အာရာဗင်း အဒီဂါ
အာရာဗင်း အဒီဂါ ဆိုသူမှာ အိန္ဒိယနွယ်ဖွား ဩစတေးလျနိုင်ငံသား စာရေးဆရာ၊ သတင်းစာဆရာတစ်ဦးဖြစ်သည်။ The White Tiger (ကျားဖြူ)စာအုပ်ဖြင့် ကမ္ဘာ့စာပေအသိုင်းအဝန်းတွင် ထင်ရှားလာသူဖြစ်သည်။ ထိုစာအုပ်သည် သူ၏ပထမဦးဆုံးလုံးချင်းစာအုပ်ဖြစ်ပြီး The Man Booker ဆုကို ၂ဝဝ၈ ခုနှစ်တွင် ရရှိခဲ့သည်။ အာရာဗင်း အဒီဂါကို ၁၉၇၄ ခုနှစ်တွင် အိန္ဒိယနိုင်ငံ၌ မွေးဖွားခဲ့သည်။ ၁၉၉ဝ ခုနှစ်နောက်ပိုင်းတွင် ဩစတေးလျနိုင်ငံသို့ ပြောင်းရွှေ့နေထိုင်ခဲ့သည်။ နယူးယောက်မြို့ရှိ ကိုလံဘီယာတက္ကသိုလ်တွင် အင်္ဂလိပ်စာပေကို လေ့လာသင်ယူခဲ့ပြီး အောက်စဖို့စ်တက္ကသိုလ်တွင်လည်း သင်ယူခဲ့သည်။
| Aravind Adiga | |
|---|---|
| အမည်ရင်း | ಅರವಿಂದ ಅಡಿಗ |
| မွေးဖွား | ၂၃ အောက်တိုဘာ၊ ၁၉၇၄ Chennai (Madras), Tamil Nadu, India |
| အလုပ်အကိုင် | စာရေးဆရာ |
| လူမျိုး | အိန္ဒိယလူမျိုး |
| နိုင်ငံသား | ဩစတေးလျနိုင်ငံသား |
| မိခင်ကျောင်း | ကိုလမဘီယာ တက္ကသိုလ် Magdalen College, Oxford |
| ထင်ရှားသည့်လက်ရာများ | The White Tiger |
| ရရှိသည့်ဆုများ | 2008 Man Booker Prize (The White Tiger) |
| ဝက်ဘ်ဆိုဒ် | |
| aravindadiga.com | |
Financial Time သတင်းစာ၏ သတင်းထောက်အဖြစ် လုပ်ဆောင်ခဲ့သည်။ စတော့ဈေးကွက်သတင်း၊ ရင်းနှီးမြုပ်နှံမှုသတင်းနှင့်စီးပွားရေးဆိုင်ရာအင်တာဗျူးများကို Financial Time တွင် ရေးသားခဲ့သည်။ ထိုနောက် Time မဂ္ဂဇင်း၏ တောင်အာရှဒေသတွင်း အလွတ်တန်းသတင်းထောက်အဖြစ် ၃ နှစ်ခန့် အလုပ်လုပ်ခဲ့ သည်။ ထိုကာလအတွင်း The White Tiger စာအုပ်ကို ရေးသားခဲ့သည်။ ထိုစာအုပ်ကို ၂ဝဝ၈ ခုနှစ်တွင် ထုတ်ဝေနိုင်ခဲ့သည်။ The Man Booker ဆုကိုလည်း ထိုနှစ်တွင်ပင် ရရှိခဲ့သည်။ အာရာဗင်း အဒီဂါသည် The Man Booker ဆုရရှိသည့် အယောက် ၄ဝမြောက် အိန္ဒိယနွယ်ဖွားစာရေးဆရာအဖြစ် မှတ်တမ်းဝင်ခဲ့သည်။
The White Tiger သည် အိန္ဒိယ၏ နိုင်ငံရေး၊ စီးပွားရေး၊ လူမှုရေးနှင့်ကျေးလက်နေနိုင်ငံသားများ ကြုံတွေ့နေရသည့် အရေးကိစ္စများကို ရေးသားထားခြင်းဖြစ်ပြီး အိန္ဒိယနိုင်ငံရေးသမားများနှင့်စီးပွားရေးသမားများ အကြားတွင် ကြီးထွားလှိုက်စားနေသည့် အဂတိလိုက်စားမှုများအကြောင်းကို တို့ထိသရောထားခြင်းဖြစ်သည်။ ထို့ အတူ အိန္ဒိယနိုင်ငံရှိ ကျေးလက်ဒေသများတွင် နေထိုင်နေသူများ ကြုံတွေ့နေရသော ဘဝရုပ်ပုံလွွှာများ၊ ဆင်းရဲချမ်း သာကွာခြားမှု၊ သခင်ကျွန်ဆက်ဆံရေးနှင့်လူမှုဘဝအတွင်း ခွဲခြားဆက်ဆံခံထားရမှုများကိုလည်းထည့်သွင်းရေးဖွဲ့ခဲ့ သည်။ ထိုစာအုပ်ကို Alantic Books(UK) နှင့် Harper Collins(India) စာအုပ်တိုက်တို့က ၂ဝဝ၈ ခုနှစ်တွင် ထုတ်ဝေပေးခဲ့သည်။ ထိုစာအုပ်သည် အိန္ဒိယတစ်နိုင်ငံတည်းတွင်ပင် အုပ်ရေ ၂ သိန်းခန့်ရောင်းချခဲ့ရ သည်။
အာရာဗင်း အဒီဂါ ရေးသားသည့် ဒုတိယစာအုပ် Between the Assassinations ကို အိန္ဒိယတွင် ၂ဝဝ၈ ခုနှစ် နိုဝင်ဘာတွင် ထုတ်ဝေခဲ့ပြီး အမေရိကနှင့်အင်္ဂလန်တို့တွင် ၂ဝဝ၉ ခုနှစ် နှစ်လည်ပိုင်းတွင် ထုတ်ဝေခဲ့ သည်။ Last Men in Tower စာအုပ်ကို ၂ဝ၁၁ ခုနှစ်တွင် အင်္ဂလန်နိုင်ငံ၌ ထုတ်ဝေခဲ့သည်။ ထို့အပြင် The Guardia, The Sunday Times, The Times နှင့် The New Yorker တို့တွင်လည်း ဝတ္ထုတိုများကို ရေးသားလျက် ရှိသည်။ www.aravindadiga.com သည် အာရာဗင်း အဒီဂါ၏ ကိုယ်ပိုင်အင်တာနက် စာမျက်နှာဖြစ်ပြီး ဝတ္ထုတိုများ၊ အက်ဆေးများနှင့် ဆောင်းပါးများကို လွှင့်တင်ထားသည်။