ဒက္ခိဏေယျ

(၁) (ကံ, ကံ၏အကျိုးကိုလည်းကောင်း, တမလွန် လောက နောက်ဘဝကို၎င်း ယုံကြည်၍ တရိုတသေ ပေးလှူအပ်သော မွန်မြတ်သည့်) အလှူဝတ္ထုကို ခံယူထိုက်သော၊ အလှူ ဝတ္ထု၏ အစီးအပွါးဖြစ်သော၊ အလှူဝတ္ထုနှင့် သင့်လျော်-လျောက်ပတ်-သော(အလှူခံပုဂ္ဂိုလ်)၊

• (က) မြတ်စွာဘုရား။
• (ခ) အရိယာပုဂ္ဂိုလ်။
• (ဂ) ရာဂ ဒေါသ မောဟ ကင်းရန် ကျင့်သော “သမ္မာပဋိပန္န ပုဂ္ဂိုလ်။
• (ဃ) ဘိက္ခု, ဘိက္ခုနီ သံဃာ။
• (င) သာသနာပ ရဟန်းပုဏ္ဏား။
• (စ) တက္ကတွန်း စသော အယူမှား ရှိသူ“တိတ္ထိ”။
• (ဆ) အထီး ကျန်မွဲ လူဆင်းရဲ။
• (ဇ) ခရီးသွား။
• (ဈ) အလှူ, အလှူရှင်ကို ချီးမွမ်း တောင်းရမ်းသူ။
• (ည) “ပေးပါ ကမ်းပါ”ဟု ပြောဆို တောင်းရမ်းသူ။

(၂) တပည့်တို့၏-ရိုသေ-ပေးလှူ-ပူဇော်-မှုကို ခံထိုက်သော အတတ် သင်ဆရာ။

(၃) သားသမီးတို့၏–ရိုသေ–ပေးလှူ–ပူဇော်မှုကို ခံထိုက်သော အမိ အဘ။

(အလှူခံပုဂ္ဂိုလ်၊ သူတောင်းစား = ကယ်ပါ။ အဒ္ဓမာဂဓီ၊ ဓာန်။)

ဒက္ခိဏေယျပုဂ္ဂိုလ်များ

ယင်း-ဒက္ခိဏေယျပုဂ္ဂိုလ်သည်– (၁) သေက္ခ = ကျင့်ဆဲပုဂ္ဂိုလ်, (၂) အသေက္ခ = ကျင့်ပြီးပုဂ္ဂိုလ် ဟူ၍ ၂-မျိုးရှိ၏

မဂ္ဂဋ္ဌာန် ၄-ယောက်, ဖလဋ္ဌာန် ၄-ယောက်အားဖြင့် ၈-ယောက်ရှိ၏

• (၁) ဥဘတောဘာဂဝိမုတ္တ = သမာပတ် ၈-ပါးကို ရသော ရဟန္တာ,
• (၂) ပညာဝိမုတ္တ = သမာပတ် ၈-ပါးကို မရသော ရဟန္တာ,
• (၃) ကာယသက္ခီ = သမာပတ် ၈-ပါးကိုရသော အထက် မဂ္ဂဋ္ဌာန် ၃-ယောက်နှင့် အောက် ဖလဋ္ဌာန် ၃-ယောက်,
• (၄) ဒိဋ္ဌိပ္ပတ္တ = သမာပတ် ၈-ပါးကို မရသော ပညာရှေ့သွားရှိသော ယင်း-ပုဂ္ဂိုလ် ၆-ယောက်,
• (၅) သဒ္ဓါဝိမုတ္တ = သမာပတ် ၈-ပါးကို မရသော သဒ္ဓါ-ရှေ့သွားရှိသော ယင်း-ပုဂ္ဂိုလ် ၆-ယောက်,
• (၆) ဓမ္မာနုသာရီ = ပညာရှေ့သွား ရှိသော သောတာပတ္တိမဂ္ဂဋ္ဌာန်ပုဂ္ဂိုလ်,
• (၇) သဒ္ဓါနုသာရီ = သဒ္ဓါ ရှေ့သွားရှိသော သောတာပတ္တိမဂ္ဂဋ္ဌာန် ပုဂ္ဂိုလ်ဟူ၍ ၇-မျိုးရှိ၏

အလှူခံပုဂ္ဂိုလ်ဟူ၍ ၃-မျိုး

• (၁) ရာဂ ကင်းပြီးသော သို့မဟုတ် ရာဂကင်းရန် ကျင့်ဆဲ ဖြစ်သော အလှူခံပုဂ္ဂိုလ်,
• (၂) ဒေါသကင်း ပြီးသော သို့မဟုတ် ဒေါသကင်းရန် ကျင့်ဆဲ ဖြစ်သော အလှူခံပုဂ္ဂိုလ်,
• (၃) မောဟ ကင်းပြီးသော သို့မဟုတ် မောဟကင်းရန် ကျင့်ဆဲဖြစ်သော အလှူခံပုဂ္ဂိုလ်ဟူ၍ ၃-မျိုး ရှိ၏။

