ကမ္မဘဝ

ဘဝဟူသောအကျိုး ဖြစ်ကြောင်းကံ၊ ဘဝသို့ရောက်စေတတ်သော ကံ။ (လောကီကုသိုလ် အကုသိုလ်စေတနာ, ယင်းနှင့်ယှဉ်သော အဘိဇ္ဈာစသောတရားများသည် ကမ္မဘဝ။

စေတနာဆိုတာ ကမ္မဘဝ

ဝိပါက်နာမက္ခန္ဓာကဋတ္တာရုပ်ဟု ဆိုအပ်သော အကျိုးတရားကို ဖြစ်စေတတ်သောကြောင့် စေတနာကို “ဘဝ = ကမ္မဘဝ”ဟုလည်း ခေါ်ဆိုရသည်။ ယင်းဘဝ (ကမ္မဘဝ) အရ ပုညာဘိသင်္ခါရ-အစရှိသော လောကီ ကုသိုလ်, အကုသိုလ်စေတနာ ၂၉-ပါးကို ကောက်ယူရသည်။

သင်္ခါရနှင့် ဘဝတို့၏ ထူးခြားကွဲပြားမှု

သင်္ခါရနှင့် ဘဝသည် စေတနာကိုပင် ကောက်ယူရသော်လည်း ထူးခြားကွဲပြားမှုရှိသည်၊

• မှန်၏-ပစ္စုပ္ပန်ပဋိသန္ဓေ၏အကြောင်း ဖြစ်သော အတိတ်စေတနာသည် “သင်္ခါရ” မည်၏။
• အနာဂတ်ပဋိသန္ဓေ၏ အကြောင်း ဖြစ်သော ပစ္စုပ္ပန်စေတနာသည် “ဘဝ” မည်၏။

• တနည်းအားဖြင့် စေတနာသက်သက်သည် “သင်္ခါရ”မည်၏၊
• စေတနာ, စေတနာနှင့် တကွဖြစ်သော စိတ်, စေတသိက်သည် ဘဝ မည်၏။

• တနည်းအားဖြင့် ဝိညာဉ်၏ ကြောင်းဖြစ်သော စေတနာသည် “သင်္ခါရ” မည်၏။
• ဝိညာဉ်နှင့် အသညာဘဝ၏ကြောင်း ဖြစ်သော စေတနာသည် “ဘဝ” မည်၏။

• တနည်းအားဖြင့် ကုသိုလ်, အကုသိုလ် တရားသည် “သင်္ခါရ”မည်၏၊
• ကုသိုလ်, အကုသိုလ်၊ အဗျာကတတရားသည် “ဘဝ”မည်၏ ။

• တနည်းအားဖြင့် ထိုထိုကုသိုလ်, အကုသိုလ် ပြုလုပ်ရာ၌ အထမမြောက်မီ ရှေ့အဖို့၌ ဖြစ်သော ပုဗ္ဗစေတနာသည် “သင်္ခါရ”မည်၏၊
• အထမြောက်သော မုဉ္စစေတနာသည် “ဘဝ” မည်၏။

• တနည်းအားဖြင့် ဇော ၇-ကြိမ်တွင် ရှေ့ ဇော ၆-ကြိမ်နှင့်ယှဉ်သော စေတနာသည် “သင်္ခါရ”မည်၏၊
• သတ္တမဇောနှင့် ယှဉ်သော စေတနာသည် “ဘဝ”မည်၏။

• တနည်းအားဖြင့် စေတနာနှင့် ယှဉ်သော စိတ်, စေတသိက်သည် “သင်္ခါရ” မည်၏။
• စေတနာသက်သက်သည် “ဘဝ”မည်၏။

ဝိပဿနာရှုကောင်းတဲ့ ကမ္မဘဝ

ဤခွဲထားသတ်မှတ်ချက်များအတိုင်း – အဝိဇ္ဇာ တဏှာ ဥပါဒါန် ဦးဆောင်သည့် မနောဒွါရဝီထိနာမ်တရားစု, သင်္ခါရ-ကံဟူသော မနောဒွါရဝီထိနာမ်တရားစုတို့ကို ဝီထိစိတ္တက္ခဏတိုင်း၌ ပရမတ္ထဓာတ်သားများကို ကုန်စင်အောင် ဝိပဿနာရှုနိုင်ပါက သင်္ခါရနှင့် ကမ္မဘဝ နှစ်မျိုးလုံးကိုပင် ဝိပဿနာရှုပြီး ဖြစ်ပေသည်။ ထိုကြောင့် ဤခွဲထား သတ်မှတ်ချက်များအတိုင်း သင်္ခါရနှင့် ကမ္မဘဝ = ကံတို့ကို လက္ခဏာယာဉ်တင်၍ ဝိပဿနာရှုပါ။

နာနာက္ခဏိက ကမ္မသတ္တိဟူသော ကမ္မပစ္စည်းပိုင်း၌ လာရှိသော ကံ၏စွမ်းအင်သတ္တိကိုကား ဝိပဿနာ မရှုကောင်းဟု မှတ်ပါ။

ဆက်စပ်ဖတ်ရှုရန်

• စေတနာ
• သင်္ခါရ
• ကံ
• ဘဝ