ဘယသုတ်

(၇)သုတ် ရှိပါသည်။

ဘုရားရှင် ကောသလနိုင်ငံ ... သီတင်းသုံးတော်မူစဉ် ကျူပိုးအိမ်၊ မြက်မိုးအိမ်မှ လွင့်စင်လာသောမီးသည် အတွင်းအပ၌ လိမ်းကျံထားအပ်ကုန်သော၊ ပြင်ပလေ မဝင်ကုန်သော တံခါးတို့ကို စေ့စေ့စပ်စပ် ပိတ်ထားအပ်ကုန်သော လေသောက် ပြတင်းတို့ကို ပိတ်ထားအပ်ကုန်သော၊ စုလစ်မွန်းချွန်အထွတ်ရှိသော အိမ်ကြီး အိမ်ကောင်းတို့ကို လောင်ကျွမ်းစေကုန်သကဲ့သို့ ဘယ၊ ဥပဒ္ဒဝ၊ ဥပသဂ္ဂ အားလုံးတို့သည် ဗာလတို့ကြောင့်သာ ဖြစ်ပေါ်လာကုန်၏။ ပဏ္ဍိတကြောင့် မဖြစ်ပေါ်ကုန်ဟု ရဟန်းတို့အား ဘုရားရှင်ဟောတော်မူသည့်သုတ်။

အဋ္ဌကထာ, ဋီကာတို့၌ မှတ်သားဖွယ်တို့ကို ပြည့်ပြည့်စုံစုံ ဖွင့်ထားပါသည်။

---

ဘုရားရှင် ကောသလနိုင်ငံ ... သီတင်းသုံးတော်မူစဉ် အဿုတဝန္တပုထုဇဉ်များ ပြောဆိုနေသော “အမာတာပုတ္တိကဘေး သုံးမျိုး၊ သဘာဝအမာတာပုတ္တိကဘေး သုံးမျိုးတို့နှင့် သဘာဝအမာတာပုတ္တိကဘေးတို့ကို ကျော်လွန်နိုင်သော မဂ္ဂင်ရှစ်ပါးတို့ကို တစ်မျိုးစီ တစ်မျိုးစီ အကျယ်ဝေဖန်၍ ရဟန်းတို့အား ဘုရားရှင်ဟောတော်မူသည့်သုတ်။

အဋ္ဌကထာ, ဋီကာတို့၌ မှတ်သားဖွယ်ဖွင့်ဆိုချက်များရှိပါသည်။

---

ဘုရားရှင် ကောသလနိုင်ငံ ... သီတင်းသုံးတော်မူစဉ် ဇာတိ၊ ဇရာ၊ ဗျာဓိ၊ မရဏ-ဟူသော ဘေးလေးမျိုးကို ရဟန်းတို့အား ဘုရားရှင်ဟောတော်မူသည့်သုတ်။

---

ဘုရားရှင် ကောသလနိုင်ငံ ... သီတင်းသုံးတော်မူစဉ် အဂ္ဂိ၊ ဥဒက၊ ရာဇ၊ စောရ-ဟူသော ဘေးလေးမျိုးကို ရဟန်းတို့အား ဘုရားရှင်ဟောတော်မူသည့်သုတ်။

---

ဘုရားရှင် ကောသလနိုင်ငံ ... သီတင်းသုံးတော်မူစဉ် ဘယ၊ ဒုက္ခ၊ ရောဂ၊ ဂဏ္ဍ၊ သင်္ဂ၊ ပင်္က-ဟူသော အမည်တို့သည် ငါးဖြာအာရုံ ကာမဂုဏ်တို့၏ အမည်တို့ ပေတည်း။

