ကုန်သွယ်ရေး ဦးစီးဌာန
ကုန်သွယ်ရေး ဦးစီးဌာန (အင်္ဂလိပ်: Department of Trade) သည် စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနလက်အောက်ရှိ ဌာနတစ်ခုဖြစ်သည်။
 မြန်မာအစိုးရအဖွဲ့အစည်း | |
|---|---|
| အစိုးရအဖွဲ့အစည်း အကျဉ်းချုပ် | |
| ဖွဲ့စည်းသည့်အချိန် | ၁၉၆၇ ခုနှစ် |
| ယခင်အဖွဲ့အစည်း | ကုန်သွယ်ရေးညွှန်ကြားမှုဦးစီးဌာန နယ်စပ်ကုန်သွယ်ရေးဦးစီးဌာန |
| ဌာနချုပ် | ရုံးအမှတ် (၃)၊ နေပြည်တော် |
| ဝန်ကြီးများ | ဦးထွန်းအုံ (ပြည်ထောင်စုဝန်ကြီး) |
| ဌာနအကြီးအမှူးများ | ဦးမြင့်သူရ၊ ညွှန်ကြားရေးမှူးချုပ် ဦးစိုးလွင် (ဒုတိယညွှန်ကြားရေးမှူးချုပ်)၊ ဒေါ်နီနီကျော် (ဒုတိယညွှန်ကြားရေးမှူးချုပ်) |
| မိခင်အဖွဲ့အစည်း | စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန |
| ဝက်ဘ်ဆိုက် | dot.gov.mm |
သမိုင်းကြောင်း ပြင်ဆင်ရန်
၁၉၆၇ ခုနှစ်တွင် မြန်မာ့ဆိုရှယ်လစ်လမ်းစဉ်ပါတီ၏ စီးပွားရေးမူဝါဒများအရ ကုန်သွယ်ရေး ကော်ပိုရေးရှင်းများကို ပြန်ကျုံ့ကာ အောက်ပါအတိုင်း စီးပွားရေးဆန်ဆန် ပြန်လည်ဖွဲ့စည်းဆောင် ရွက်ခဲ့သည် -
- (က)ကုန်သွယ်ရေးဦးစီးဌာန
- (ခ)ကုန်သွယ်ရေးကော်ပိုရေးရှင်း ၁၁ ခုနှင့် ယင်းတို့၏ လုပ်ငန်းစု၊ လုပ်ငန်းခွဲများ၊ ဆိုင်များနှင့် စက်ရုံအလုပ်ရုံများ။
- (ဂ)ပြည်နယ်/တိုင်း ကုန်သွယ်ရေး ၁၄ ခု။
ယခင်ကုန်သွယ်ရေးဝန်ကြီးဌာနအမည်ဖြင့် ဖွဲ့စည်းခဲ့ရာမှ ကုန်သွယ်ရေးဦးစီးဌာနနှင့် ကော်ပိုရေးရှင်း ၁၁ ခုအား ဝန်ကြီးရုံး၊ ကုန်သွယ်ရေးညွှန်ကြားမှုဦးစီးဌာန၊ ရောင်းဝယ်ရေး ၆ ခုနှင့် လုပ်ငန်း ၄ ခုတို့ဖြင့် ပြန်လည် ဖွဲ့စည်းခဲ့သည်။ တဖန် ၁၉၉၆ ခုနှစ် ဩဂုတ်လ ၇ ရက်နေ့မှစ၍ ကုန်သွယ်ရေးဝန်ကြီးဌာနအမည်မှ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနဟူ၍ ယနေ့အထိ အမည်ပြောင်းလဲဖွဲ့စည်းခဲ့သည်။ ယင်းနောက် ၁၉၉၈ ခုနှစ် ဧပြီလ ၁ ရက်နေ့မှစ၍ ဝန်ကြီးရုံး၊ ကုန်သွယ်ရေးညွှန်ကြားမှုဦးစီးဌာန၊ နယ်စပ်ကုန်သွယ်ရေးဦးစီးဌာနနှင့် မြန်မာ့လယ်ယာ ထွက်ကုန် ပစ္စည်းရောင်းဝယ်ရေးတို့ဖြင့် ပြင်ဆင်ဖွဲ့စည်းခဲ့ပြီး ကုန်ရောင်းဝယ်ရေးနှင့်လုပ်ငန်း ၈ ခုအား ဖျက်သိမ်းခဲ့သည်။ ထို့ပြင် ၂၀၀၃ ခုနှစ် ဧပြီလ ၄ ရက်နေ့တွင် စတင်ကျင့်သုံးခဲ့သော ဆန်စပါး မူဝါဒအသစ်အရ မြန်မာ့လယ်ယာထွက်ကုန်ပစ္စည်းရောင်းဝယ်ရေးကို နိုင်ငံတော် လိုအပ်ချက်နှင့်အညီ ပြုပြင်ဖွဲ့စည်းကာ နိုင်ငံတော်၏စီးပွားရေးကဏ္ဍတွင် ချမှတ်ပေးထားသည့် မူဝါဒများနှင့်အညီ လုပ်ငန်းတာဝန်များ ဆောင်ရွက်ခဲ့သည်။၂၀၁၅ ခုနှစ်ဇန်နဝါရီလ ၁၅ ရက်နေ့တွင် ကျင်းပပြုလုပ်သော ပြည်ထောင်စုမြန်မာနိုင်ငံတော်၊ ပြည်ထောင်စု အစိုးရအဖွဲ့အစည်းအဝေးအမှတ်စဉ်(၂/၂၀၁၅)၏ သဘောတူညီချက်အရ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနကို အောက်ပါအတိုင်း ပြင်ဆင်ဖွဲ့စည်းခဲ့သည်-[၁]
- (က) ဝန်ကြီးရုံး
- (ခ) ကုန်သွယ်ရေးဦးစီးဌာန
- (ဂ) စားသုံးသူရေးရာဦးစီးဌာန
- (ဃ) မူပိုင်ခွင့်ဦးစီးဌာန
- (င) မြန်မာကုန်သွယ်မှုမြှင့်တင်ရေးအဖွဲ့
ကုန်သွယ်ရေးဦးစီးဌာနသည် ကုန်းလမ်း၊ ပင်လယ်ရေကြောင်းနှင့် လေကြောင်းတို့မှ တင်ပို့ တင်သွင်းသည့် မြန်မာနိုင်ငံ၏ ပို့ကုန်သွင်းကုန် ဆိုင်ရာ ကိစ္စရပ်များကို အဓိကထား ဆောင်ရွက်သည်။ ထို့အပြင် ကမ္ဘာ့ကုန်သွယ်ရေးအဖွဲ့နှင့် ဒေသတွင်း ကုန်စည်စီးဆင်းမှု၊ ကုန်သွယ်မှုဆိုင်ရာ ကိစ္စရပ်များကို ညှိနှိုင်းဆောင်ရွက်လျက် ရှိသည်။
ဖွဲ့စည်းပုံ ပြင်ဆင်ရန်
ရုံးချုပ်
- (က) စီမံရေးရာဌာနခွဲ
- (ခ) ငွေစာရင်းဌာနခွဲ
- (ဂ)ပို့ကုန်/သွင်းကုန်လုပ်ငန်းဌာနခွဲ
- (ဃ)ကုန်သွယ်မှုမူဝါဒဌာနခွဲ
- (င)စီမံကိန်းနှင့်စာရင်းအင်းဌာနခွဲ
- (စ)ဌာနတွင်းလုပ်ငန်းနှင့်စာရင်းစစ်ဆေးရေးဌာနခွဲ
- (ဆ)နယ်စခန်းများညှိနှိုင်းကွပ်ကဲရေးဌာနခွဲ
- (ဇ)WTO နှင့် အပြည်ပြည်ဆိုင်ရာကုန်သွယ်မှုနှင့်ဆက်နွယ်နေသောအဖွဲ့အစည်းများဌာနခွဲ
- (ဈ)နှစ်နိုင်ငံကုန်သွယ်မှုဆက်ဆံရေးဌာနခွဲ
- (ည)ဒေသတွင်းစီးပွားရေးပူးပေါင်းဆောင်ရွက်မှုဌာနခွဲ
- (ဋ)သတင်းအချက်အလက်နှင့်နည်းပညာဌာနခွဲ
- (ဌ)ယှဉ်ပြိုင်မှုမူဝါဒဌာနခွဲ
- (ဍ)ကုန်သွယ်မှုပညာပေးရေးဌာနခွဲ
နယ်ရုံးများ
- (က)ကုန်သွယ်ရေးဇုန်(၂)ခု
- (ခ)နယ်စပ်ကုန်သွယ်ရေးစခန်း(၁၇)ခု
- (ဂ)ပို့ကုန်သွင်းကုန်ရုံး (၄) ခု (ရန်ကုန်၊ မန္တလေး၊ မြစ်ကြီးနား၊ ကျိုင်းတုံ)
အခြားရုံးများ
- အထူးစီးပွားရေးဇုန်ရုံး (သီလဝါ၊ ထားဝယ်၊ ကျောက်ဖြူ)