အင်္ဂါနံဆန်ဆီပျောက်ပါလိမ့်
အင်္ဂါနံဆန်ဆီပျောက်ပါလိမ့် ကဗျာကို မောင်းထောင်းဦးကျော်လှ ရေးသားခဲ့သည်။ သံချို ကဗျာအမျိုးအစားဖြစ်သည်။
အကြောင်းအရာ ပြင်ဆင်ရန်
ကြာသပတေးဂြိုဟ်သည် လကိုဖောက်ထွင်း၍ စေတီပုထိုးတန်ခိုးပြခြင်း၊ ငလျင်လှုပ်ခြင်းများကို ဖွဲ့ဆိုထားသော ရက်သဲ့ကြားငါးတော်ပမာသံချို ဖြစ်သည်။
အင်္ဂါနံဆန်ဆီပျောက်ပါလိမ့် ပြင်ဆင်ရန်
များဗိုလ်လူ နွဲ့နွဲ့နှောင်းငယ်တို့၊ နှစ်ကောဇော သင်္ကြန်ပြောင်းမှာလှ၊ ခက်ကောင်းတကယ်ခက်ကြလိမ့်၊ အသတ်အာကာတခို၌၊ ဂုရုဂြိုဟ်စန်းကိုဖောက်သည့်ပြင်၊ ထိုနောက်တိမ်တံခွန်နှင့်၊ ဇေတဝန်မြပုဆိုး၊ တန်ခိုးရောင်ခြည်မြူးသည့်ပြင်၊ မေဒနီ မြေဟီ၍ ကြူးပြန်တော့၊ ထူးပါဘိသည်အခါ။
ရှေးကျမ်းဂန် တိဌုံထွက်ကိုလှ၊ အဓိပ္ပာယ် ပြန်လှန်၍ မြွက်ရလျှင်၊ ရက်သဲ့တွင်တင်မည့်ငါးနှင့်၊ ဆူးကြားသီးသည့်ဗူးသို့၊ တန်ခူးကုန် ကဆုန်ခေတ်မှာ၊ ထုဥသျှစ်ပုံပမာ။
သက္ကရာဇ်ကျူး နှစ်ကူးစာအဆိုက၊ ရှေ့ပြာသို တပိုတွဲ၊ မလွဲအမှန်မြင်ခဲ့၊ ရှမ်း ကရင် တရုပ် ချင်းရယ်တို့၊ မန်းမြေအဟုတ်ဆင်းတော့၊ ရှိရင်းလူ ဟိုအနောက်ကဲ့ပြင်၊ အင်္ဂါနံ ဆန်ဆီပျောက်ပါလိမ့်၊ ဒါးမိုးပေါက်တန်တန်ရွာ၊ မှန်ရာမလွဲ။
ငါးပါးရယ် ပဉ္စသီနှင့်၊ အဋ္ဌင်္ဂီသီလထူးတို့ကို၊ ဆည်းပူးကာ မေတို့မြဲကြတော့၊ ဖောက်ပြားအခြေ ယောက်ျားတွေအမှန်နဲတော့၊ သူ့လင်ကိုငါ့လင်ဟုစွဲကြလိမ့်မကွယ်၊ (ကိုး) သည်နှစ်ပဲ။
ခက်ဆစ် ပြင်ဆင်ရန်
၁။ ဂုရုဂြိုဟ် = ကြာသပတေးဂြိုဟ်။
၂။ စန်း = တနင်္လာဂြိုဟ်။
၃။ တိမ်တံခွန် = ကောင်းကင်တွင် တိမ်များသည် တံခွန်သဖွယ် အရေးအကြောင်း ထင်မြင်နေခြင်း။
၄။ မေဒနီ = မြေကြီး။
၅။ မြေဟီ = အသံမြည်၍ မြေကြီးတုန်လှုပ်သည်။
မှတ်ချက် ပြင်ဆင်ရန်
ဤကဗျာခေါင်းစဉ်သည် မောင်းထောင်းဦးကျော်လှ ကိုယ်တိုင် နာမည်ပေးခဲ့ခြင်း မဟုတ်ပါ။ သင့်တော်မည်ထင်သော နာမည်ကို ပေးထားခြင်း ဖြစ်သည်။
ကိုးကား ပြင်ဆင်ရန်
- ↑ မောင်းထောင်းဦးကျော်လှ၏ သံချိုကဗျာပေါင်းချုပ်။ ယဉ်ကျေးမှုဝန်ကြီးဌာန၊ ယဉ်ကျေးမှုဗိမာန်ဌာန။ နိုဝင်ဘာ ၁၉၈၃။