ရေဝတီ

ရေဝတီ သည် နာလကရွာ၌ နေထိုင်သည့် အမျိုးသမီးတစ်ဦး ဖြစ်သည်။ ရေဝတီသည် အသျှင်သာရိပုတြာ၏ သာဓုကီဠနသဘင်ဆင်ယင်ကျင်းပသည့်ပွဲ၌ သေဆုံးခဲ့ကာ နတ်ပြည်တွင် နတ်သမီးဖြစ်ခဲ့သူတစ်ဦး ဖြစ်သည်။

ဘဝဇာတ်ကြောင်း

အသျှင်သာရိပုတြာသည် နေအိမ်ပြာသာဒ်ထက်ရှိ ဖွားမြင်ခဲ့ရာ တိုက်ခန်းတွင်ပင် ပရိနိဗ္ဗာန်ပြုလေ၏။ ထိုအခါ နာလကရွာတွင် မထေရ်၏ သာဓုကီဠနသဘင်ကို စည်ကားစွာ ကျင်းပလေ၏။ ထိုသဘင်ပွဲသို့ လူအများ နတ်အများ လာရောက်ကာ ရှိခိုးပူဇော်ကြ၏။

ထိုအထဲတွင် မထေရ်မြတ်၏ ဒါယကာမတစ်ဦးဖြစ်သည့် ရေဝတီဟု အမည်ရသည့် အမျိုးသမီးသည်လည်း ရှိခိုးပူဇော်ရန်အတွက် ရွှေပန်းအိုးသုံးအိုးတို့ဖြင့် သဘင်ကျင်းပရာသို့ ရောက်လာ၏။ ထိုအခါ သိကြားမင်းသည် လူ့ပြည်သို့ မထေရ်အား ပူဇော်ရန် ဆင်းလာချိန် ဖြစ်၏။ လူအုပ်ကြီးသည် သိကြားမင်းဆင်းလာသဖြင့်‌ နောက်သို့ဆုတ်လေရာ ကိုယ်ဝန်လွယ်ထားရသူဖြစ်သည့် ရေဝတီသည် အများကဲ့သို့ မဆုတ်နိုင်သဖြင့် ထိုနေရာတွင်ပင် လူအနင်းခံရကာ ဆုံးပါးကွယ်လွန်ခဲ့၍ နတ်သမီးဖြစ်ခဲ့သည်။

နတ်သမီးဘဝ

ရေဝတီနတ်သမီး၏ ခန္ဓာကိုယ်သည် ရတနာတုံး ရတနာစိုင်ကြီးကဲ့သို့ ဖြစ်ကာ သုံးဂါဝုတ်ခန့် ပမာဏရှိသည်။ အဆင်တန်ဆာတို့သည် လှည်းအစီး ခြောက်ဆယ်ခန့် ရှိ၏။ အခြံအရံ နတ်သမီး တစ်ထောင်ရှိ၏။

ရေဝတီနတ်သမီးသည် မိမိနတ်သမီးဖြစ်လာသည်ကိုပင် ချက်ချက်မသိရှိဘဲ အခြံအရံနတ်သမီးတို့က ကိုယ်လုံးပေါ်မှန်ကို ပြသသည့်အခါမှ နတ်သမီးဖြစ်ကြောင်း သိလေသည်။