• (၁) သမသီသီ-မဟုတ်သော ရဟန္တာ,
• (၂) သမသီသီ = အညီအမျှ ကုန်ဆုံးသော ကိလေသာသီသ ဇီဝိတသီသ-ရှိသော (ကိလေသာကုန်ခြင်းနှင့် အသက်ကုန်ခြင်း တပြိုင်နက်ဖြစ်သော) ရဟန္တာ,
• (၃) အန္တရာပရိနိဗ္ဗာယီ = သက်ဆိုင်ရာ သုဒ္ဓါဝါသ ဘုံ၏ သက်တမ်းထက်ဝက်သို့ မရောက်မီ အတွင်း၌ အကြွင်းမဲ့ ကိလေသာငြိမ်းမည့် အနာဂါမ်ပုဂ္ဂိုလ်,
• (၄) ဥပဟစ္စပရိနိဗ္ဗာယီ = သက်ဆိုင်ရာ သုဒ္ဓါဝါသဘုံ၏ သက်တမ်း ထက်ဝက်ကိုကျော်လွန်၍ အကြွင်းမဲ့ ကိလေသာငြိမ်းမည့် အနာဂါမ်ပုဂ္ဂိုလ်,
• (၅) အသင်္ခါရပရိနိဗ္ဗာယီ = ဆင်းရဲ ပင်ပန်းစွာ အားထုတ်မှု “ပယောဂ” မရှိပဲ ကိလေသာ ပရိနိဗ္ဗာန်စံမည့် အနာဂါမ်ပုဂ္ဂိုလ်,
• (၆) သသင်္ခါရပရိနိဗ္ဗာယီ = ဆင်းရဲ ပင်ပန်းစွာ အားထုတ်မှု “ပယောဂ” ရှိ၍ ကိလေသာပရိနိဗ္ဗာန်စံမည့် အနာဂါမ်ပုဂ္ဂိုလ်,
• (၇) ဥဒ္ဓံသောတအကနိဋ္ဌဂါမီ = အထက်ဘုံတို့သို့ ပို့ဆောင်တတ်သော တဏှာသောတ, ဝဋ္ဋသောတ-ရှိ၍ အကနိဋ္ဌဘုံသို့သွားမည့် အနာဂါမ်ပုဂ္ဂိုလ်ဟူ၍ ၇-မျိုးရှိ၏ ။

အင်္ဂါ ၈-ပါးနှင့် ပြည့်စုံသော အလှူခံ ထိုက်သော ရဟန်း

• (၁) သီလ ၄-ပါးနှင့် ပြည့်စုံခြင်း,
• (၂) ပရိယတ် တတ်မြောက်ခြင်း,
• (၃) ကောင်းသောမိတ်သင်္ဂဟရှိခြင်း,
• (၄) အမြင်မှန်ရှိခြင်း,
• (၅) ရူပါဝစရဈာန်၌ ဝသီဘော်မြောက်ခြင်း,
• (၆) ပုဗ္ဗေနိဝါသဉာဏ်ကို ရခြင်း,
• (၇) ဒိဗ္ဗစက္ခုဉာဏ်ကို ရခြင်း,
• (၈) အာသဝက္ခယဉာဏ်ကို ရခြင်း၊ ဤအင်္ဂါ ၈-ပါးနှင့် ပြည့်စုံသော အလှူခံ ထိုက်သော ရဟန်း

အင်္ဂါ ၈-ပါးနှင့် ပြည့်စုံသော အလှူခံထိုက်သော ရဟန်း

• (၁) သီလ ၄-ပါးနှင့် ပြည့်စုံခြင်း,
• (၂) ပရိယတ် တတ်မြောက်ခြင်း,
• (၃) လွန်ကဲ ပြည့်ဝသော ဝီရိယရှိခြင်း,
• (၄) အာရညကင်ဓုတင်ဆောင်ခြင်း,
• (၅) ကုသလဓမ္မ၌သာ မွေ့လျော်ခြင်း,
• (၆) ကြောက်ခြင်းနှင့် ကြောက်ဖွယ်အာရုံတို့ကို သည်းခံတွန်းလှန်နိုင်ခြင်း,
• (၇) ရူပါဝစရဈာန်၌ ဝသီဘော် မြောက်ခြင်း,
• (၈) အာသဝက္ခယဉာဏ်ကို ရခြင်း၊ ဤအင်္ဂါ ၈-ပါးနှင့် ပြည့်စုံသော အလှူခံထိုက်သော ရဟန်း

ဆက်စပ်ဖတ်ရှုရန်

• ဒက္ခိဏာဝိသုဒ္ဓိ
• ဒက္ခိဏာဝိဘင်္ဂသုတ်