ဗျိုင်းဖြူ အစုအပြုံလိုက် သတ်ဖြတ်ခံရမှု

ဗျိုင်းဖြူ အစုအပြုံလိုက် သတ်ဖြတ်ခံရမှု သည် မြန်မာပြည်တွင်းစစ်အတွင်း၂၀၂၄ ခုနှစ် မေလနှောင်းပိုင်းတွင် ဖြစ်ပွားခဲ့သော လူပေါင်း ၇၆ ဦး ညှဉ်းပန်းနှိပ်စက်သတ်ဖြတ်ခံခဲ့ရသော စစ်တွေမြို့နယ် ဗျိုင်းဖြူရွာတွင် နှစ်ရက်ကြာ ဖြစ်ပွားခဲ့သော ဖြစ်ရပ်ဖြစ်သည်။

ဗျိုင်းဖြူ အစုအပြုံလိုက် သတ်ဖြတ်ခံရမှု
မြန်မာပြည်တွင်းစစ် ၏ တစ်စိတ်တစ်ပိုင်း
ဗျိုင်းဖြူရွာ ဗျိုင်းဖြူရွာ (မြန်မာနိုင်ငံ)
နေရာ	ဗျိုင်းဖြူရွာ၊ ရခိုင်ပြည်နယ်
ရက်စွဲ	၂၉-၃၁ မေ ၂၀၂၄
သေဆုံးသူဦးရေ	၇၆
ဒဏ်ရာရဦးရေ	မသိရှိရ
ပြစ်မှုကျူးလွန်သူများ	တပ်မတော် ရိုဟင်ဂျာ စစ်သွေးကြွများ ရခိုင်ပြည် လွတ်မြောက်ရေး တပ်မတော် (ALA မှ ငြင်းဆို)
ပတ်သက်	ရက္ခိုင့်တပ်တော်နှင့် ဆက်စပ်သည်ဟု သံသယရှိ

နောက်ခံ

မြန်မာနိုင်ငံတွင် ၂၀၂၁ ခုနှစ် အာဏာသိမ်း ပြီးနောက် ပြည်တွင်းစစ် ပြန်လည်ဖြစ်ပွားခဲ့သည်။ ၂၀၂၃ ခုနှစ်နှောင်းပိုင်းတွင် အာရက္ခတပ်တော်မှ ရခိုင်ဒေသကို ထိုးစစ်ဆင်ခဲ့ပြီး ရခိုင်ပြည်နယ် မြောက်ပိုင်းဒေသအများစုကို သိမ်းပိုက်ဝင်ရောက်ခဲ့ကာ မြန်မာနိုင်ငံတွင် အထိရောက်ဆုံး တိုင်းရင်းသားလက်နက်ကိုင်တပ်ဖွဲ့ဖြစ်လာခဲ့သည်။ ဗျိုင်းဖြူရွာသည် ရခိုင်ပြည်နယ် မြို့တော် စစ်တွေမြို့ အပြင်ဘက် အနီးနားရှိ ရွာတစ်ရွာဖြစ်သည်။

ဖြစ်စဉ်များ

၂၀၂၄ ခုနှစ် မေလ ၂၉ ရက်နေ့ နေ့လယ်ပိုင်း အချိန်ခန့်တွင် မြန်မာ့တပ်မတော်မှ တပ်ဖွဲ့ဝင် ၁၇၀ ခန့်သည် ဗျိုင်းဖြူကျေးရွာသို့ ဝင်ရောက်၍ ရက္ခိုင့်တပ်မတော် နှင့် ပတ်သက်ကြောင်းသံသယရှိမှုကြောင့် ရွာသူရွာသား ၇၀ ကျော်အား တရားလက်လွတ် သတ်ဖြတ်ခဲ့သည် ။

ဗျိုင်းဖြူရွာသားများ၏ ပြောကြားချက်အရ နိုင်ငံတော်စီမံအုပ်ချုပ်ရေးကောင်စီမှ တပ်သားများသည် ဗျိုင်းဖြူရွာတွင် တစ်အိမ်တက်ဆင်းဖြင့် အိမ်ထောင်စု စာရင်းရှိ လူများကို စစ်ဆေးခဲ့သည်။ အချို့မှာ ရိုက်နှက်ခံခဲ့ရပြီး ရိုက်နှက်မှုကြောင့် လူသုံးဦး သေဆုံးခဲ့ကာ အခြားအမျိုးသားများကိုလည်း ခေါ်ဆောင်သွားခဲ့သည်။ ယင်းနောက် စစ်သားများက ရွာသူရွာသားများအား စုရုံးခိုင်းခဲ့သည်။

