ဝတ်ပြုခန်း

ဝတ်ပြုခန်း (အင်္ဂလိပ်: chapel) သည် ခရစ်ယာန်ဘာသာဝင်တို့ ဝတ်ပြုဆုတောင်းသည့် နေရာဖြစ်သည်။ အများအားဖြင့် အခန်းငယ် ဖြစ်၏။ အပူဇော်ခံစင်ရှိသော ဘုရားကျောင်းအတွင်းရှိ အခန်းငယ်ကို ဝတ်ပြုခန်း ခေါ်သည်။ ဘုရားကျောင်းများ၌ လေဒီချာပယ် (Lady chapel) ခေါ်သော မယ်တော်မာရီအား ဝတ်ပြုသည့်နေရာမှာ ဝတ်ပြုခန်း ဖြစ်လေ၏။ ဝတ်ပြုနိုင်သော်လည်း အပူဇော်ခံစင်မရှိ၊ သတ်သတ်မှတ်မှတ် ပူဇော်ရမည့် ရည်ညွှန်းမရှိသော အခန်းငယ်ကိုလည်း ဝတ်ပြုခန်းပင် ခေါ်သေးသည်။ ထိုနေရာမျိုးမှာ အဆောက်အဦကြီး၊ နေရာကြီးတို့၏ အစိတ်အပိုင်းငယ်အဖြစ် ထည့်ထားတတ်၏။ ဥပမာ ဆေးရုံ၊ ကောလိပ်၊ ကျောင်း၊ သင်္ချိုင်း၊ လေဆိပ်၊ ခရီးသည်တင်သင်္ဘော စသည်တို့တွင်ဖြစ်၏။ တဖန် အလှမ်းဝေးပြီး ဘုရားကျောင်းနှင့်လှမ်းသော နေရာမျိုးတွင် ဘုရားကျောင်းကဖြစ်စေ၊ ဘုရားစာသင်ကျောင်းမှဖြစ်စေ ဦးစီး၍ ၎င်းအလှမ်းဝေးနေရာ၌ ဆောက်သည့် အဆောက်အဦငယ်ကို ဝတ်ပြုခန်း တနည်း ဝတ်ပြုလွယ်ခန်း (chapel of ease) ပင် ခေါ်သည်။ ဤအမျိုးအစားတို့၏ အဓိကလက္ခဏာမှာ ဦးဆောင်ပေးသည့် အမြဲတမ်းနေ ဘုန်းတော်ကြီး မရှိခြင်း ဖြစ်၏။

လန်ဒန်ရှိ စိန့်မိုက်ကယ်နှင့်စိန့်ဂျော့ဘုရားကျောင်းအတွင်းမှ စိန့်ပေါအတွက် ဝတ်ပြုခန်း

သမိုင်းကြောင်းအရ ဝတ်ပြုခန်းဟူသည့် ဝေါဟာရကို ဗြိတိန်၌ အစိုးရအား အသိမပေးဘဲ တည်ဆောက်ထားသော ဘုရားကျောင်းကိုလည်း ခေါ်ဝေါ်သုံးစွဲဖူး၏။ သို့သော် ယင်းဘုရားကျောင်းတို့မှာ အခမ်းအနားဝင်ဘုရားကျောင်းမျှပင် ကြီးကျယ်နေတတ်သည်။