သို့ ... ကျွန်မကြိုက်ဖူးတဲ့ ကောင်လေးများ
သို့ ... ကျွန်မကြိုက်ဖူးတဲ့ ကောင်လေးများ (အင်္ဂလိပ်: To All the Boys I've Loved Before) သည် အမေရိကန် စာရေးဆရာမ ဂျန်နီဟန် ရေးသားသည့် လူငယ်ကြိုက် အချစ်ဝတ္ထုတစ်ပုဒ် ဖြစ်သည်။ ၂၀၁၄ ခု၊ ဧပြီ ၁၅ ရက်တွင် ဆိုင်မွန်အင်ရှုစတာ စာအုပ်တိုက်မှ ပထမအကြိမ်ထုတ်ဝေသည်။ နောက်ဆက်တွဲနှစ်အုပ်ဖြစ်သော "မှတ်ချက် ... နင့်ကို ချစ်နေတုန်းနော်" ကို ၂၀၁၅ ခု၊ မေလ ၂၆ ရက်တွင် လည်းကောင်း၊ "ထာဝရနဲ့ အမြဲတမ်းရှိနေမယ့် လာရာဂျင်း" ကို ၂၀၁၇ ခု၊ မေလ ၂ ရက်တွင် လည်းကောင်း ထုတ်ဝေခဲ့သည်။
| စာရေးသူ | ဂျန်နီဟန် |
|---|---|
| နိုင်ငံ | အမေရိကန် |
| ဘာသာစကား | English |
| အမျိုးအစား | လူငယ်ကြိုက် |
| ထုတ်ဝေသူ | ဆိုင်မွန်အင်ရှုစတာ |
ထုတ်ဝေသည့်ရက် | April 15, 2014 |
| မီဒီယာ အမျိုးအစား | ပုံနှိပ် (အဖုံးမာ, အဖုံးပျော့) |
| စာမျက်နှာ | ၃၈၈ |
| ISBN | 978-1442426719 |
| နောက်ထွက်စာအုပ် | မှတ်ချက် ... နင့်ကို ချစ်နေတုန်းနော် |
ဇာတ်လမ်းအကျဉ်း
ပြင်ဆင်ရန်လာရာဂျင်း (Lara Jean Song Covey) မှာ ကော့ကေးရှန်းသွေး တစ်ဝက်၊ ကိုရီးယားသွေး တစ်ဝက်ရောသော အသက် ၁၆ နှစ်အရွယ် ကလေးမ ဖြစ်သည်။ ညီအစ်မ သုံးယောက်မှာ ဆိုးတိုင်ပင်ကောင်းတိုင်ပင်များ ဖြစ်သည်။ ဆုံးပါးသွားသော မိခင်ဖြစ်သူပေးသည့် ဦးထုပ်ဘူးတွင် သူကြိုက်သောကောင်လေးများအား ရည်းစားစာရေးကာ ထည့်သိမ်းလေ့ရှိသည်။ လာရာဂျင်းအစ်မ မားဂေါ့ (Margot) စကော့တလန်၌ တက္ကသိုလ် သွားတက်သောအခါ အိမ်နားမှ သူ့ရည်းစား ဂျို့ (Josh Sanderson) နှင့် လမ်းခွဲသွားသည်။ ဂျို့အား တစ်ဖက်သက်ကြိုက်နေသည့် လာရာဂျင်းမှာ သူ့၌ ဝေဒနာ ပိုတိုးနိုင်ကြောင်း သဘောပေါက်သည်။ ထိုဒဏ်ရာအား ဖြေဖျောက်ရန် ပြန်စာ ထပ်ရေးပြန်သည်။ စာရေးဖူးသည့် ပီတာ (Peter Kavinsky) က လာရာဂျင်းအား စိတ်မဝင်စားကြောင်း လာပြောသည်။ လာရာဂျင်း စိတ်ရှုပ်သွားသည်။ နောင်သော်မှ လွန်ခဲ့သောနှစ်များစွာက သူရေးဖူးသောစာ ပီတာထံ ရောက်နေကြောင်း သိရသည်။ ခြောက်ခြောက်ခြားခြားဖြင့် အရင်က ရေးထားခြင်းသာဖြစ်ကြောင်း ပြောရသည်။ ခုနှစ်တန်းအရွယ်က အုပ်စုဖွဲ့စကားစဉ် ပီတာက သူ့ကိုနမ်း၍ စိတ်ကူးယဉ်ကာ ရေးထားမိကြောင်းသာဖြစ်သည်ဟု ဖြေရှင်းသည်။ အိမ်သို့ရောက်သော် ဦးထုပ်ဘူးအား ရှာမတွေ့။ နောက်တစ်နေ့နံနက်၌ ဂျို့ရောက်လာပြီး စာအကြောင်း မေးသည်။ မည်သို့မှ မခံစားရတော့ကြောင်းနှင့် အခြားသူတစ်ယောက်နှင့် တွဲနေကြောင်း လိမ်လိုက်သည်။ မည်သူဖြစ်ကြောင်းမေးရာ ဟောလမ်းမှလျှောက်လာသည့် ပီတာကိုတွေ့၍ ပီတာဖြစ်သည်ဟု ပြောလိုက်သည်။ ဂျို့ရှေ့၌ပင် ပီတာအား လက်မောင်းကိုဆွဲကာ နမ်းပြလိုက်သည်။ နောက်မှ ပီတာအား အခြေအနေကို ရှင်းပြရသည်။ ပီတာမှာလည်း သူ့ရည်းစား ဂျန်နီဗီ (Genevieve) နှင့် ပြတ်ပြတ်စဲစဲ ဖြစ်ချင်၍ လာရာဂျင်းအကြံကို သဘောတူသည်။ လာရာဂျင်းနှင့် ပီတာတို့ အများရှေ့တွင် နေထိုင်ရမည့် အခြေခံစည်းမျဉ်းများ သတ်မှတ်ကြသည်။ အချိန်ကြာလေလေ သူ့စိတ်ကိုသူ နားမလည်လေလေ ဖြစ်လာသည်။ ဂျို့မှာ ပီတာကို မနာလိုဖြစ်လာပြီး လာရာဂျင်းအား သူ့သဘောကို ထုတ်ပြောကာ နမ်းသည်။ ထိုအခိုက်မှာပင် ဂျို့အား တကယ်တမ်းမကြိုက်ဘဲ ပီတာကိုသာ သဘောစစ်ဖြစ်ကြောင်း လာရာဂျင်း ကွဲပြားသွားသည်။ နှင်းလျှောစီး ထွက်ကြသောအခါ ပီတာက လာရာဂျင်းအား အမှန်တကယ် နှစ်သက်ကြောင်းပြောကာ ရေနွေးစည်ထဲ၌ နှစ်ဦးသား အနမ်းဖလှယ်ကြသည်။ နောက်နေ့ရောက်သော် ဂျန်နီဗီက ပီတာတို့နှစ်ယောက် အတူနေကြကြောင်း သတင်းမှား ဖြန့်သည်။ ပီတာကလည်း ရှင်းချက်မထုတ်။ အရှက်ရသွားသော လာရာဂျင်းမှာ ခရစ်စမတ်ပိတ်ရက်တွင် ပီတာအား ရှောင်နေသည်။ သို့သော် လာရာဂျင်းညီမ ကစ်တီ (Kitty) က ဖိတ်ထား၍ မိခင် ဆုံးပြီးကတည်းက နှစ်စဉ်လုပ်မြဲဖြစ်သော မိသားစုစုံညီပွဲသို့ ပီတာ လာသည်။ ပီတာက လာရာဂျင်းအား စကားပြောရန် ပြင်ရာ ဂျို့က တားဆီးသည်။ ထိုအခါ အိမ်ပြန်ရောက်နေသော မားဂေါ့မှာ ဂျို့နှင့် လာရာဂျင်းတို့ နမ်းဖြစ်ကြောင်း သိသွားသည်။ မားဂေါ့နှင့် လာရာဂျင်းတို့ မကြာမီပင် ပြေလည်မှု ရသွားသော်လည်း လာရာဂျင်းမှာ ပီတာအား စိတ်ဆိုးမြဲ ဖြစ်သည်။ ကစ်တီက ဦးထုပ်ဘူးကို ခိုးကာ စာများထည့်၍ ဂျို့နှင့်နီးစပ်ရန် ကြံမိကြောင်း ဝန်ခံလာသည်။ လာရာဂျင်းက ကစ်တီအား ခွင့်လွှတ်လိုက်သည်။ ပီတာမှာ လာရာဂျင်းအတွက် စစ်မှန်သူဖြစ်ကြောင်း လာရာဂျင်း လွှင့်ပစ်သော်လည်း သူသိမ်းထားသော စာများကို ကစ်တီက ပြသည်။ ထိုစာများကို ဖတ်ပြီးနောက် လာရာဂျင်း စိတ်ရှင်းသွားကာ စာရွက်နှင့် ဘောပင်ကိုထုတ်၍ ပီတာထံ ရည်းစားစာစစ်စစ်တစ်စောင် ရေးရန် ပြင်တော့သည်။