စစ်သားများက ရွာသားအားလုံးကို ရွာလယ်တွင် အတင်းအကြပ် စုစည်းနေခိုင်းစေကာ အမျိုးသားများကို အမျိုးသမီးများနှင့် ကလေးများနှင့် သီးခြား ခွဲထုတ်ခဲ့သည်။ အမျိုးသားများကို ထရပ်ကားဖြင့် ခေါ်ဆောင်သွားကာ နှိပ်စက်သတ်ဖြတ်ခဲ့ပြီး အမျိုးသမီးအများအပြားကို စစ်သားများက မုဒိမ်းကျင့် ခဲ့သည်။ စစ်သားများသည် အမျိုးသမီးများနှင့် ကလေးများအား အစားအစာ၊ ရေနှင့် အမိုးအကာများကို နောက်နေ့အထိ မပေးဘဲ ထားရှိခဲ့သည်။ မျက်မြင်သက်သေများအရ လူတိုင်းအား နေပူထဲတွင် ထားရှိခဲ့ကာ စစ်သားများ၏ ဆီးကို သောက်ရန် အတင်းခိုင်းစေခဲ့သည်ဟု ဆိုသည်။ ရက္ခိုင့်တပ်မတော်ကို ထောက်ခံသော တက်တူးထိုးထားသည့် အမျိုးသားများ၏ အရေပြားကို ဖြတ်ပြီး မီးရှို့ခဲ့သည်။ စစ်တပ်က အိမ်ခြေ ၈၀ ကျော်နှင့် ရွာဘုန်းတော်ကြီးကျောင်းကို မီးရှို့ခဲ့ပြီး ကျန်ကျေးရွာသား ၁၀၀ ကျော်ကို စစ်ကြောမေးမြန်းရန် ခေါ်ဆောင်သွားခဲ့သည်။ နောက် ၃ ရက်အကြာတွင် အနီးနားရှိ မင်းကင်းတောရွာသစ်နှင့် မင်းကင်းတောရွာဟောင်းများကို စစ်အစိုးရစစ်သားများက မီးရှို့ဖျက်ဆီးခဲ့သည်။

ဇွန်လ ၇ ရက်နေ့တွင် စစ်အစိုးရက ဖမ်းဆီးခေါ်ဆောင်သွားသူ ၁၀၀ ကျော်အနက် ၄၇ ဦးကို ပြန်လွှတ်ပေးခဲ့သည်။ နောက် ၄ ရက်အကြာတွင် စစ်ကြောမေးမြန်းမှုအတွင်း ၎င်းတို့ကို ညှဉ်းပန်းနှိပ်စက်သည်ဟု သတင်းများထွက်ပေါ်ပြီးနောက် ပြန်ပေးဆွဲခံရသူ ၄၀ ကျော်ကို စစ်အစိုးရက ဖမ်းဆီးခဲ့သည်။

တုံ့ပြန်မှုများ

အဆိုပါ သတ်ဖြတ်မှုတွင် စစ်အစိုးရ လိုလားသော ရခိုင်ပြည် လွတ်မြောက်ရေး တပ်မတော် (ALA) မှ ပါဝင်ခဲ့သည်ဟု ရက္ခိုင့်တပ်တော် က အခိုင်အမာ ဆိုသော်လည်း ALA က ငြင်းဆိုထားသည်။ အစုလိုက်အပြုံလိုက်သတ်ဖြတ်မှုတွင်ပါဝင်ပတ်သက်နေသော တပ်မတော်နှင့် ALA စစ်သားအားလုံးကို အရေးယူရန် ရက္ခိုင့်တပ်တော်က တောင်းဆိုထားသည်။

စစ်အစိုးရ ပြောရေးဆိုခွင့်ရှိသူ ဗိုလ်ချုပ်ကြီးဇော်မင်းထွန်းက သတ်ဖြတ်မှုများကို ငြင်းဆိုထားပြီး ရက္ခိုင့်တပ်တော်မှ သံသယရှိသူ ၃ ဦးကို စစ်ဆေးမေးမြန်းရန် ခေါ်ယူထားစဉ် အရာရှိတစ်ဦး၏ သေနတ်ကို လုယူရန် ကြိုးပမ်းခဲ့သည် ထိုလူ ၃ ဦး သေဆုံးခဲ့သည်ဟု ဆိုသည်။