ဖရန့်ဇ ဟား

ဟားဖရန့်ဇ (ခရစ် ၁၅၈ဝ· ၁၆၆၆)

ကမ္ဘာကျော်နယ်သာလန် ပုံတူရေးပန်းချီကျော်များအနက် ဖရန့်ဇဟားလည်း အပါအဝင်ဖြစ်သည်။ စင်စစ်သော်ကား ဖရန့်ဇဟားသည် နယ်သာလန်နိုင်ငံတွင် ပန်းချီကျော်ရမ်းဗရန့်နောက်အထင်ရှားဆုံးသော ပန်းချီကျော် တစ်ဦးဖြစ်သည်။

သူ့ကိုနယ်သာလန်နိုင်ငံ အန့်တဝပ်မြို့တွင် ၁၅၈ဝ ပြည့်၊ သို့မဟုတ် ၁၅၈၁ ခုနှစ် တွင်မွေးဖွားခဲ့သော်လည်း ဟာလင်မြို့၌သာ အနေများလေသည်။ ၁၆၁၆ ခုနှစ်မှစ၍ ပန်းချီကားများ ဆွဲခဲ့သည်။ သူ့ခေတ်ကအတော်ပင် ကျော်ကြားခဲ့သော်လည်း အစဉ်သဖြင့်ငွေကြေးပြဿနာနှင့် ရင်ဆိုင်ခဲ့ရလေသည်။ ထိုသို့ဖြစ်ရသည်မှာသူ့တွင် သားသမီးများပြားခြင်းကြောင့်ဖြစ်သည်။ သို့သော် နောက်တွင်သူ့ကို ဟာလင်မြို့သူမြို့သားများက ငွေကြေးကူညီပေးကမ်းသဖြင့် ချောင်လည်ခဲ့ရသည်။ ဖရန့်ဇဟားသည် ၁၆၆၆-ခုနှစ်တွင် ကွယ်လွန်သည်။

ဟားသည် အဆင့်အတန်းအမျိုးမျိုးမှ လူများ၏ ပုံတူရုပ်များကိုရေးဆွဲခဲ့သော်လည်း လူစုလူဝေးနှင့် နေထိုင်ပုံများကိုရေးဆွဲရာတွင်အထူးသဖြင့်လူကြိုက် များလေသည်။ ဟားသည် ပုံတူရေးပန်းချီဆရာအဖြစ် အထူးထင်ရှားကျော်ကြားသည်ဖြစ်ရာ များသောအားဖြင့် လုပ်သားပြည်သူလူထုထဲမှလူများ၏ ပုံတူများကို ရေးဆွဲခဲ့သည်။ ခပ်ရွှင်ရွှင်ရုပ်ပုံတို့သာများသည်။ သဘာဝအလှအပဟူသည် နန်းတွင်းတွင်သာတွေ့ရသည်မဟုတ်၊တောတောင်ရေမြေနှင့်လူထုထဲတွင်လည်း တွေ့ရှိနိုင်ကြောင်းဖော်ပြခဲ့လေသည်။ ဟား၏လက်ရာပန်းချီကားပုံပေါင်း၂၈ဝခန့် ကျန်ရှိခဲ့သည့်အနက်အထင်ရှားဆုံးမှာရယ်နေသောမြင်းသည် တော်ပန်းချီကားဖြစ်သည်။ အခြားထင်ရှားသော ပန်းချီကားများမှာလာဗိုဟီမီယန်၊ဟာလင်ကစုန်းမဟီလီဗော့ဗီ၊နှင့်စိန်အင်ဒရူး၏အရာရှိများစသည်တို့ဖြစ်လေသည်။