အတိရိတ်ဝိနည်းကံ
ဆွမ်းစားနေစဉ် လာရောက် ထည့်စွက်သော ဘောဇဉ်ကို တော်ပြီ တန်ပြီဟု မြစ်မိ−ပဝါရိတ်ပြုမိ–၍ ပဝါရိတ်သင့်သောရဟန်းသည် ထိုဆွမ်းကို ဆက်လက်၍စားနိုင်ရန် “အတိရိတ္တံ ကရောထ ဘန္တေ”ဟုဆိုရာ ဝိနည်းဓိုရ်ကတဖန် “အလမေတံ သဗ္ဗံ”ဟု ပြန်၍ ဆိုအပ်သော ဘောဇဉ်ကို “အတိရိတ်ဝိနည်းကံ ပြုအပ်သော ဘောဇဉ်”ဟု ခေါ်သည်။ [၁] [၂]
အတိရိတ်ဝိနည်းကံပြုခြင်းအင်္ဂါ ၇-ပါး
ပြင်ဆင်ရန်ပဝါရိတ်သင့်ပြီး ဣရိယာပုဒ်ပြောင်းပြီးမှ နောက်ထပ်စားလိုသော ရဟန်းသည် မိမိစားလိုရာ ခဲဖွယ်[၃]ကို ခွက်၌ထည့်၍ ထိုဘောဇဉ်ကို…
- ၁- ကပ္ပိခြင်း စသည့် အပ်စပ်အောင်ပြုပြီးဖြစ်ခြင်း၊
- ၂- အကပ်ခံပြီးဖြစ်ခြင်း၊
- ၃- ဝိနည်းဓိုရ်၏အနီး၌ မြှောက်ချီထားခြင်း၊
- ၄- ဝိနည်းဓိုရ်၏ ဟတ္ထပါသ်အတွင်းသွား၍
- "အတိရိတ္တံ ကရောထ ဘန္တေ= အကြွင်းအကျန် ပြုလုပ်ပေးပါဘုရား" ဟု ပါဠိလိုဖြစ်စေ၊ မြန်မာလိုဖြစ်စေ ပြောကြားခြင်း၊
- ၅- ဝိနည်းဓိုရ်သည် ထိုနေ့အဖို့၌ ဘောဇဉ်တစ်ခုခုကို အနည်းငယ်ဖြစ်စေ စားပြီးသူဖြစ်ခြင်း၊
- ၆- ဝိနည်းဓိုရ်ကိုယ်တိုင် ပဝါရိတ်သင့်နေလျှင် ထိုသင့်သောနေရာမှ မထသေးခြင်း၊
- ၇- ဝိနည်းဓိုရ်ရဟန်းက ထိုဆွမ်းဘောဇဉ်ကို လက်ဖြင့်သုံးသပ်၍ "အလမေတံ သဗ္ဗံ= ဤအလုံးစုံကို ငါတော်ပြီ" ဟု ၃-ကြိမ် ဆိုရခြင်း…တို့ ဖြစ်သည်။
ထိုအခါ အတိရိတ်ဝိနည်းကံ ပြုပြီးဖြစ်တော့သည်။ (အတိရိတ်ဝိနည်းကံပြုပေးမည့် ရဟန်းကို ဝိနည်းဓိုရ်ဟု ဆိုလိုခြင်းဖြစ်ပါသည်)
ဆောင်ပုဒ် ။ ။ အပ်စပ်ပြီးမှန်-၁၊ အကပ်ခံ-၂၊ ချီပြန်-၃၊ ဟတ္ထပါသ်-၄၊ စားပြီးရာက-၅၊ နေရာမှ မထ-၆ "မေတံ"ရွတ်-၇။
ပဝါရိတ်သင့်သောရဟန်းသည် ဣရိယာပုဒ်ပြောင်းပြီးမှ အာဟာရအတွက်ရည်ရွယ်၍ ယာမကာလိက၊ သတ္တာဟကာလိက၊ ယာဝဇီဝိကတို့ကို ခံယူလျှင် ဒုက္ကဋ်အာပတ်သင့်၍ မျိုတိုင်းမျိုတိုင်း ဒုက္ကဋ်အာပတ်သင့်၏။
ယာဝကာလိကကို ခံယူလျှင် ဒုက္ကဋ်အာပတ်သင့်၍ မျိုတိုင်းမျိုတိုင်း ပါစိတ်အာပတ်သင့်၏။ [၄]
ကာလိကလေးပါး
ပြင်ဆင်ရန်ယာဝကာလိက ။ ။ အရုဏ်တက်သည်မှ မွန်းတည့်ချိန်အတွင်း အကပ်ခံစားသုံးအပ်သော ဆွမ်းဘောဇဉ်။
ယာမကာလိက ။ ။ နေလွဲချိန်မှ အရုဏ်မတက်မီအတွင်း ဆာလောင်ခြင်းအကြောင်းရှိလျှင် သောက်ကောင်းသော အပ်စပ်သောအဖျော်ရည်အမျိုးမျိုး။
သတ္တာဟကာလိက ။ ။ ဂိလာနအကြောင်းရှိလျှင် အကပ်ခံပြီး ၇-ရက်အတွင်း သုံးဆောင်ကောင်းသော ဆေးပစ္စည်းမျိုး။
ယာဝဇီဝိက ။ ။ အကပ်ခံပြီးနောက် အကြောင်းရှိလျှင် အသက်ထက်ဆုံးမှီဝဲနိုင်သော နနွင်း၊ ဖန်ခါး အစရှိသော ဆေးပစ္စည်းအမျိုးမျိုး။