ခန့်ညားဟိန်း သေဆုံးမှု

ခန့်ညားဟိန်း (၂၀၀၃ - ၁၄ မတ် ၂၀၂၁) တရုတ်အမည် Lin Yaozong သည် မြန်မာဆေးကျောင်းသား တက်ကြွလှုပ်ရှားသူဖြစ်ပြီး ၂၀၂၁ ခုနှစ် စစ်အာဏာသိမ်း ဆန့်ကျင်ရေးဆန္ဒပြပွဲများ အတွင်းတွင် သေဆုံးခဲ့သူ ဖြစ်သည်။ ကွယ်လွန်ပြီးနောက် ခန့်ညားဟိန်းသည် အာဏာသိမ်းဆန့်ကျင်ရေး လှုပ်ရှားမှု၏ ပြယုဂ်ဖြစ်လာခဲ့ကာ မြန်မာ့ဒီမိုကရေစီရေးအတွက် အာဇာနည်တစ်ဦးအဖြစ် အသိအမှတ်ပြုခံရသည်။

ခန့်ညားဟိန်း
မွေးဖွား	၂၀၀၃ ရန်ကုန်မြို့
ကွယ်လွန်	၁၄ မတ် ၂၀၂၁ (အသက် ၁၇) တာမွေမြို့နယ်၊ ရန်ကုန်မြို့
အခြား အမည်များ	Lin Yaozong
ပညာရေး	ဆေးတက္ကသိုလ် ပထမနှစ်
မိဘ(များ)	ဦးသိန်းဇော်၊ ဒေါ်ကြူသင်း

အစောပိုင်းဘဝ

ခန့်ညားဟိန်းကို ၂၀၀၃ ခုနှစ်တွင် ရန်ကုန်တိုင်း၊ လသာမြို့နယ်ရှိ မြန်မာ -တရုတ် မိသားစုတွင် မွေးဖွားခဲ့သည်။ မူလတန်းနှင့် အထက်တန်းပညာရေးကို အမှတ်(၁) အခြေခံပညာ အထက်တန်းကျောင်း တွင် သင်ကြားခဲ့သည်။ သူသည် ဆေးတက္ကသိုလ် (၁) ရန်ကုန် တွင် ပထမနှစ် ကျောင်းသား ဖြစ်သည်။

ဆန္ဒပြခြင်းနှင့် သေဆုံးခြင်း

အာဏာသိမ်း ဆန့်ကျင်ရေး ဆန္ဒပြပွဲကာလအတွင်း သေဆုံးမှုအများဆုံး ဖြစ်ခဲ့သော ၂၀၂၁ ခုနှစ် မတ်လ ၁၄ ရက်နေ့တွင် တာမွေမြို့နယ်၌ အာဏာသိမ်းဆန့်ကျင်ရေး ဆန္ဒပြပွဲများအတွင်း ခန့်ညားဟိန်း၏ ဦးခေါင်းကို စစ်အစိုးရတပ်များက သေနတ်ဖြင့် ပစ်ခတ်ခြင်းကြောင့် သေဆုံးခဲ့သည်။ အရပ်သားများက ရိုက်ကူးခဲ့သော ဗီဒီယိုတွင် ခန့်ညားဟိန်းကို ကူညီရန် ကြိုးစားနေသည့် မိန်းကလေးငယ်တစ်ဦးကို ရဲများက ရိုက်နှက်ဖမ်းဆီးကာ အလောင်းကို ဆွဲယူသွားခဲ့သည်ကို တွေ့မြင်ရသည်။

သူ့သားကို ရဲက ပစ်သတ်ပြီးနောက် "ကျေးဇူးပြုပြီး မြန်မာတရုတ်တွေကို မမုန်းပါနဲ့။ ငါတို့က ဒီမှာမွေးဖွားခဲ့တာပါ" ဟု ခန့်ညားဟိန်း၏မိခင်က မြန်မာပြည်သူများထံ မေတ္တာရပ်ခံခဲ့သည်။ သူမက မန်ဒရင်ဘာသာစကားကို ကျွမ်းကျင်စွာ ပြောဆိုကာ တရုတ်အစိုးရအား ၎င်းတို့၏ လျောက်ထားချက်များကို နားထောင်ပေးရန် တောင်းဆိုခဲ့သည်။ ခန့်ညားဟိန်း၏ ဈာပနတွင် ဝမ်းနည်းပူဆွေးသူ ရာပေါင်းများစွာ လမ်းပေါ် ထွက်လာခဲ့ကြသည်။ ဈာပနတွင် ဆေးဘက်ဆိုင်ရာအသိုင်းအဝိုင်းက လက်သုံးချောင်းထောင်ကာ အလေးပြုခဲ့ကြသည်။