ဂေဘရီယယ် ဂါဆီယာ မားကွိဇ်
ဂေဘရီယယ် ယိုဆေး ဒီ လာ ကွန်ကော်ဒီယာ ဂါဆီယာ မားကွိဇ် (Gabriel José de la Concordia García Márquez) ကိုလံဘီယာနိုင်ငံသား ဝတ္ထုရှည် ဝတ္ထုတိုများကို ရေးသားသော စာရေးဆရာ၊ ပြဇာတ်ရေးဆရာ နှင့် သတင်းစာဆရာ တစ်ဦး ဖြစ်သည်။ ၁၉၂၇ ခုနှစ် မတ်လ ၆ ရက်နေ့တွင် မွေးဖွားပြီး လက်တင်အမေရိက တစ်ခွင်တွင် ဂါဘိုဟု လူသိများသည်။ ၂၀ ရာစုနှစ်၏ နာမည်ကျော်ကြား ထင်ရှားသော စာရေးဆရာတစ်ဦး အဖြစ် မှတ်ယူကြပြီး ၁၉၇၂ ခုနှစ် နျူစတတ်ဒ် နိုင်ငံတကာ စာပေဆုကို လည်းကောင်း၊ ၁၉၈၂ ခုနှစ် စာပေဆိုင်ရာ နိုဘယ်လ်ဆုကို လည်းကောင်း ရရှိခဲ့ပြီး စာပေဆိုင်ရာ နိုဘယ်လ်ဆု ရသူများတွင် အသက်ရှင် ကျန်ရစ်နေသေးသောသူများတွင် အစောဆုံး ဆုရရှိသူ တစ်ဦး ဖြစ်သည်။ သူသည် ကိုယ့်ဘာသာကိုယ် လေ့လာသင်ယူသော ပညာရေးမျိုးဖြင့် သင်ကြားတတ်မြောက်ခဲ့ပြီး ဥပဒေကျောင်းကို စွန့်ခွာကာ သတင်းစာ ဆိုင်ရာ အသက်မွေးဝမ်းကြောင်းမှုကို ရွေးချယ်ခဲ့သည်။ အစောပိုင်းကတည်းကပင် ကိုလံဘီယာနိုင်ငံ နှင့် နိုင်ငံတကာ နှင့် ဆိုင်သော နိုင်ငံရေး ဆိုင်ရာ ကိစ္စရပ်များတွင် ဝေဖန်မှုများကို လုံးဝ ချုပ်တည်းမှု မပြုခဲ့ပေ။ ၁၉၅၈ ခုနှစ်တွင် မာစီဒီး ဘာချာ နှင့် လက်ထပ်ခဲ့ပြီး ရော့ဒရစ်ဂျိုနှင့် ဂွန်ဇာလို ဟူသော သားနှစ်ဦး မွေးဖွားခဲ့သည်။
သူသည် သတင်းစာဆရာတစ်ဦး အဖြစ်စတင်ခဲ့ပြီး လူကြိုက်များ ထင်ရှားသော ဝတ္ထုမဟုတ်သည့် စာပေနှင့် ဝတ္ထုတို အများအပြားကို ရေးသားခဲ့သည်။ သို့သော်လည်း One Hundred Years of Solitude (၁၉၆၇) နှင့် Love in the Time of Cholera (၁၉၈၅) ဝတ္ထု နှစ်ပုဒ်ကြောင့် အထူးပင် ထင်ရှားကျော်ကြားခဲ့သည်။ သူ၏ စာပေများမှာ အများမှ ချီးကျူးမှုကို ခံခဲ့ရပြီး စီးပွားရေး အရလည်း အောင်မြင်ခဲ့သည်။ သူအနေနှင့် ပဉ္စလက်သရုပ်မှန်ဝါဒ ကို ဖော်ထုတ်ရေးသားသူ အဖြစ် ထင်ရှားသည်။ သာမန် အခြေအနေများတွင် ပဉ္စလက်ဆန်သော အရာဝတ္ထုများ အဖြစ်အပျက်များကို ထည့်သွင်း ရေးသားခဲ့သောကြောင့် ဖြစ်သည်။ အချို့သော သူ၏ စာပေများမှာ မာကိုနာဒို ဟုခေါ်သော စိတ်ကူးယဉ်မြို့တွင် အခြေခံပြီး အများစုမှာ အထီးကျန်ဆန်ခြင်းကို ချယ်မှုန်းပြသထားခြင်း ဖြစ်သည်။
သူ၏ One Hundred Years of Solitude စာအုပ်ကို သင့်လူက ဝေးလွင့်ကင်းကွာ နှစ်တစ်ရာ အမည်ဖြင့် မြန်မာဘာသာသို့ ပြန်ဆိုခဲ့ပြီး ကံကော်ဝတ်ရည်စာပေတိုက်က ၂၀၁၁ ခုနှစ်တွင် ထုတ်ဝေခဲ့သည်။In Evil Hour စာအုပ်ကိုလည်း သင့်လူကပင် မိစ္ဆာမြူးချိန် အမည်ဖြင့် မြန်မာဘာသာသို့ ပြန်ဆိုခဲ့သည် [၁]။