ဉာဏတ္ထဝိက

အရှင်ဉာဏတ္ထဝိကထေရ် သည် မြတ်စွာဘုရား၏ သာသနာတော်ရှိ ရဟန်းတစ်ပါး ဖြစ်သည်။

(က) ပဒုမုတ္တရဘုရားရှင်၏ သဗ္ဗညုတဉာဏ်တော်ကို ချီးမွမ်းခဲ့ဘူးသောထေရ်။ ထိုမထေရ်သည် ဤကမ္ဘာမှ ပြန်၍ရေသော် ကမ္ဘာတသိန်းထက်၌ ပဒုမုတ္တရ ဘုရားရှင်၏ သဗ္ဗညုတဉာဏ်တော်ကို ချီးမွမ်းခဲ့သော ကောင်းမှုကြောင့် ကမ္ဘာ တသိန်းပတ်လုံး အပါယ်မလားရပဲ ဤဂေါတမဘုရားရှင်လက်ထက် ရဟန္တာတပည့် အများတွင် “ဉာဏတ္ထဝိကထေရ်” ဟူသော အမည်ဖြင့် ထင်ရှားသည်။

(ခ) သုမေဓဘုရားရှင်၏ သဗ္ဗညုတဉာဏ်တော်ကို ချီးမွမ်းခဲ့ဘူးသောထေရ်။ ထိုမထေရ်သည် ဤကမ္ဘာမှ ပြန်၍ရေသော် ကမ္ဘာသုံးသောင်းထက်၌ သုမေဓဘုရားရှင်၏ သဗ္ဗညုတဉာဏ်တော်ကို ချီးမွမ်းတော်မူခဲ့သည်၊ ယင်းကောင်းမှုကြောင့် ကမ္ဘာသုံးသောင်းပတ်လုံး အပါယ် မလားရပဲ သိကြားမင်းအဖြစ် အကြိမ် တထောင်, စကြဝတေးမင်းအဖြစ် အကြိမ် များစွာ, ပဒေသရာဇ်မင်းအဖြစ် အကြိမ်မရေတွက်နိုင်အောင် ဖြစ်ရပြီးလျှင် ဤဂေါတမ ဘုရားရှင်လက်ထက်၌ ၇-နှစ် အရွယ်ကပင် အရဟတ္တဖိုလ်ကိုရ၍ “ဉာဏတ္ထဝိကထေရ်”ဟူသောအမည်ဖြင့် ထင်ရှားသည်။