ကျွန်မက နှင်းဆီပါမောင်

ကျွန်မက နှင်းဆီပါမောင် သည် ၂၀၁၅ ခုထွက် မြန်မာရုပ်ရှင်ဇာတ်ကား ဖြစ်သည်။ ဒါရိုက်တာ ဝိုင်း ရိုက်ကူးပြီး နေတိုးနှင့် ဖွေးဖွေး အဓိကပါဝင်သည်။

ကျွန်မက နှင်းဆီပါမောင်
ရုံတင်ပိုစတာ
အခြေခံအချက်အလက်
ဒါရိုက်တာ	ဝိုင်း
အခြေခံထားသည်မှာ	ပုညခင် ရေးသည့် ကျွန်မက နှင်းဆီပါမောင်
သရုပ်ဆောင်	နေတိုး ဖွေးဖွေး ယွန်းယွန်း ဟဲဗီးဖြိုး
နိုင်ငံ	မြန်မာ
ဘာသာစကား	ဗမာ
အမျိုးအစားခွဲခြင်းနှင့် ဖြန့်ဖြူးခြင်း
ဖြန့်ချိသည့်နေ့	၂၀၁၅

၂၀၁၅ ခု၊ မြန်မာ့ရုပ်ရှင် ထူးချွန်ဆုပေးပွဲတွင် အမျိုးသမီးဇာတ်ဆောင်ဆုကို ဖွေးဖွေးက လည်းကောင်း၊ ဒါရိုက်တာဆုကို ဝိုင်းကလည်းကောင်း ရသည်။

ရိုက်ကူးခြင်း

ကနဦးက သက်မွန်မြင့်နှင့် ရိုက်ကူးရန် စီစဉ်သော်လည်း နမ်းရှုံ့ရမည့်အခန်း ပါဝင်သဖြင့် ငြင်းပယ်လိုက်သည်။ သို့ဖြင့် ဖွေးဖွေးက အစားဝင်လာသည်။ ထိုအခန်းကြောင့်ပင် ဖွေးဖွေးအား မီဒီယာများက လက်ညှိုးထိုးကြသည်။

ဇာတ်လမ်းအကျဉ်း

ခွန်းသသည် ထားသခင်၏အိမ်၌ အဘိုးနှင့် နေသည်။ ခွန်းသဖခင်မှာ ထိုအိမ်မှ ခြံစောင့်ဖြစ်ပြီး သူသေသည့်နောက် ခွန်းသနှင့် သူ့အဘိုးတို့က ခြံစောင့်ရာထူးကို ဆက်ခံခြင်း ဖြစ်သည်။

ထားသခင် ပြင်ဦးလွင်သို့ အလည်လာရာ ခွန်းသနှင့် တွေ့သည်။ ခွန်းသအား နည်းလမ်းစုံ အနိုင်ကျင့်သည်။ အဘိုး၏ ဆုံးမစကားကြောင့် ခွန်းသက သည်းခံသည်။

နှစ်အတန်ကြာသော် ကံကြမ္မာ တစ်ပတ်လည်တော့သည်။ ဖခင်ကွယ်လွန်ပြီးနောက် အသုံးအစွဲမတတ်သည့် အဘွားကြောင့် ထားသခင်အတွက် ချန်ခဲ့သည့် စည်းစိမ်များ ကုန်သွားသည်။ မောက်မာသူဖြစ်ရာ ပတ်ဝန်းကျင်နှင့် အဆင်မပြေ။ နောက်ဆုံးတွင် အဆောင်၌ နေရပြီး အခန်းဖော်၏ လမ်းညွှန်မှုနှင့် ဖိနပ်ရောင်းသည့်အလုပ် ရသည်။

ခွန်းသမှာ ရန်ကုန်ရောက်လာရာ ကြိုးစားသဖြင့် ကြီးပွားနေသည်။ ထားသခင် အလုပ်လုပ်နေသည်ကို တွေ့ရာ ငယ်စဉ်က ခံရသမျှကို တုံ့ပြန်တော့သည်။ ထိုသို့ဖြင့် နှစ်ဦးသား ချစ်ကြိုက်သွားသည်။

ဇာတ်ဆောင်များ

• ခွန်းသ အဖြစ် နေတိုး၊ ဟဲဗီးဖြိုး (ငယ်ဘဝ)
• ထားသခင် အဖြစ် ဖွေးဖွေး၊ ယွန်းယွန်း (ငယ်ဘဝ)