ဥပါဒါနသုတ်

(၂)သုတ် ရှိပါသည်။

လှည်း ၁၀-စီးတိုက်, အစီး ၂၀-တိုက်, အစီး ၃၀-တိုက်, အစီး ၄၀-တိုက် ထင်းပုံကြီးကိုလောင်မြိုက်နေသော မီးပုံကြီးထဲသို့ ရံဖန်ရံခါ ယောက်ျားသည် မြက်ခြောက်, နွားချေးခြောက်, ထင်းခြောက်တို့ကို ထည့်ပေးနေလျှင် လောင်စာကြောင့် ထိုမီးပုံကြီးသည် ကြာမြင့်စွာ တောက်လောင်နေသကဲ့သို့ ထို့အတူ ဥပါဒါန်၏အကြောင်း ဖြစ်ကုန်သော တေဘူမကတရားတို့၌ သာယာဖွယ်ဟု ရှုနေသောသူအား တပ်မက်မှု “တဏှာ”တိုးပွားလာ၏၊ တဏှာဟူသောအကြောင်းကြောင့် ဥပါဒါန်ဖြစ်၏-အစရှိသည်ဖြင့် ချမ်းသာမဖက် ဆင်းရဲသက်သက်အစု ဖြစ်ပုံကို၎င်း။ -မီးပုံကြီးကို မီးစာမထည့် ပါက လောင်စာမရှိတော့သဖြင့် မီးပုံကြီး ငြိမ်းပျောက်သွားသကဲ့သို့ ဥပါဒါနိယတရားတို့၌ အပြစ်ရှိပုံကို ရှုနေသောသူအား တပ်မက်မှု “တဏှာချုပ်ငြိမ်းသွားပုံ၊ တဏှာ ချုပ်ခြင်းကြောင့် ဥပါဒါန်ချုပ်ပုံ-အစရှိသည်ဖြင့် ဆင်းရဲအစုအဝေးကြီး ချုပ်ငြိမ်းပုံကို ဟောတော်မူသည့်သုတ်။

အဋ္ဌကထာ၌-ဥပမာနနှင့် ဥပမေယျတိုက်ဆိုင်ပုံ မှတ်သားဖွယ်ကို ဖွင့်ပြ ထားပါသည်။

---

ဥပါဒါန်လေးပါးနှင့် ဥပါဒါန်လေးပါးကို ထူးသောဉာဏ်ဖြင့် သိရန်, ပိုင်းခြား၍ သိရန်ကုန်ခမ်းစေရန် ပယ်စွန့်နိုင်ရန် အဋ္ဌင်္ဂိကအရိယာမဂ်ကို ပွားများရမည်ဟု ဟောတော်မူသည့်သုတ်။