ကာမရာဂဖြင့် တပ်မက်မောသော ဆန္ဒရာဂဖြင့် ဖွဲ့စပ်အပ်သော သတ္တဝါသည် ဒိဋ္ဌဓမ္မိကဘယ၊ သမ္ပရာယိဘယ (ဒုက္ခ၊ ရောဂ၊ ဂဏ္ဍ၊ သင်္ဂ၊ ပင်္က)မှ မလွတ်မြောက် နိုင်ပုံ တစ်ပါးစီ တစ်ပါးစီကို ရဟန်းတို့အား ဘုရားရှင် ဟောတော်မူသည့်သုတ်။

ဇာတိ၊ မရဏတို့ကို ဖြစ်စေတတ်သော ဥပါဒါန်တရားတို့ကို ဘေးဟုရှုမြင် ခြင်းကြောင့် ဇာတိ၊ မရဏတို့၌ ကုန်ရာဖြစ်သော ဥပါဒါန်တို့ မရှိခြင်းကြောင့် ဘေးဒုက္ခ တို့မှ လွတ်မြောက်ကြကုန်၏။

ဘေးတို့၏ကုန်ရာ နိဗ္ဗာန်သို့ရောက်ကုန်ပြီးသော ချမ်းသာသောစိတ်ရှိကြကုန်သော မျက်မှောက်ဘဝ၌ ဘေးဒုက္ခတို့ ငြိမ်းအေးကြကုန်ပြီးသော အလုံးစုံသော ရန်ဘေးတို့ကို လွန်ကုန်ပြီးသော ထိုရဟန္တာပုဂ္ဂိုလ်တို့သည် ဒုက္ခအားလုံးကိုလွန်မြောက်ကြကုန်ပြီဟု ဝိဝဋ္ဋကထာကို ဟောတော်မူပါသည်။

---

ဘုရားရှင် ကောသလနိုင်ငံ ... သီတင်းသုံးတော်မူစဉ် ဘယ၊ ဒုက္ခ၊ ရောဂ၊ ဂဏ္ဍ၊ သလ္လ၊ သင်္ဂ၊ ပင်္က၊ ဂဗ္ဘ-ဟူသော အမည်သည် ကာမဂုဏ်၏ အမည်တည်းဟု အထက်သုတ်တော်အတိုင်း ဝဋ္ဋကကထာ၊ ဝိဝဋ္ဋကထာကို ရဟန်းတို့အား ဘုရားရှင် ဟောတော်မူသည့်သုတ်။

---

ဘုရားရှင် ကောသလနိုင်ငံ ... သီတင်းသုံးတော်မူစဉ် အရိယာသာဝကသည် ပါဏာတိပါတ အစရှိသော ဘယ၊ ဝေရ ငါးပါးတို့ ငြိမ်းအေးပြီးပုံ၊ သောတာပတ္တိယင်္ဂ တရားလေးပါးနှင့် ပြည့်စုံပုံ၊ ပဋိစ္စသမုပ္ပါဒ အနုလောမ ပဋိလောမဉာယကို ပညာဖြင့် ကောင်းစွာမြင်ပြီးပုံ ထိုးထွင်း၍သိပြီးပုံ၊ အလိုရှိလျှင် “ခီဏနိရယ၊ ခီဏတိရစ္ဆာနယောနိ၊ ခီဏပေတ္တိဝိသယ၊ ခီဏာပါယဒုဂ္ဂတိဝိနိပါတ၊ သောတာပန္န၊ အဝိနိပါတဓမ္မ နိယတ၊ သမ္ဗောဓိပရာယဏဖြစ်ပြီ”ဟု ပြောဆိုနိုင်ပုံတို့ကို အသီးအသီး အကျယ်တဝင့် အနာထပိဏ်သူဌေးအား ဘုရားရှင် ဟောတော်မူသည့်သုတ်။

(ဤသုတ်ကို အံ၊၃၊၂၀၅-၌ ဝေရသုတ်၊ သံ၊၃၊၃၃၈-၌ ဘယဝေရူပ သန္တသုတ်-ဟုလည်းကောင်း တွေ့နိုင်ပါသည်။)