ဦးထွန်းလှိုင်သည် မြန်မာ ရုပ်ရှင် ဒါရိုက်တာ၊ ရုပ်ရှင်ဓာတ်ပုံထူးချွန်ဆုရ အနုပညာရှင်ဖြစ်သည်။ ဦးထွန်းလှိုင်သည် အီးစီအေ(E.C.A) အကူအညီဖြင့် မြန်မာနိုင်ငံတွင် ဖွင့်လှစ်သော ရုပ်ရှင်ပညာသင်ကျောင်းတွင် ၁၉၅၂ ခုနှစ်မှ စတင်ပြီး ရုပ်ရှင်ဓာတ်ပုံပညာရပ်ကို လေ့လာသင်ယူခဲ့သည်။ ဦးထွန်းလှိုင်သည် ရုပ်ရှင်ဗဟုသုတပြန့်ပွားရေး (နောင် ရုပ်ရှင်မြှင့်တင်ရေး)တွင် ဝင်ရောက်လုပ်ကိုင်ရာမှ ဟောလိဝုဒ်မှ ဒါရိုက်တာ ဓာတ်ပုံဆရာ မစ္စတာ ဒိုကိုလပ်ဝက်(ဘ်)စတာနှင့် တွေ့ဆုံခွင့်ရရှိပြီး ထိုသူထံတွင် တပည့်ခံကာ ရုပ်ရှင်ဓာတ်ပုံပညာကို ဆက်လက်ဆည်းပူးခဲ့သည်။ ဆရာရင်းဖြစ်သူ မစ္စတာ ဒိုကိုလပ်ဝက်(ဘ်)စတာနှင့်တွဲဖက်ကာ မော်ကွန်းတင်ဇာတ်ကားများကို လက်တွေ့ရိုက်ကူးခဲ့သည်။ ထို့နောက် ဗြိတိသျှဘားမား (နောင် ညွန့်မြန်မာ)ရုပ်ရှင်တွင် လက်ထောက်ဓာတ်ပုံဆရာအဖြစ် ဝင်ရောက်လုပ်ကိုင်ခဲ့သည်။ ဗြိတိသျှဘားမားမှ အလုပ်ထွက်ပြီးနောက် အစိုးရရုပ်ရှင်နှင့် ပြဇာတ်ဌာနသို့ ဝင်ရောက်လုပ်ကိုင်ပြီး တရုတ်ပြည်နယ်စပ် အိန္ဒိယနိုင်ငံနယ်စပ်နှင့် ချင်းဝိသေသတိုင်းများသို့ စွန့်စားသွားရောက်ကာ သတင်းကားများကို ရိုက်ကူးခဲ့သည်။ ယင်းနောက် မန္တလေးရုပ်ရှင်တွင် ဝင်ရောက်လုပ်ကိုင်ခဲ့သည်။ ထိုကာလအတွင်း မြန်မာ့ရုပ်ရှင်လောကတွင် ထင်ရှားသည့် ဒါရိုက်တာဦးသုခဘဝသံသရာဇာတ်ကားကို ရုပ်ရှင်ဓာတ်ပုံဆရာအဖြစ် တာဝန်ယူရိုက်ကူးပေးခဲ့သည်။

ဦးထွန်းလှိုင်သည် ဒါရိုက်တာအဖြစ် သိင်္ခ ဇာတ်ကားကို ပထမဦးဆုံး ရိုက်ကူးခဲ့သည်။ ထို့နောက် သွေးကိုဖွဲ့သော မေတ္တာ၊ တရေးချစ်ခွင့်ကြုံလာနိုး၊ ဂုဏ်ရှိန်မြင့်တဲ့ချစ်သူရယ်၊ သီတာသောင်ခြေဦး၊ အတူနေမယ် ပြောတဲ့မောင်၊ ကျမချစ်သူ သူ့အကြောင်း၊ တတိယလူ စသော ဇာတ်ကားများကို ရိုက်ကူးခဲ့သည်။ သီတာသောင်ခြေဦး ဇာတ်ကားတွင် ဓာတ်ပုံဆရာ၊ ဒါရိုက်တာ ဦးထွန်းလှိုင်သည် အခွင့်ရတိုင်း သူ၏ဓာတ်ပုံပညာစွမ်းကို ပြသခဲ့သည်။ ထွန်းသီရိရုပ်ရှင်ထုတ်လုပ်ရေးကို တည်ထောင်ဦးစီးပြီး တစ်ဖက်ကလည်း သွေးသောက်၊ ရင်ခုန်သံ၊ ရုပ်ရှင်အမြုတေနှင့် ခေတ်မြန်မာမဂ္ဂဇင်းများတွင် ရုပ်ရှင်ပညာရပ်ဆောင်းပါးများ ရေးသားခဲ့သည်။ သူ၏တစ်သက်တာတွင် ဆည်းပူးလေ့လာခဲ့သော ရုပ်ရှင်ဓာတ်ပုံပညာကို မျိုးဆက်သစ်များ သင်ယူလေ့လာနိုင်ရန် စာအုပ်ရေးသားထုတ်ဝေခဲ့သည်။ ကမ္ဘာကျော် ရုပ်ရှင်ဒါရိုက်တာကြီးများ စာအုပ်ကို ပထမတွဲ၊ ဒုတိယတွဲ နှစ်တွဲခွဲကာ ပြုစုထုတ်ဝေခဲ့သည်။ ဦးထွန်းလှိုင်သည် မန္တလေးရုပ်ရှင်မှ ဒါရိုက်တာမျိုးအောင် ရိုက်ကူးသည့် မြတ်ပန်းဝတ်ရည် ဇာတ်ကားဖြင့် ၁၉၅၇ ခုနှစ်အတွက် ရုပ်ရှင်ဓာတ်ပုံထူးချွန်ဆု ရရှိခဲ့သည်။

ယခုအခါ ဓာတ်ပုံဆရာ ဒါရိုက်တာ အကယ်ဒမီဦးထွန်းလှိုင်သည် အသက်အရွယ်အရ ရုပ်ရှင်ရိုက်ကူးရေးလုပ်ငန်းမှ အနားယူခဲ့ပြီဖြစ်သော်လည်း မြန်မာ့ရုပ်ရှင်ဖွံ့ဖြိုးတိုးတက်ရေးအတွက် ရုပ်ရှင်ပညာရပ်စာပေများ ရေးသားလျက်ရှိသည်။

ကိုးကားပြင်ဆင်

စင်ကြယ်၊ မောင်၊ တက္ကသိုလ် မောင်လှသူ။ မြန်မာ့ရုပ်ရှင်ရေစီးကြောင်း။