အီဗန် ကာဗာလဲရစ်ဇာ

အီဗန် ပတ်တရိုဗတ်ခ်ျ ကာဗာလဲရစ်ဇာ (ယူကရိန်း: Іван Петрович Кавалерідзе) သည် ယူကရိန်း-ဆိုဗီယက် ပန်းပုဆရာ၊ ရုပ်ရှင်ဒါရိုက်တာ၊ ပြဇာတ်နှင့် ဇာတ်ညွှန်းရေးဆရာတစ်ဦးဖြစ်သည်။

အီဗန် ကာဗာလဲရစ်ဇာ
မွေးဖွား	(1887-04-13)၁၃ ဧပြီ၊ ၁၈၈၇ လာဒန်စကီး၊ Kharkov Governorate၊ ရုရှားအင်ပါယာ
ကွယ်လွန်	၃ ဒီဇင်ဘာ၊ ၁၉၇၈(1978-12-03) (အသက် ၉၁) ကီးယက်မြို့၊ ဆိုဗီယက်ယူကရိန်း
အလုပ်အကိုင်	ပန်းပုဆရာ၊ ရုပ်ရှင်ဒါရိုက်တာ၊ ပြဇာတ်နှင့် ဇာတ်ညွှန်းရေးဆရာ
ဘာသာစကား	Ukrainian
နိုင်ငံလူမျိုး	Ukrainian

ဘဝ

ဗိုက်ကိုဗာသုဿာန်ရှိ အီဗန် ကာဗာလဲရစ်ဇာ၏ အုတ်ဂူ

ကာဗာလဲရစ်ဇာကို ၁၈၈၇ ခုနှစ် ဧပြီလ ၁၃ ရက်တွင် လာဒန်စကီးအရပ် (ယခု နိုဗိုပတ်တရစ်ဗ်ကာ၊ ရိုနေမြို့နယ်၊ ဆမ်နေခရိုင်၊ ယူကရိန်း) ၌ မွေးဖွားသည်။ ၁၉၀၇ မှ ၁၉၀၉ ထိ ကီးယက်အနုပညာကျောင်းတွင်လည်းကောင်း၊ ၁၉၀၉ မှ ၁၉၁၀ ထိ တော်ဝင်အနုပညာအကယ်ဒမီတွင်လည်းကောင်း၊ ၁၉၁၀ မှ ၁၉၁၁ ထိ ပါရီတွင် နာအွမ် အာရွန်ဆွန်နှင့်လည်းကောင်း အနုပညာကို လေ့လာသင်ကြားခဲ့သည်။ ၁၉၁၀ တွင် ဆမ်နေ၌ ပြဇာတ်ကုမ္ပဏီတစ်ခုကို တည်ထောင်ခဲ့သေးသည်။ ၁၉၁၁ တွင် ဗိုလိုဒီမျာလမ်း၌ ရုရှားသူတော်စင်တို့၏ စကျင်ရုပ်တုများ ထုလုပ်ခဲ့သေးသည်။ ၁၉၃၄ တွင် ၎င်းရုပ်တုများကို ကွန်မြူနစ်များက ဖျက်ဆီးခဲ့သော်လည်း ၁၉၃၆ တွင် ပြန်လည်ထုလုပ်ခဲ့သည်။ ၁၉၁၈ မှ ၁၉၂၀ အတွင်း တာရာစ် ရှဗ်ချန်ကိုနှင့် ဂရေဂိုရီ ဆကိုဗိုရိုဒါတို့၏ အထိမ်းအမှတ်ရုပ်တုများ ထုလုပ်ခဲ့သည်။ ကီးယက်တက္ကသိုလ်ရှေ့တွင် စိုက်ထူထားသော ရှဗ်ချန်ကိုရုပ်တုသည် ၁၉၆၀ နှင့် ၁၉၈၀ ပြည့်နှစ်များအတွင်း အမျိုးသားရေးလှုပ်ရှားမှုများ၏ အချက်အချာနေရာ ဖြစ်ခဲ့သည်။ ၁၉၂၈ မှ ၁၉၃၃ ထိ အိုဒယ်ဆာရုပ်ရှင်စတူဒီယိုတွင်လည်းကောင်း၊ ၁၉၃၄ မှ ၁၉၄၁ ထိ ကီးယက်ရုပ်ရှင်စတူဒီယိုတွင်လည်းကောင်း စာရေးဆရာ၊ ဒါရိုက်တာအဖြစ် လုပ်ကိုင်ခဲ့သည်။ ၁၉၃၆ တွင် ဆိုဗီယက်ရုပ်ရှင်လောက၌ ပထမဆုံးရုပ်ရှင်ပြဇာတ်အဖြစ် မီခိုလာ လီဆန်ကို၏ နာတာလ်ကာ ပိုလ်တာဗ်ကာပြဇာတ်ကို ရုပ်ရှင်အဖြစ်အသက်သွင်းခဲ့သည်။ ၁၉၅၇ မှ ၁၉၆၂ ထိ ဒိုဗ်ဇန်းကိုရုပ်ရှင်စတူဒီယို၌ ဒါရိုက်တာအဖြစ် လုပ်ကိုင်ခဲ့သည်။ ကာဗာလဲရစ်ဇာကိုသည် ၁၉၇၈ ခုနှစ် ဒီဇင်ဘာ ၁၂ ရက်နေ့တွင် ကွယ်လွန်ပြီး၊ ၎င်း၏ရုပ်အလောင်းကို ဗိုက်ကိုဗာသုဿာန်၌ မြှုပ်နှံထားသည်။