ် အစိုးရကြောင်းလည်းဆိုသည်။ ဤနက္ခတ်သည် ဆင်တာရာနှင့် ယှဉ်၍ သွား၏။

၁၄။ ပုဗ္ဗသဠ-ပြုဗ္ဗာသာဠ်နက္ခတ်

ရာဇမတ္တဏ်ကျမ်း၌ “ပုဗ္ဗာသဠှော၊ ပြုဗ္ဗာသာဠ်။ ဇလဝယော၊ ပြုဗ္ဗာသာဠ်”ဟူ၍ ပရိယာယ်နှစ်ပုဒ်ပြုပြီး အဘိဓာန် ဋီကာ၌မူ “ဘတီနံ၊ သူရင်းငှား ကိုယ်ခစားတို့၏။ ဒဏ္ဍော၊ တုတ်တောင်ဝှေးသည်။ အာသဠှောနာမ၊ အာသဠှ မည်၏။ တံသဏ္ဌာနတ္တာ၊ ထိုသူရင်းငှား ကိုယ်ခစား နွားကျောင်းသားတို့၏ တုတ်တောင်ဝှေး သဏ္ဌာန်ရှိသောကြောင့်။ အာသဠှာနာမ၊ အာသဠှနက္ခတ်မည်၏”ဟူ၍ တွေ့ရပေသည်။ အမရကောသ-သက္ကဋအဘိဓာန်၌လည်း “ဖလာဂေါ၊ ပေါက်သားဖြင့် ပြုအပ်သော။ ဗြတေ၊ ရသေ့ ရဟန်းတို့၏။ ဒဏ္ဍ၊ တောင်ဝှေးသည်။ အာပါလော၊ အာပါလမည်၏”ဟု ပြုဗ္ဗာသာဠ် နက္ခတ်ကို ပြဆိုပါသည်။

ထိုနက္ခတ်၏လုံးရေနှင့် အဆင်းသဏ္ဌာန်ကို အောက်ပါအတိုင်း တွေ့ရပေသည်။

• -ပေါတ္တရသာဒိကျမ်း ပြုဗ္ဗာသာဠ်၊ ဥတ္တရာသာဠ် နှစ်လုံးမှ ကြယ် (၄) လုံး၊ ဗိတာန်သဏ္ဌာန်
• -ဂြဟသျှန္တီကျမ်း (၂) လုံး၊ သဏ္ဌာန်မပါ
• သေနင်္ဂဗျူဟာကျမ်း (၂) လုံး၊ သဏ္ဌာန်မပါ
• -လဃုသင်္ဂြဟကျမ်း (၂) လုံး၊ ဆင်စွယ်သဏ္ဌာန်
• -အာကာသသျှတ္တရကျမ်း(ပြုဗ္ဗာသာဠ် ဥတ္တရာသာဠ် နက္ခတ်နှစ်လုံး ပေါင်း (၄) လုံး၊ ဆင်မလှမ်းဟန်
• -သိင်္ဃဗောဓကျမ်း (၄) လုံး၊ သဏ္ဌာန်မပါ
• -ကပ္ပဝဏ္ဏနာကျမ်း (ပြုဗ္ဗာသာဠ် ဥတ္တရာသာဠ် နက္ခတ်နှစ်လုံးပေါင်း (၄) လုံး၊ ဆင်ခြေလက်သဏ္ဌာန်
• -ရွှေမင်ရေး ပုရပိုက်ဖြူ (၂) လုံး၊ ခြင်္သေ့ဖိုသဏ္ဌာန်
• -နက္ခတ်လင်္ကာ လုံးရေမပါ၊ ဆင်မလှမ်းဟန်

မိုးတွင်းကာလ ခါသမယ၌ ထိုနက္ခတ်နှင့် စန်းယှဉ်လျှင် ထိုနေ့ မိုးကြိမ်းတည်း။ မလွဲမုချ မိုးရွာတတ်၍။ ပြုဗ္ဗာသာဠ် ဆင်ထိုက်ဟု ရှေးသူဟောင်းတို့ ဆိုရိုးပြုသည်။

ပြုဗ္ဗာသာဠ်နက္ခတ်ကို တောယမည်သော ရေနတ် အစိုးရကြောင်း ရာဇမတ္တဏ်ကျမ်းက ဆိုပါသည်။