သိန်းစိုး

ဦးသိန်းစိုး (၂၃ ဇန်နဝါရီ ၁၉၅၂ မွေးဖွား) သည် နိုင်ငံတော်စီမံအုပ်ချုပ်ရေးကောင်စီ က ခန့်အပ်ခဲ့သော မြန်မာနိုင်ငံ ပြည်ထောင်စုရွေးကောက်ပွဲကော်မရှင် ၏ ဥက္ကဋ္ဌ အဖြစ် တာဝန်ထမ်းဆောင်ခဲ့သူ ဖြစ်သည်။ ၂၀၂၄ ခုနှစ် ဇန်နဝါရီ ၃၁ ရက်တွင် ထိုတာဝန်မှနေ၍ ကျန်းမာရေးအကြောင်းပြချက်ဖြင့် အနားယူသည်။ သူသည် နိုင်ငံတော်ဖွဲ့စည်းပုံအခြေခံဥပဒေဆိုင်ရာခုံရုံး၏ ပထမဆုံးသော ဥက္ကဋ္ဌလည်း ဖြစ်ခဲ့ဖူးသည်။

ဦးသိန်းစိုး
ပြည်ထောင်စု ရွေးကောက်ပွဲ ကော်မရှင် ဥက္ကဋ္ဌ
တာဝန်သက်တမ်း ၂ ဖေဖော်ဝါရီ ၂၀၂၁ – ၃၁ ဇန်နဝါရီ ၂၀၂၄
သမ္မတ	ဦးမြင့်ဆွေ (ယာယီ)
ဝန်ကြီးချုပ်	ဗိုလ်ချုပ်မှူးကြီး မင်းအောင်လှိုင်
ယခင်လူ	ဦးလှသိန်း
ဆက်ခံသူ	ဦးကိုကို
နိုင်ငံတော်ဖွဲ့စည်းပုံအခြေခံဥပဒေဆိုင်ရာခုံရုံး ဥက္ကဋ္ဌ
တာဝန်သက်တမ်း ၃၀မတ် ၂၀၁၁ – ၆ စက်တင်ဘာ ၂၀၁၂
ခန့်အပ်သူ	ဦးသိန်းစိန်
သမ္မတ	ဦးသိန်းစိန်
ယခင်လူ	ရာထူးစတင်
ဆက်ခံသူ	ဦးမြသိန်း
ပြည်ထောင်စု ရွေးကောက်ပွဲ ကော်မရှင် ဥက္ကဋ္ဌ
တာဝန်သက်တမ်း ၁၁ မတ်၂၀၁၀ – ၃၀ မတ်၂၀၁၁
ဆက်ခံသူ	ဦးတင်အေး
ကိုယ်ရေး အချက်အလက်များ
မွေးဖွား	(1952-01-23) ၂၃ ဇန်နဝါရီ၊ ၁၉၅၂ စစ်ကိုင်းတိုင်း ကနီ
လူမျိုး	မြန်မာ

ငယ်ဘဝနှင့်ပညာရေး

ဦးသိန်းစိုးကို ၁၉၅၂ ခုနှစ် ဇန်နဝါရီလ ၂၃ ရက်နေ့တွင် အဘ ဦးဘသူ၊ အမိ ဒေါ်တင်အေးတို့မှ စစ်ကိုင်းတိုင်း၊ ကနီမြို့၌ ဖွားမြင်ခဲ့သည်။ စစ်တက္ကသိုလ်အမှတ်စဉ် ၁၆ တွင် တက်ရောက်ခဲ့ပြီး ၁၉၇၄ ခုနှစ် ဒီဇင်ဘာလ ၃၁ ရက်နေ့တွင် ပြန်တမ်းဝင်အရာရှိအဖြစ် စတင် ထမ်းဆောင်ခဲ့သည်။

