မောင်မောင်ကျော် (စည်သူ): တည်းဖြတ်မှု မူကွဲများ

▲စည်သူမောင်မောင်ကျော်သည် မန္တလေးမြို့ ရတနာပုံနေပြည်တော်မြို့တွင်း နန်းတော်၏ တနင်္ဂနွေထောင့် သစ်တပ်အနီးတွင် သက္ကရာဇ် ၁၂၃၈ ခု၊ သီတင်းကျွတ်လဆန်း ၃ ရက် (ခရစ် ၁၈၇၆၊ စက်တင်ဘာလ ၂၀ ရက်) ဗုဒ္ဓဟူးနေ့၌ လယ်မမြို့စား မင်းကြီး မဟာမင်းထင်ရာဇာဘွဲ့ခံ ဗန်းမော်ဝန်မင်းနှင့် ဝန်ကတော် ညောင်ရွှေစော်ဘွားမျိုးတို့မှ ဖွားမြင်သော သားဖြစ်သည်။ မောင်မောင်ကျော် ငါးနှစ်သား အရွယ်မှ ကိုးနှစ်အရွယ်ထိ နန်းတွင်းသို့ မပြတ်ဝင်ထွက်၍ လစဉ်ကျင်းပသော မင်းခမ်းမင်းနားများကို တွေ့မြင်မှတ်သားခဲ့လေသည်။ ငယ်စဉ်အခါက အရှေ့ပြင်တိုက်တော်ဘုန်းကြီးကျောင်း၌ မြန်မာစာပေသင်ကြားသည်။ သက္ကရာဇ် ၁၂၄၇ ခုနှစ် အင်္ဂလိပ်များဝင်ရောက်သောအခါ မောင်မောင်ကျော်သည် မိဘများနှင့်အတူ မြို့ပြင် ၃၃ လမ်း ဘုံဘိုင်တန်းသို့ ပြောင်းခဲ့ရသဖြင့် ပညာရေးအတွက် ပေါင်းလဲ လိုက်ယပ်တန်း ဆရာတော်ဘုရားကြီးထံ ဆက်လက် ဆည်းပူးရသည်။