အရွယ်နုရုံ မယ်ဥဒုံ

အရွယ်နုရုံ မယ်ဥဒုံ ကဗျာကို မောင်းထောင်းဦးကျော်လှ ရေးသားခဲ့သည်။ သံချို ကဗျာအမျိုးအစားဖြစ်သည်။

အရွယ်နုရုံ မယ်ဥဒုံ

သမ္ဘာရေ ကြာလေပြောင်ရစ်ကဲ့၊ ရွာရွှေတောင်၊ မြေအောင်မောင်းတွင်မှ၊ မောင်ကောင်းလှိုင်၊ ယိုင်ပျက်စီးသော်ကြောင့်၊ ဆက်ပြီးလျှင်စီမံဘို့၊ သူကြီးကလန် ထိုးကာလျှောက်ကြ၊ ကိုးယောက်နှင့် တဆယ်ကျော်။

များခြွေရွေ၊ သားတွေသမီးတွေနှင့်၊ အိမ်ကြီးရခိုင်ဆောက်လို့၊ ဆိုင်ပေါက်တွင် ဝင်လာမစဲပ၊ ပုဝါဖဲတပုံ၊ ခြည်စုံပိုးငဲ့ပြင်၊ ကုန်မျိုးစုံအတန်တန်နှင့်၊ ဦးဖိုးမှန် အသရေတက်သူမို့၊ ဂေဇက်စာ ထွက်လာရောက်တဲ့အောင်၊ ဝန်ထောက်တော်နယ်ပိုင်နှင့်၊ အရေးပိုင်လေးခရိုင်ချုပ်ကယ်ကြောင့်၊ ပေးထုတ်မိန့်တော်။

မျိုးအဆွေခြံရံတဲ့၊ ဖိုးဖေမှန်တိုက်သူကြီးငဲ့၊ ဇနီးကြင်သူမဲ့သော်ကြောင့်၊ လူဧည့်သည်ဆိုက်ရောက်လာခဲ့ရင်၊ ထိုက်လျောက်စွာ ဆေးရေကွမ်းငယ်နှင့်၊ ပေးကမ်းသူ မမြင်သေးသောကြောင့်၊ ရင်သွေးတွေစူမအောက်ရှာဘု၊ ရွေးကောက်၍ရွာအပေါ်၊ ကညာမော်သမျှအပျိုပေါင်း။

သူ့အရွယ်တူ အမယ်မငယ်က၊ တုပသူမယှဉ်လာနှင့်၊ ရှုစရာ နုအသဝါစိမ်းပေမို့၊ အသပြာ တသိန်းငွေတန်မဲ့အရုပ်ပေ၊ ပင်္ဂုတ္တိုရ် ဟိုလုလင်က၊ သဖန်းပင် လမ်းတွင်ချခဲ့၊ နန်းမစံဒေဝီဖြစ်လေသို့၊ ဤခေတ်တွင် အရာခံသည့်၊ ဦးဖိုးမှန်ဝိဒေဟနှင့်၊ ရှုမကုန်ဥဒုမ္ဗရ ငယ်တို့၊ ဆုံကြကာဂဟေစပ်မီအောင်၊ နှစ်ဦးနှစ်ဖြာ ဖူးစာနတ်ကယ်က၊ ကူးတတ်ချက်ကောင်း။

ခက်ဆစ်

၁။ သမ္ဘာရေ = ကုသိုလ်ကံ အဆောက်အဦး၊ အရည်အသွေး။

၂။ ကလန် = ရွာကိုအုပ်ချုပ်ရသူ အကြီးအကဲ။

၃။ ဂေဇက်စာ = ရုံးမှထုတ်ဆင့်သောစာ (လိပ်)။

၄။ ပိင်္ဂုတ္ထိုရ် = ပင်္ဂုတ္ထရလုလင်။

၅။ ဝိဒေဟ = ဝိဒေဟရာဇ်မင်း။

၆။ ဥဒုမ္ဗရ = ဥဒုမ္ဗရဒေဝီ (သဖန်းပင်မှ ရသူ)။

မှတ်ချက်

ဤကဗျာခေါင်းစဉ်သည် မောင်းထောင်းဦးကျော်လှ ကိုယ်တိုင် ပေးခဲ့ခြင်း မဟုတ်ပါ။ သင့်တော်မည်ထင်သော ခေါင်းစဉ်ကို ပေးထားခြင်း ဖြစ်သည်။