တာဝန်အဆင့်ဆင့်ထမ်းဆောင်ခဲ့မှုများ

တပ်မတော်အရာရှိအဖြစ် အဆင့်ဆင့်တာဝန်ထမ်းဆောင်ခဲ့ပြီး စစ်ဥပဒေချုပ်(ဗိုလ်ချုပ်) အဖြစ် တာဝန်ထမ်းဆောင်ခဲ့သည်။ ထို့နောက် ဒုတိယတရားသူကြီးချုပ်အဖြစ် ပြောင်းလဲထမ်းဆောင်ခဲ့သည်။ ပြည်ထောင်စု ရွေးကောက်ပွဲ ကော်မရှင်တွင် ဥက္ကဋ္ဌအဖြစ် ၂၀၁၀ ခုနှစ်၊ မတ်လ ၁၁ မှ ၂၀၁၁ ခုနှစ်၊ မတ်လ ၃၀ ရက်နေ့အထိ တာဝန်ထမ်းဆောင်ခဲ့သည်။ မြန်မာနိုင်ငံ၏ ပထမဆုံးသော နိုင်ငံတော်ဖွဲ့စည်းပုံအခြေခံဥပဒေဆိုင်ရာခုံရုံး၏ ဥက္ကဋ္ဌ အဖြစ် ၂၀၁၁ ခုနှစ် မတ်လ ၃၀ ရက်နေ့တွင် စတင် ထမ်းဆောင်ခဲ့သည်။ ၂၀၁၂ ခုနှစ် စက်တင်ဘာလ ၆ ရက်နေ့တွင် နိုင်ငံတော်ဖွဲ့စည်းပုံအခြေခံဥပဒေဆိုင်ရာခုံရုံး၏ ဥက္ကဋ္ဌ အဖြစ်မှ မိမိသဘောဆန္ဒအလျောက် နုတ်ထွက်ခဲ့သည်။ လွှတ်တော် ကော်မတီများနှင့်  ကော်မရှင်များသည် ပြည်ထောင်စုအဆင့်မဟုတ်ဘူးဆိုသည့်   ဖွဲ့စည်းပုံအခြေခံ ဥပဒေဆိုင်ရာ ခုံရုံး၏  ဆုံးဖြတ်လိုက်မှု နောက်ဆက်တွဲ အနေဖြင့် နုတ်ထွက်သွားရခြင်းလည်းဖြစ်သည်။

၂၀၂၁ ဖေဖော်ဝါရီနောက်ပိုင်းဖြစ်ရပ်များ

ပြည်ထောင်စုရွေးကောက်ပွဲကော်မရှင် ဥက္ကဋ္ဌ အဖြစ်ခန့်အပ်ခံရပြီးနောက်  “၂၀၂၀ ပြည့်နှစ် ပါတီစုံ ဒီမိုကရေစီ အထွေထွေရွေးကောက်ပွဲ မဲမသမာမှု၊ တရားမဲ့ပြုကျင့်မှုများအပေါ် စုံစမ်း တွေ့ရှိချက်”ဆိုသည့် အစီရင်ခံစာတစောင် ထုတ်ပြန်ခဲ့သည်။ ယင်းနှင့် ပတ်သတ်ပြီး မေးခွန်းပေါင်းများစွာဖြင့် ဝေဖန်မှုအကြီးအကျယ်ခံခဲ့ရသည်။ အငြင်းပွားဖွယ်ရာ အစီရင်ခံစာဟုလည်း ထောက်ပြကြသည်။ NLD ကို ဖျက်သိမ်းသင့်မသင့် စဉ်းစားမည်ဟု ပြောဆိုမှုလည်းရှိခဲ့သည်။ ၂၀၂၁ခုနှစ် မေလ ၁၇ရက်တွင် အမေရိကန်ပြည်ထောင်စု ဘဏ္ဍာရေးဝန်ကြီးဌာန၏ နိုင်ငံရပ်ခြားပိုင်ဆိုင်မှုများထိန်းချုပ်ရေးဌာန (အိုအက်ဖ်အေစီ) က ၎င်းအား ဒဏ်ခတ်ပိတ်ဆို့အရေးယူမှု စာရင်းထဲ ထည့်သွင်းခဲ့သည်။

ဦးသိန်းစိုးခေါင်းဆောင်သည့် ပြည်ထောင်စုရွေးကောက်ပွဲကော်မရှင်က ဒေါ်အောင်ဆန်းစုကြည်၊ ဦးဝင်းမြင့်အပါအဝင် ယခင် ပြည်ထောင်စုရွေးကောက်ပွဲကော်မရှင် အကြီးအကဲနှင့်အဖွဲ့ဝင်များ၊အဖွဲ့ခွဲများ အစရှိသည်တို့အား ရွေးကောက်ပွဲဆိုင်ရာအမှုများဖြင့် တရားလိုလုပ်ကာ တရားစွဲဆိုမှုအများအပြားကိုလည်း ပြုလုပ်ခဲ့သည်။ နိုင်သူအကုန်ရစနစ်အစား အချိုးကျကိုယ်စားပြု ပီအာစနစ် ကို ကျင့်သုံးနိုင်ရေးအတွက်ပါ ကြိုးပမ်းသည်။ ယင်းနောက် တည်ဆဲနိုင်ငံရေးပါတီများအားလုံး ရက်ပေါင်း(၆၀)အတွင်း ပါတီမှတ်ပုံ ပြန်တင်ခိုင်းသည့် နည်းဥပဒေကို ထုတ်ပြန်သည်။