ဦးစံမတူ (၁၉၃၂-၂၀၂၁) သည် မြန်မာ သရုပ်ဆောင်နှင့် လူရွှင်တော် ဖြစ်သည်။

စံမတူ
မွေးဖွား၁၉၃၂
ရန်ကုန်
ကွယ်လွန်၂၀၂၁ သြဂုတ် ၃
ရန်ကုန်
နိုင်ငံလူမျိုးမြန်မာ
အခြား အမည်များမြင့်သိန်း
အလုပ်အကိုင်သရုပ်ဆောင်၊လူရွှင်တော်
အိမ်ထောင်ဖက်(များ)မရှိ
မိဘ(များ)ဦးဘခိုင် (ဖခင်)
ဒေါ်ကြီးမေ (မိခင်)

ငယ်စဉ် ပြင်ဆင်ရန်

၁၉၃၂ တွင် ရန်ကုန်၊ ဗဟိုအမျိုးသမီးဆေးရုံ ဂျမန်ခါနာ၌ ၁၁ လမ်းနေ ဦးဘခိုင်၊ ဒေါ်ကြီးမေတို့က မွေးဖွားသည်။ မောင်မြင့်သိန်းမှာ အမည်ရင်း ဖြစ်သည်။ ၁၁ လမ်းအနီးအနား၌ နာမည်ကျော် အငြိမ့်အဖွဲ့၊ ဇာတ်အဖွဲ့များ ရှိသည်။[၁]

အနုပညာလောက ပြင်ဆင်ရန်

ယင်းအငြိမ့် ဇာတ်သဘင်များကို ကျောင်းအားလပ်ရက်တွင် ကလေးမောင်မြင့်သိန်းသည် သွားရောက်ကြည့်ရှုလေ့ရှိသည်။ ထိုမှတဆင့် ဇာတ်သဘင်အငြိမ့်ပွဲကို နှစ်သက်သဘောကျလာသည်။ ၁၉၄၀ ကျော် ၁၆ နှစ်သားတွင် နာမည်ကြီး မြဒဂုံဇာတ်ပွဲ၌ လူရွှင်တော်အဖြစ် စတင်ကပြခြင်းဖြင့် အနုပညာလောကထဲ ဝင်ရောက်ခဲ့သည်။ ထိုဇာတ်ကနေစဉ်၊ နာမည်ကြီးဒါရိုက်တာ ဦးအောင်ဝင်းက လူရွှင်တော် ဦးစံမတူ၏ အမူအရာ၊ ပြောပုံဆိုဟန်ကို သဘောကျသွားသည်။ ဦးစံမတူကို မိမိရိုက်နေသော ရုပ်ရှင်ထဲ ထည့်ရိုက်ရာမှ ဦးစံမတူ ဇာတ်သဘင်လောကမှ ရုပ်ရှင်နယ်ပယ်အတွင်း ရောက်ရှိလာသည်။ ဤသို့ ရုပ်ရှင်လောက၌ ဒါရိုက်တာများစွာနှင့် ရုပ်ရှင်ကားများတွင် ပါဝင်ရိုက်ကူးရာဝယ်၊ လက်တွဲမှုအများဆုံး ဒါရိုက်တာများမှာ ဦးသုခနှင့် ဝင်းဦးတို့ ဖြစ်သည်။

ရိုက်ကူးခဲ့ပြီးသော ရုပ်ရှင်ကားများ ၂၀၀ ကျော်သည်။ ဟာသဇာတ်ရုပ်ကများသည်။ တွဲဖက်ဟာသသရုပ်ဆောင်များမှာ ပလာတာ ဂျော်လီဆွေ နွဲ့နွဲ့စန်းတို့အပြင် ရွှေအိုးစည် တုတ်တုတ် စသော အနုပညာရှင်များနှင့်လည်း လက်တွဲသရုပ်ဆောင်သည်။[၁]

  1. ဪမိန်းမ
  2. ချစ်သူရွေးမယ် ချစ်ဝဲလည်
  3. ရဟန်းစားရသောဆွမ်းတနပ်
  4. ဃောသကသူဌေးသားအကြောင်း

မိသားစု ပြင်ဆင်ရန်

မိသားစုမရှိ၊ လူပျိုကြီး ဖြစ်၍ တူနှင့်အတူ ရွှေဂုံတိုင်မီးပွိုင့်အနီး တိုက်ခန်းဝယ် နေထိုင်သည်။ အနုပညာလောကမှ အနားယူလိုက်ပြီ ဖြစ်သည့် ဦးစံမတူသည် လမ်းလျှောက်ထွက်ခြင်း၊ အသိမိတ်ဆွေများအိမ် ရံခါ သွားရောက်လည်ပတ် စကားပြောခြင်း၊ မိမိပါဝင်ခဲ့သော ရုပ်ရှင်ကားဟောင်းများကို ပြန်လည်ကြည့်ရှုခြင်းတို့ဖြင့် ဘဝကို ဖြတ်သန်းခဲ့သည်။[၁]

နိဂုံး ပြင်ဆင်ရန်

၃ ဩဂုတ် ၂၀၂၁ မနက်ပိုင်းတွင် ရန်ကုန်မြို့၌ လူကြီးရောဂါဖြင့် ကွယ်လွန်သည်။ [၂]

ကိုးကား ပြင်ဆင်ရန်

  1. ၁.၀ ၁.၁ ၁.၂ အေးကျော့ခိုင် (၁၈ ဇွန် ၂၀၁၈)။ ဟာသအနုပညာကို ထာဝရချစ်ခင်သူ။ The Voice Journal။ ၁၈ စက်တင်ဘာ ၂၀၂၀ တွင် ပြန်စစ်ပြီး။[လင့်ခ်သေ]
  2. လူရွှင်​တော်နှင့် ဟာသသရုပ်ဆောင် ဦးစံမတူ လူကြီးရောဂါဖြင့် ကွယ်လွန်News Eleven (၃ ဩဂုတ် ၂၀၂၁)။