လက်ခုပ်တွင်းကရေ သွန်လိုသွန် မှောက်လိုမှောက်

လက်ခုပ်တွင်းကရေ သွန်လိုသွန် မှောက်လိုမှောက် ဟူသည်မှာ မြန်မာစကားပုံတစ်ခု ဖြစ်သည်။

ရှင်းလင်းချက်

လက်ခုပ်တွင်းက ရေသည် သွန်လိုကသွန်၊ မှောက်လိုကမှောက် ပြုသမျှ ခံရမည်သာ ဖြစ်သကဲ့သို့ တစ်ပါးသူ၏ လက်တွင်း၌ ရောက်နေသူသည် ပြုသမျှ ခံရမည်သာ ဖြစ်သည်။

ဆိုလိုရင်းတူညီသောအခြားစကားပုံ

ကိုယ့်လက်ခုပ်တွင်းကရေ သွန်လိုသွန် မှောက်လိုမှောက်နှင့် အတူတူဖြစ်သည်။

မူလရင်းမြစ်

• "အရှင့်ပိုင်ကွက်၊ လက်ခုပ်ရေချို၊ သွန်လိုအမှောက်၊ သောက်လိုအဝ၊ ဖြစ်ပြီးမှကို၊" [၁၁၈၉] ကုသ* ၄၀၂။
• "အကြံတော့ သူတို့ဦးကြပြီ၊ ... သူတို့လက်ခုပ်ထဲကရေ သွန်လိုသွန်၊ မှောက်လိုမှောက် လုပ်တော့မယ်။" [၁၂၇၉] သူရိယ၊ ၇။ ၃၉။
• "လုံးစုံများစွာ၊ သူတို့မှာလည်း၊ ထားရာကနေ၊ လက်တော်တွင်ရေပါကို၊ စိတ်နေတစ်ခု၊ အရေးတော်ပြုသည်တဲ့။" [၁၂၁၅ခန့်] ဝံသ၊ ဒု။ ၁၆။
• "လက်ခုပ်ရေ သဏ္ဌာန် ဆိုပြန်တယ်၊ လှန်လိုလှန် မှောက်လိုမှောက်ပါတော့၊ ကြောက်ဆိုသလောက် သည်းထိတ်သဗျာ၊ ရဲစိတ်မလာ၊ တုံးအောက်က ဖားပမာလို၊ သနားညှာစေကြောင်းရှင့်လေး။" [၁၂၉၁] ကဝိမှန်၊ ၃၊ ၄။ ၂၉၅။