ဥတ္တရာသဠ်နက္ခတ်

ဥတ္တရာသဠ်နက္ခတ် မှာ ပြုဗ္ဗသဠ်နက္ခတ်နှင့် ပေါင်း၍ ဆင်မလှမ်းဟန်လေးလုံးရှိကြောင်းဆိုသည်။ ထိုနက္ခတ်ကို အဿိဒေဝနတ် အစိုးရကြောင်းလည်း ဆိုသည်။ ဤနက္ခတ်သည် ဆင်တာရာနှင့် ယှဉ်၍ သွား၏။

၂၁။ ဥတ္တရာသဠ = ဥတ္တရာသာဠ်နက္ခတ်

ရာဇမတ္တဏ်ကျမ်း၌ “ဝိသာချော၊ ဥတ္တရာသဠှော၊ ဝိသုဒေဝေါ”ဟူ၍ ဥတ္တရာသာဠ် နက္ခတ်ပရိယာယ် (၃) ပုဒ်ပြပါသည်။ အဘိဓာန်ဋီကာ၌ကား ဥတ္တရာသာဠ် နက္ခတ်၏ပရိယာယ်ကို အထက်တွင် ဆိုခဲ့သည့် ပြုဗ္ဗာသာဠ် နက္ခတ်ကဲ့သို့ပင် ပြဆိုပါသည်။

ထိုနက္ခတ်၏လုံးရေ သင်္ချာနှင့် အဆင်းသဏ္ဌာန်ကို ကျမ်း အချို့၌ အောက်ပါအတိုင်း တွေ့ရပေသည်။ (တစ်နည်း) ပြုဗ္ဗာသာဠ်, နက္ခတ်နှင့် ပေါင်း၍ အဓိပ္ပာယ်၊ လုံးရေ ပြဆိုလေ့ရှိသည်။

• -ပေါတ္တရသာဒိကျမ်း (၂) လုံး၊ ဗိတာန် ခြေ သဏ္ဌာန်
• -ဂြဟသျှန္တီကျမ်း (၂) လုံး၊ အသွင်သဏ္ဌာန် မပါ
• -သေနင်္ဂဗျူဟာကျမ်း (၂) လုံး၊ အသွင်သဏ္ဌာန်မပါ
• -လဃုသင်္ဂြဟကျမ်း (၂) လုံး၊ ညောင်စောင်းခြေသဏ္ဌာန်
• -အာကာသသျှတ္တရကျမ်း (၂) လုံး၊ ဆင်မလှမ်းဟန်
• -သိင်္ဃဗောဓကျမ်း (၄) လုံး၊ သဏ္ဌာန်မပါ
• -ကပ္ပဝဏ္ဏနာကျမ်း (၂) လုံး၊ ဆင်လက်သဏ္ဌာန်
• -ရွှေမင်ရေးပုရပိုက်ဖြူ (၂) လုံး၊ ခြင်္သေ့မသဏ္ဌာန်
• -နက္ခတ်လင်္ကာ ဆင်မလှမ်းဟန်

ထိုနက္ခတ်ကို အဿိဒေဝနတ်စောင့်၍ အစိုးရကြောင်း ရာဇမတ္တဏ်ကျမ်းက ဆိုပါသည်။