အာရညကသုတ်

(၁) အမှုသစ်၌ အားထုတ်မှုနည်းသော ကိစ္စနည်းသော မွေးမြူရလွယ်သော၊ အသက်၏အဆောက်အဦပစ္စည်းတို့၌ ရောင့်ရဲလွယ်သောရဟန်း၊

(၂) အစားအသောက်နည်းပါးပြီး ဝမ်းရေးအတွက် အားမထုတ်သောရဟန်း၊

(၃) အအိပ်နည်းပါးပြီး နိုးကြားမှုလုံ့လ အားထုတ်မှုရှိသောရဟန်း၊

(၄) အစွန်အဖျားတောရကျောင်း၌ နေသောရဟန်း၊

(၅) ကိလေသာမှထွက်မြောက်တိုင်းသောစိတ်ကို ဆင်ခြင်သောရဟန်း

ဤတရားငါးမျိုးတို့နှင့် ပြည့်စုံသောရဟန်းတော်သည် အာနာပါနဿတိသမာဓိကို ကြိမ်ဖန်များစွာ အလေ့အလာပြုသည်ရှိသော် မကြာမြင့်မီ အရဟတ္တဖိုလ်ကို ထိုးထွင်း၍ သိနိုင်၏-ဟု ဟောတော်မူသည့်သုတ်။

---

အရညကသုတ် သည် မြတ်စွာဘုရားဟောကြားတော်မူခဲ့သည့် သုတ္တန်တစ်ခု ဖြစ်သည်။ ဤသုတ္တန်တွင် မြတ်စွာဘုရားသည် တရားငါးမျိုးနှင့် ပြည့်စုံသော ရဟန်းသည် အာနာပါနဿတိကို ကြိမ်ဖန်များစွာ အလေ့အလာပြုသည်ရှိသော် မကြာမြင့်မီပင် အရဟတ္တဖိုလ်ကို ထိုးထွင်း၍ သိနိုင်ပုံကို ဟောကြားတော်မူခဲ့သည်။

အရညကသုတ်

ရဟန်းတို့ တရားငါးမျိုးတို့နှင့် ပြည့်စုံသော ရဟန်းသည် အာနာပါနဿတိကို ကြိမ်ဖန်များစွာ အလေ့အလာပြုသည်ရှိသော် မကြာမြင့်မီပင် အရဟတ္တဖိုလ်ကို ထိုးထွင်း၍ သိနိုင်၏။ အဘယ်ငါးမျိုးတို့နည်း ဟူမူ -

• ရဟန်းတို့ ဤသာသနာတော်၌ ရဟန်းသည် (အမှုသစ်ကို) အားထုတ်မှု နည်းပါး၏၊ ကိစ္စနည်းပါး၏၊ မွေးမြူလွယ်၏၊ အသက်၏ အဆောက်အဦဖြစ်သော ပစ္စည်း၌ ရောင့်ရဲလွယ်၏။
• အစားအသောက် နည်းပါး၏၊ ဝမ်းရေးကို အားမထုတ်။
• အအိပ် နည်းပါး၏၊ နိုးကြားမှု၌ အားထုတ်၏။
• တော၌ နေ၏၊ အစွန်အဖျားကျသော ကျောင်းလျှင် နေရာရှိ၏။
• (ကိလေသာမှ) လွတ်မြောက်တိုင်းသော စိတ်ကို ဆင်ခြင်၏။

ရဟန်းတို့ ဤတရားငါးမျိုးတို့နှင့် ပြည့်စုံသော ရဟန်းသည် အာနာပါနဿတိကို ကြိမ်ဖန်များစွာ အလေ့အလာပြုသည်ရှိသော် မကြာမြင့်မီပင် အရဟတ္တဖိုလ်ကို ထိုးထွင်း၍ သိနိုင်၏ဟု (မိန့်တော်မူ၏)။