၁၀၈တောင်ဘုရား (ဂမုန်းပေါင်းစေတီတော်)

ပုသိမ်မြို့အနီး ကန်ကြီးထောင့်မြို့နယ်မှ ၄မိုင်အကွာ ထိန်တပင်ကျေးရွာအနီးတွင် သွားရောက်ဖူးမြော်နိုင်သည်။ ၎င်း ကန်ကြီးထောင့်ဖလုံးအိုင် (၁၀ဂ)တောင် ဂမုန်းပေါင်း တစ်ထောင်စေတီတော်ကို ဆရာတော်ဦးဉာဏောဒယ တည်ထားကိုးကွယ်ထားပြီး အများပြည်သူများလွပ်လပ်စွာ လာရောက်ဖူးမြော်နိုင်သည်။ ပုသိမ်မြို့မှလာလျှင် ကန်ကြီးထောင့်မြို့မှ ဘဲဂယက်ရွာ သို့သွားကာ ဘဲဂယက်မှတဆင့် ထိန်တပင်ကျေးရွာအနီးတွင် ဖူးမြော်နိုင်သည်။

ဆရာတော်ဦးဉာဏောဒယ သည် ဘုန်းတန်ခိုးကြီးမားသော ဆရာတော်တစ်ပါးဖြစ်သည်။ ပုသိမ်မြို့သို့ရောက်လျှင် မဖြစ်မနေဖူးမြော်သင့်သော တန်ခိုးကြီးစေတီတော်တစ်ဆူ ဖြစ်သည့်အပြင် ဆရာတော်ဦးဉာဏောဒယ၏ မပုပ်မသိုးသော ရုပ်ကလာပ်တော်ကိုလည်း ဖူးမြော်နိုင်သည်။

၎င်းဂမုန်းပေါင်းစေတီတော်သည် ဝင်္ဂဘာကဲ့သို့တည်ဆောက်ထားပြီး အထပ်ပေါင်းများစွာတည်ရှိသည်။ ဂမုန်းပေါင်းစေတီတော် အနီးတွင် ဖာလုံနတ်ရေကန်တည်ရှိပြီး ၎င်းရေကန်အား ဖာလုံနတ်နှင့် ၎င်း၏သမီးတော် ၃ပါးက စောင့်ရှောက်သည်ဟုလည်း ယုံကြည်ကြသည်။ ဖာလုံနတ်ရေကန်သည် အကျယ်အားဖြင့် ၃ဧကခန့်ရှိပြီး ရေများမှာလည်း အလွန်ကြည်လင်ပါသည်။ ၎င်းရေကန်တူးဖော်စဉ်က လှေတစ်စင်း တူးဖော်ရရှိပြီး ၎င်းလှေကိုလည်း ဖာလုံနတ်ရေကန်အတွင်းတွင် ထားရှိသည်။ ဒေသခံများ၏ အဆိုအရ ၎င်းနတ်ရေကန်တည်ရှိရာနေရာသည် တစ်ချိန်က ပင်လယ်ဖြစ်သည်ဟုလည်း ပြောဆိုကြသည်။

ဖာလုံနတ်ရေကန်၏ အနီးတွင် ဉာဏ်တော် ပေ၂၀ခန့်ရှိသော မနုဿီဟခြင်္သေ့၏ ရုပ်တုကိုလည်းတည်ထားကိုးကွယ်ထားသည်။ နေ့လယ်စာအတွက် ဘုရားပွဲဈေးတန်းတွင် စားသောက်ဆိုင်များ ရှိသကဲ့သို့ ဓမ္မဒါန ထမင်းစားရုံတွင်လည်း နေ့စဉ်အလှူရှင်များ၏အလှူတော်များကြောင့် ဆရာတော်ကြီး၏ မေတ္တာထမင်း၊ သိဒ္ဓိဟင်းတို့ကိုသုံးဆောင်နိုင်သည်။ ဂမုန်းပေါင်းစေတီတော်မှအပြန်တွင် ကန်ကြီးထောင့်မြို့နယ်ရှိ လောကမှန်ကူစေတီတော်ကိုလည်း ဝင်ရောက်ဖူးမြော်နိုင်သည်။

ကိုးကား

စာရေးဆရာ သင်းပြန့်ကြာ၏ ကန့်ကြီးထောင့် ညောင်ပင်သာဆရာတော်ဘုရားကြီးအကြောင်း တစ်စေ့တစ်စောင်း

ဆရာတော်ကြီး၏ မိန့်ဆိုချက်များ

ဘုရားဖူးများ၏ကိုယ်တွေ့ ဇာတ်လမ်းများ